Lucas 24 - Maung a Balita Biblia

Inmolid Bilay si Jesus

¹ Kabkabwasay Simba, linma ra may bibii ed lobuk a sankaawit da ra may pabalingit ya imparaan da.

² Asabian dan nitolin lay baton akasarad sangab na lobuk.

³ Nen linmoob ira, ag da la nalmoy bangkay na Katawan a Jesus.

⁴ Nen nagogoloy kaisipan da lapud saya, pinmayawar ed abay da so duaran lalaki a mankidyam iray kawes da.

⁵ Ataktakot ira may bibii, tan dinmakmomo ran anggad dalin. Tinepet na saramay lalaki, Akin et aanapen yoy mabilay ed pegley da ray inaatey?

⁶ Andi dia, ta inmoli lad bilay. Natandaan yo ni no antoy imbaga tod sikayo nen walad Galilea?

⁷ Imbaga ton nakaukolan a nipalimay Anak na Too ed saray makasalanan, nipasak ed krus, tan onolid bilay diad kumatlon agew!

⁸ Saramay bibii anunotan da no anto ray imbaga to.

⁹ Kasabi ran nanlapud lobuk, imbalita ray amin a bengatla ed saray labinsakey a disipulo tan amin ya arum a kakaiba ra.

¹⁰ Saraman a bibii sikara di Maria Magdalena, Juana, tan Maria ya ina nen Santiago. Sikara tan saray arum a kakaiba ran bibii so angibalita na sarayam amin ed saray apostol.

¹¹ Balet, abaloan na saray apostol a lurey so imbaga ra, tan ag da ra panisiaan.

¹² Anggaman ontan, inmalagey tan binmatik a linmad lobuk si Pedro. Tinmakiling tan anengneng ton anggapoy arum a wadman no ag saramay sidal abel. Kanyan pinmawil ed abung a mankelaw ed agawa.

Pinmanengneng si Jesus ed Duaran Disipulo

¹³ Diad saman lamlamang ya agew, duarad saray disipulo so manaakar a mamaarap ed Emaus, sakey a barion labinsakey a kilomitroy kaarawi tod Jerusalem.

¹⁴ Pantotongtongan da ray nipaakar ed amin ya agawa.

¹⁵ Leleg dan mantotongtong tan mantetepetan, sinmabiy Jesus tan akiolup ed sikara.

¹⁶ Balet singa asaniban iray mata ra, kanyan ag da abirbir.

¹⁷ Tinepet nen Jesus ed sikara, Anto ray pantotongtongan yo, legan yon manaakar? Tinmonda ra a maermen.

¹⁸ Inkuanto may sakey ed sikara a manngaray Cleopas, Sika labat angangkoy sangkailid Jerusalem ya ag mikabat ed saray agawad man nen imbeneg iran agew!

¹⁹ Anto ra tan? tepet to. Inmebat ira, Saray agawan nipaakar ed kinen Jesus a taga Nazaret, sakey a propitan makapanyari ed salita tan gawa diad matay Dios tan diad amin a katoowan.

²⁰ Inerel na saray manonan papari tan saray manoley tayo, tan impasintinsiaan da a pateyen, insan da impasak ed krus.

²¹ Sikato pa ni met so inilaloan mi a mangilaban ed Israel! Aliwan satan labat, kumatlon agew la natan nanlapud inkagawa to ya.

²² Insan nikelawan kamid imbalita na pigaran bibii a kaiba mi. Kabkabwasan kono nen linma rad lobuk,

²³ balet anggapo lad may bangkay. Sinmempet ira, tan imbalita ran wala ray pinmayawar ed sikaran anghil. Imbaga da ra may anghil ed sikara a mabilay si Jesus.

²⁴ Linmay pigarad sikami ed lobuk, tan apaneknekan da a tua so imbalita na saramay bibii, balet ag da anengneng si Jesus.

²⁵ Inkuanen Jesus ed sikara, Agaylay kakulangay panagnunot yo! Akin sirin et mairap kayon manisia ed amin ya imbaga da ray propita?

²⁶ Ag ta nakaukolan a panirapan na Cristo ira yan amin kasakbayan a nagamuran toy mapagalang a kipapasen to?

²⁷ Insan impaliwawa nen Jesus ed sikara yan asalitan nipaakar ed sikato diad Masanton Sulat, manlapud saray libro nen Moises ya anggad saray sulat na amin da ray propita.

²⁸ Asingger la rad samay barion laen da tan impalikas nen Jesus a singa arawi niy laen to.

²⁹ Balet pinokpokan dan ag la ontutuloy a kuanda, Mipundo ka la diad sikami, ta onseselek lay agew, insan onlalabi la ni met. Kanyan akipundod sikara.

³⁰ Nen karongo rad lamisaan angalay tinapay, akisalamat ed Dios, pinipisag to, insan to inter ed sikara.

³¹ Alokasay mata ra tan sikatoy abirbir da, balet biglan naandipat.

³² Inkuandad sakey tan sakey, Kampega lan walay singa apoy a manliub ed puso ta, nen mitotongtong ed sikatad dalan tan ipapaliwawa toy Masanton Sulat.

³³ Inmalagey iran tampol a pinmawil ed Jerusalem. Nalmo rad man a nantitipon iray labinsakey a disipulo tan saray arum a kaiba ra

³⁴ tan inkuanda, Talagan inmolid bilay so Katawan! Nampanengneng ed kinen Simon!

³⁵ Imbalita met na saramay duara so agawad dalan, tan say impakabirbir dad Katawan nen pinipisag toy tinapay.

Pinmanengneng si Jesus ed saray Disipulo to

³⁶ Nen pantotongtongan da ya, biglan manalalagey si Jesus ed pegley da. Inkuantod sikara, Say kareenan komun so walad sikayo.

³⁷ Diad kelaw tan takot da, abaloan dan anyani so nanengneng da.

³⁸ Balet inkuantod sikara, Akin et napapagaan kayo? Akin et manduaruwa kayo ni?

³⁹ Nengneng yo pa ra yay limak tan saray salik, pian napamintuaan yo a siak a dili ya. Diwit yo ak, pian manisia kayo, ta say anyani anggapoy laman tan pokel to, balet nanenengneng yon walad siak ira ya.

⁴⁰ Kapangibaga to ya, impanengneng tod sikara iray lima tan sali to.

⁴¹ Nen ag ni ran siansia anisia lapud liket tan kelaw da, tinepet tod sikara, Wala diay nakan?

⁴² Initdan day sakey a tegteg na siran inkalut.

⁴³ Inala to, tan kinan to a sankanengneng da.

⁴⁴ Insan inkuantod sikara, Sikara yay sinalitak ed sikayo nen kaibiba ta kayo ni. Imbagak ed sikayon nepeg a nasumpal ya amin iray nisulat nipaakar ed siak diad Ganggan nen Moises, diad saray sulat da ray propita, tan diad saray Salmo.

⁴⁵ Insan nilokasan toy muling da, pian natalusan day Masanton Sulat.

⁴⁶ Inkuantod sikara, Onyay nisulat: nakaukolan a manirap so Cristo tan onolid bilay ed kumatlon agew,

⁴⁷ tan diad ngaran to, say pagbabawi tan say kapirdona na saray kasalanan et nepeg a nipulong ed amin a bansa, manlapud Jerusalem.

⁴⁸ Sikayoy tasi ed sarayan bengatla.

⁴⁹ Tandaan yo ya! Ibakik ed sikayo so insipay Amak, balet ag kayo ni ontataynan ed siudad na Jerusalem, anggad ag kayo naitday pakayarin manlapud tawen.

Niatagey ed Tawen si Jesus

⁵⁰ Inyakar to rad satan ed paway na siudad. Kasabi rad Betania, intagey to ray lima to tan binindisionan to ra.

⁵¹ Nen bibindisionan to ra, tinaynan to ra tan niatagey ed tawen.

⁵² Inggalang da tan pinmawil iran magaygayaga ed Jerusalem.

⁵³ Wala ra lawas ed Timplo a misalsalamat ed Dios.