Lucas 22 - Maung a Balita Biblia

Implano ray Gawaen dad kinen Jesus

¹ Manasingger lay Pista na Tinapay ya Anggapoy Libadura, a tatawagey Paskua.

² Saray manonan papari tan saray iskriba et manaanap iray pankanawnawa ran mamatey ed kinen Jesus, ta antakot irad saray totoo.

Si Judas Akisipan ya Iyawat toy Jesus

³ Linmoob si Satanas ed puso nen Judas a tatawagey Iscariote, sakey ed saray labinduan disipulo.

⁴ Linman akitongtong si Judas ed saray manonan papari tan saray opisyal da ray guardia na Timplo. Nantotongtongan da no panoy pangyawat tod kinen Jesus ed sikara.

⁵ Makaliliket ira tan insipan da ya itdan day kuarta.

⁶ Linmabay si Judas ed saya, tan nanlapud saman ginapoan toy mananap na pankanawnawa ton mangyawat ed kinen Jesus diad sikara, ya ag amtay totoo.

Namparaay Jesus a Mangay Pandem na Paskua

⁷ Sinmabiy Pista na Tinapay ya Anggapoy Libadura, a sikato met so panagpatey na saray kilaw a karniro ya onkanad Paskua.

⁸ Imbaki nen Jesus ira di Pedro tan Juan tan binilin to ra, Laka yon mangiparaay Pandem na Paskua tayo.

⁹ Iner so labay mon pangiparaanan mi? tepet da.

¹⁰ Inmebat, Dengel kayo! Laka yod siudad. Naabet kid may sakey a lakin sankasakbat toy samboyug a danum. Tombuk yod looban ton abung.

¹¹ Insan ikuanyod akanabung a patetepet na Maistro: Iner so kawalaay kuarton panganan ko tan saray disipulok na Pandem na Paskua?

¹² Itoro tod satan so sakey a maawang a kuarto ed tagey, a wala la ray ikanan kagawaan ya akaparaan. Iparaan yo ray amin diman.

¹³ Linma la ra sirin tan arumog da ra may amin ya imbaga nen Jesus ed sikara. Kanyan imparaan day Pandem na Paskua.

Say Pandem na Katawan

¹⁴ Nen sinmabi lay oras, dinmongoy Jesus ed lamisaan a kaiba to ray apostol.

¹⁵ Inkuantod sikara, Nampirpirawatan koy mirongod sikayo ed sayan Pandem na Paskua, kasakbayay panirap ko!

¹⁶ Kuankod sikayon ag ak lan balut mangan ed saya, anggad naitday nagnap a kabaliksan ed Panariay Dios.

¹⁷ Angalay kupa tan kasumpal ton akisalamat ed Dios inkuanto, Ala yo ya tan paniinoman yon amin.

¹⁸ Kuankod sikayo a manlapud natan, ag ak la oninom na sayan tabul na ubas, anggad isabi na Panariay Dios.

¹⁹ Insan angalay tinapay tan kasumpal ton akisalamat ed Dios, pinipisag to, inter tod sikara tan inkuanto, Sikato yay laman ko a niiter ed sikayo. Gawa yo ya a pakanudnunotan ed siak.

²⁰ Ontan met a kayari ran nandem, inter tod sikaray kupa a kuanto, Sayan kupa sikatoy balon impisipanay Dios a paneknekay dalak ya onterter para sikayo.

²¹ Balet karongok natan so mantraidor ed siak!

²² Ompatey so Anak na Too, onung ed linaway Dios. Balet makapataktakot so nasagmak na toon mantraidor ed sikato!

²³ Nantetepetan irad satan no siopa kasid sikaray manggawa ya.

Say Sangsangan no Siopay Manona

²⁴ Nansasangsangan met iray disipulo no siopad sikaray nabirbir a manona.

²⁵ Inkuanen Jesus ed sikara, Walay pakayari da ray arari ed sayan mundo a manoley ed saray totoon nasasakopan da; tan saray manoley labay day patawag na Kakaaroy Totoo.

²⁶ Balet aliwa kayon ontan. Say manona ed sikayo nepeg to ingey magmaliw a singa sikatoy yogtan; tan say pangulo nepeg a magmaliw a singa sikatoy managlingkur.

²⁷ Siopay lalon manona: say akarongon mangakan, o say mansisirbi? Say akarongon mangakan. Balet managsirbi ak ed sikayo ran kakaibak.

²⁸ Sikayo ray nansiansiad siak diad amin da ray subsubok ed siak.

²⁹ Initdan ak na Amak na pakayarin manoley,

³⁰ pian mangan tan oninom kayo ed lamisaan ko diad Panarian ko, tan onyorung kayo met ed saray trono a manintinsia ed saray labinduan tribu na Israel.

Impasakbay nen Jesus so Pangibori nen Pedro ed sikato

³¹ Simon, Simon, dengel ka! Naabuloyan si Satanas a manubok ed sikayon amin, a singa say dumaralus a pambiigan toy ilik tan apa.

³² Balet Simon, impikasi ta kan ag naandiy pananisiam. No pinmawil lay pananisiam ed siak, pabiskeg moy linawa da ray agagim.

³³ Katawan, ebat nen Pedro, sipaparaan ak a napriso tan ompatey a kaiba ta ka!

³⁴ Inkuanen Jesus, Kuankod sika, Pedro, kasakbayay ikukaok na lalung ed sayan agew, mamitlon ibagam ya ag mo ak kabat.

Pitaka, Bayung, tan Ispada

³⁵ Insan inkuanen Jesus ed sikara, Nen imbaki ta kayo ya anggapoy awit yon pitaka, bayung, o sapatos, wala tay anggan antokaman a kinulangan yo? Anggapo, ebat da.

³⁶ Balet natan, kuanen Jesus, siopamay walay pitaka o bayung to, nakaukolan ya awiten to. Siopamay anggapoy ispada to nakaukolan ya ilako toy kawes to tan manaliw na ispada.

³⁷ Ta kuankod sikayon nepeg a nasumpal so ibabaga na Masanton Sulat nipaakar ed siak, Sikatoy nibilang a sakey a kriminal. Ta nagagawa lay nisulat a nipaakar ed siak.

³⁸ Inkuanda ray disipulo, Katawan, niay duaran ispada! Duga la tan! inkuanto.

Nampikasi si Jesus

³⁹ Inmalis si Jesus tan linmad Palandey na Kaolibaan, onung ed kaogaliyan to; tan akila ray disipulo to.

⁴⁰ Kasabi ra inkuantod sikara, Mampikasi kayo, pian ag kayo napelag ed tukso.

⁴¹ Insan inmarawiy daiset. Nantalimukor diman tan nampikasi.

⁴² Ama, inkuanto, no labay mo, ipaliis mo ak pad sayan kupay kairapan. Anggaman ontan, aliwan say linawak, no ag ingen say linawam, so nasumpal.

⁴³ Pinmayawar so sakey ya anghil a nanlapud tawen, tan pinabiskeg toy linawa nen Jesus.

⁴⁴ Ontan lay inkagunigon to, kanyan lalon masimoon so impampikasi to. Singa dala so linget ton tinmerter ed dalin.

⁴⁵ Kasumpal ton nampikasi, pinmawil ed saray disipulo to. Asabian to ran nanaogip, ta mapalaloy ermen da.

⁴⁶ Inkuantod sikara, Akin et nanaogip kayo? Bangon kayo tan mampikasi kayo, pian ag kayo napelag ed tukso.

Say Impangerel dad kinen Jesus

⁴⁷ Mansasalita niy Jesus nen sinmabi ray dakerakel a totoo. Si Judas a sakey ed saray labinduan disipulo so angipangulod sikara. Sinmingger ed kinen Jesus, ta anguban to.

⁴⁸ Inkuanen Jesus, Judas, pantraidoran moy Anak na Too diad panamegley na angub, anto?

⁴⁹ Nen alikas na saray disipulon kaiba nen Jesus no antoy nagawa inkuanda, Sigbaten mi la ra, Katawan?

⁵⁰ Sinigbat na sakey ed sikara so aripen na Pangulon Pari, tan apingol so kawanan a layag to.

⁵¹ Balet inkuanen Jesus, Tonda ki la! Paolyan yo ra labat! Diniwit to may layag na aripen, tan pinaabig to.

⁵² Insan inkuanen Jesus ed saramay manonan papari, saramay opisyal da ray guardiad Timplo, tan saramay mamatakken na baley a linmad man a mangerel ed sikato, Akin et sankaawit yo ray ispada tan pekpek? Tulisan ak sirin?

⁵³ Inagew-agew ak a walad Timplo tan wadman kayo met, balet ag yo ak inerel. Balet sikato yay oras yon onggalaw, no say pakayari na kabilongetan so manoley.

Imbori nen Pedro si Jesus

⁵⁴ Inerel day Jesus, insan da inyakar ed abung na Pangulon Pari. Tinmombuk si Pedro ed kinen Jesus, balet walad bandad arawi.

⁵⁵ Walay pinarlangan dan apoy ed pegley na solar to may abung. Akiirung met si Pedro ed saray wadman a mandarangdang.

⁵⁶ Nen amataan na sakey ed saray katulong a bibii, ninengneng ton maung, insan inkuanto, Kaiba to met yan too!

⁵⁷ Balet imbori nen Pedro. Inkuanto ni ingen, Andi pa, ag ko kabat itan a too!

⁵⁸ Ag abayag, walay sakey a lakin akaasikasod sikato tan inkuanto, Kaiba ra ka met, anto? Balet inmebat si Pedro, Andi pa!

⁵⁹ Kalabas na ngalngalin sakey oras, inkuan na sananey a laki, Talagan kaiba to yan too, ta sakey met a taga Galilea!

⁶⁰ Balet inkuanen Pedro, Ag ko amta tay ibabagam! Kabebekta nen mansasalita ni, kinmukaok so sakey a lalung.

⁶¹ Linmingaw so Katawan, tan ninengneng tod mata si Pedro. Natan anunotan nen Pedro may imbagay Katawan, Kasakbayay ikukaok na lalung ed sayan agew, mamitlon ibagam ya ag mo ak kabat.

⁶² Pinmaway si Pedro tan inmakis na ampaipait.

Niludlurey tan Sinisiplatan day Jesus

⁶³ Saray totoon mambabantay ed kinen Jesus niludlurey tan sinisiplatan da.

⁶⁴ Pinerengan day abel insan da tinepet, Ibagam pa no siopay angabil ed sika!

⁶⁵ Amayamay ni so imbabaga ran pamabaing ed sikato.

Si Jesus ed arap na Sanidrin

⁶⁶ Kasabiy kabwasan, nantitipon iray kabyangay Sanidrin: saray mamatakken na baley, saray manonan papari, tan saray iskriba, tan inyarap day Jesus ed sikara.

⁶⁷ Tinepet da, Ibagam ed sikami sikay Cristo? Inmebat, Anggan ibagak ed sikayo ag ki met lamlamang manisia.

⁶⁸ No tepetan ta kayo, ag yo ak lamlamang ebatan.

⁶⁹ Balet, manlapud natan, say Anak na Too onyorung ed nikawanay Dios a Makapanyarin-amin.

⁷⁰ Inkuandan amin, Labay mon ibaga, sirin, sikay Anak na Dios? Inmebat, Sikayo lan dili so mangibabaga.

⁷¹ Inkuanda, Ag tayo la nakaukolan iray mantasi! Arengel ti lad dilin sangi to!