Lucas 18 - Maung a Balita Biblia

Say Alimbawan nipaakar ed Balon Bii tan say Huis

¹ Tinongtong nen Jesus so sakey ya alimbawan pangibangat tod sikara a nepeg day mampikasi lawas tan ag ira nanaekalay ilalo.

² Diad sakey a baley, inkuanto, walay sakey a huis ya ag to tatakotay Dios tan ag to gagalangey too.

³ Wala met diman so sakey a biin balo ya onla lan onlad sikato ya onkerew na katonungan: Iyagel mo ak ed kalaban ko!

⁴ Abayag ya ag asasikasoey huis, balet diad kaonuran inkuanto lamlamang ed sikaton dili, Anggaman ya ag ko tatakotay Dios odino gagalangen so too,

⁵ balet lapud panggugunigon tod siak yan balon bii, iter ko pa lad sikatoy kekerewen to. Ta no andi, ag to ak tondaan a gunigonen et ag ak la makaanos!

⁶ Intuloy na Katawan, Dengel yo may imbagay maoges a huis.

⁷ Say Dios balet ey? Ag to kasi iter so kanepegan da ray dilin totoo to ya agewlabin mikasi? Ag to ra kasi tulongan a tampol?

⁸ Kuankod sikayo: iter ton tampol so kanepegan da. Balet no onsabiy Anak na Too, wala kasiy nasabian ton pananisia diad mundo?

Say Alimbawan nipaakar ed Pariseo tan say Sumisingil na Buis

⁹ Sinalita met nen Jesus yan alimbawa ed saray totoon ipapasen dan matonung so sikaran dili tan mumurmuraen da ray arum.

¹⁰ Walay duaran totoo a linmoob ed Timplo a mampikasi. Sakey so Pariseo, sakey so sumisingil na buis.

¹¹ Samay Pariseo binmiig tan nanalagey a mampikasi, Misalamat ak ed sika, O Dios, ta aliwa ak a singa saray arum a totoon maagum, masaol, tan mikakaloguran. Misalamat ak, ta aliwa ak a singa saman a sumisingil na buis.

¹² Mamidwa ak a manaayuno ed loob na sakey simba, tan iiter koy kakaplo na amin a nanaalmoan ko!

¹³ Samay sumisingil na buis balet, arawdawiy nanalageyan to, tan ngalngali ag to itangwad tawen so lupa to. Tinapuktapuk toy pagew to tan inkuanto, O Dios, kasian mo ak pa a makasalanan!

¹⁴ Kuankod sikayo a sayan too sinmempet ya apirdona ray kasalanan to; balet samay Pariseo, andi. Ta siopamay mampaatagey ed sikaton dili, napaabeba; siopamay mampaabebad sikaton dili, napaatagey.

Binindisionan nen Jesus iray Ogogaw

¹⁵ Wala ray toton angawit na ogogaw ed kinen Jesus, ta labay dan itapew to ray lima tod sarayan ogogaw. Balet nen anengneng na saray disipulo ira yan totoo, nampasnukan da ra.

¹⁶ Balet tinawag nen Jesus ira may ogogaw tan inkuanto, Paolyan yo ray ogogaw ya ondagod siak. Ag yo ra sesebelan, ta saray totoon singa sarayan ogogaw so makankien na Panariay Dios.

¹⁷ Tandaan yo ya! Siopamay ag onabuloy a pasakop ed Panariay Dios a singa sakey ya ogaw, ag balut makaloob ed Panariay Dios.

Say Mayaman a Laki

¹⁸ Tinepet na sakey a manonan Judio ed kinen Jesus, Maung a Maistro, antoy nepeg kon gawaen pian nagamuran koy bilay ya andi-anggaan?

¹⁹ Akin et tatawagen mo ak na maung? ebat nen Jesus. Anggapoy arum a maung no ag say Dios labat.

²⁰ Amtam iray ganggan: Ag ka mikakaloguran; ag ka mamapatey; ag ka mantatakew; ag ka mantitila ed pantasim; igalang moy amam tan inam!

²¹ Inmebat imay laki, Nanlapud ogaw ak ni, oonuren ko la ra yan amin.

²² Kadngel nen Jesus ed saya inkuanto, Wala niy sakey a kakulangan mo. Ilakom ya amin so kayaryan mo, insan mo iter ed saray mairap-bilay so panlakoan mo. Nawalaan kad satan na kayamanan ed tawen. Insan ka dia ompawil ya ontombuk ed siak.

²³ Kadngel tod saya, naermenan a maung lapud agaylay inkayaman to.

²⁴ Anengneng nen Jesus a maerermen imay too, kanyan inkuanto, Mairap a tuloy ya onloob ed Panariay Dios iray mamayaman!

²⁵ Mainomay niy kamilyon onloob ed abut na dagom nen say toon mayaman ya onloob ed Panariay Dios.

²⁶ Inkuan na saramay totoon akadngel ed sikato, Siopay nayarin nilaban sirin ey?

²⁷ Inmebat si Jesus, Say ag nagawaay too, nagawaay Dios.

²⁸ Inkuanen Pedro, Ag mo lilingwanan a tinaynan mi ray abung mi tan tinmombuk kamid sika.

²⁹ On, kuanen Jesus ed sikara, tan kuankod sikayo: siopamay taynan toy abung, asawa, agagi, atateng, o anak lapud Panariay Dios,

³⁰ lalon dakerakel so naawat tod sayan bilay tan, diad panaon ya onsabi, say bilay ya andi-anggaan.

Say Mikatlon Impakasalita nen Jesus ed Ipatey to

³¹ Imbiig nen Jesus iray labinduan disipulo tan inkuantod sikara, Tandaan yo ya! Oonla tayod Jerusalem a diman nagaway amin ya insulat da ray propita nipaakar ed Anak na Too.

³² Niawat ed saray Hintil tan ludlureyen, pagpaogesen, tan luklukdaan da.

³³ Lewet-leweten da, insan da pateyen, balet onolid bilay diad kumatlon agew.

³⁴ Anggapoy atalusan na saray disipulo, ta niamut ed sikaray talus da ra yan imbaga nen Jesus, tan ag da amta ingey sasalitaen to.

Pinaabig nen Jesus so sakey a Bulag

³⁵ Nen akaasingger lay Jesus ed Jerico, walay sakey a lakin bulag a manyodyorung a mipapayabol ed gilig na dalan.

³⁶ Nen nadngel to ray amayamay a totoon ondaralan, tinepet to no antoy nagagawa.

³⁷ Onlalabas si Jesus a taga Nazaret, inkuandad sikato.

³⁸ Tinmawag na maksil, Jesus ya Anak nen David, kasian mo ak!

³⁹ Saray totoon walad bandad onaan nampasnukan da tan imbaga ran mandeen, balet lalon tinmawag na maksil, Anak nen David! Kasian mo ak!

⁴⁰ Tinmondan manaakar si Jesus tan ingganggan ton iyakar dad sikato. Kaasingger to, tinepet nen Jesus,

⁴¹ Antoy labay mon gawaen kon para sika? Katawan, ebat to, labay koy makanengneng.

⁴² Inkuanen Jesus ed sikato, Makanengneng ka! Say pananisiam so amaabig ed sika.

⁴³ Tampol a makanengneng la. Tinombuk toy Jesus tan akisalamat ed Dios. Nen anengneng ya na totoo, indadayew dan amin so Dios.