Levitico 27 - Maung a Balita Biblia

Saray Ganggan a nipaakar ed saray Rigalo ed Katawan

¹ Say Katawan inter tod kinen Moises

² iray onggendan a totontonen a tombuken na saray totood Israel. No say sakey a too et niiter ed Katawan diad panumpal ed sakey a nidoma-doman sipan, satan a too nayarin narondon diad pambayar na saray onggendan a karakel na kuarta,

^3-7 onung ed panagkuinta ed santuario: -matakken a laki, duamplo ya anggad anemaploy taon: limamplon kuartan pilak -matakken a bii: talomplon kuartan pilak -tobun-balon laki, limara ya anggad duamploy taon: duamplon kuartan pilak -tobun-balon bii: samploran kuartan pilak -ogaw a laki, sakey bulan ya anggad limay taon: limaran kuartan pilak -ogaw a bii: taloran kuartan pilak -lakin mantaon na masoluk ya anemaplo: labinliman kuartan pilak -biin mantaon na masoluk ya anemaplo: samploran kuartan pilak.

⁸ No diad gaway irap na sakey a toon nansipan et ag to nayarian a bayaran so nigetar a bayar, iyakar tod pari so toon nisaklang, et say pari paabebaen to so bayar onung na nayarian na samay too.

⁹ No say sipan et nipaakar ed sakey ya ayep a nayarin ibagat ed Katawan, balang ayep ya irigalon onya ed Katawan et masanto,

¹⁰ tan say toon angisipan et ag to nepeg a salatan na sananey ya ayep. Ta no salatan to, saray duaran ayep et kayaryan ira na Katawan.

¹¹ Balet no say sipan et nipaakar ed ayep a marotak onung ed ganggan, tan ag nayarin ibagat ed Katawan, say too awiten tod pari imay ayep.

¹² Say pari kuintaen toy bili na samay ayep onung ed kaabigan odino kakapoyan to may ayep, tan ag la naoman so bili.

¹³ No samay too et labay ton dondonen imay ayep, nepeg a bayaran to may bili tan aruman to ni na kakalima.

¹⁴ No say sakey a too et labay ton isaklang ed Katawan so abung to, say pari kuintaen toy bili onung ed kaabigan odino kakapoyan to may abung, tan ag la naoman so bili.

¹⁵ No say toon mangisaklang et labay ton dondonen imay abung, nepeg a bayaran to may bili tan aruman to ni na kakalima.

¹⁶ No say sakey a too et isaklang tod Katawan so parti na dalin to, say bili kuintaen onung ed karakel na bokel ya itanem ed samay dalin, tan say bili na sakey a salup a sibada et samploran kuartan pilak.

¹⁷ No kasumsumpal na Taon na Panangipawil so pangisaklang tod dalin to, say intiron bili so nepeg a bayaran.

¹⁸ No arum nin panaon kasumpal na Taon na Panangipawil so pangisaklang to, say pari kuintaen toy bili onung ed karakel na taon ya akeraan ya anggad ontumbuk a Taon na Panangipawil, kanyan abeba so bili to.

¹⁹ No say toon angisaklang et labay ton dondonen imay dalin, nepeg ton bayaran so bili tan aruman to ni na kakalima.

²⁰ No ilako tod arum a too so alog, anggaman ya ag to ni dinondon ed Katawan, say kanepegan ton manondon ed naandi.

²¹ Diad arapen a Taon na Panangipawil say alog et magmaliw a masanto tan anggad anggan kayaryan na Katawan; kayaryanen la na saray papari.

²² No say sakey a too et isaklang tod Katawan so alog a sinaliw to,

²³ say pari kuintaen to so bili onung ed karakel na taon ya akeraan ya anggad ontombuk a Taon na Panangipawil, et samay too nepeg a bayaran toy bili ed saman lamlamang ya agew; say kuarta kayaryan na Katawan.

²⁴ No Taon na Panangipawil samay alog nepeg ya ipawil ed gendat ya akankayaryan odino diad saray kabyangay boleg to.

²⁵ Amin a bili nepeg a kuintaen onung ed panagkuinta ed santuario.

²⁶ Say besag ya anak na ayep et kayaryan la na Katawan, kanyan ag la nakaukolan ya isaklang ed sikato a sakey a bagat a manlapud mabolus a linawa. Say kilaw na baka, say kordiro, odino say kilaw na kanding et kayaryan la na Katawan,

²⁷ balet say besag ya anak na marotak ya ayep onung ed ganggan et nayarin dondonen onung ed akuintan bili to tan aruman ni na kakalima. No ag narondon, nayarin ilako ed sananey a too onung ed akuintan bili to.

²⁸ Ag nayarin ilako o dondonen na sakey a too so insaklang ton sigput ed Katawan; nayarin too, ayep, odino dalin. Masanto tan anggad anggan kayaryan na Katawan yan insaklang to.

²⁹ Anggan say toon nisaklang a sigput ed Katawan et ag la nayarin dondonen; nakaukolan a pateyen.

³⁰ Say kakaplo na amin a bungay dalin, trigo man odino bungay kiew, et kayaryan na Katawan.

³¹ No say sakey a too et labay ton dondonen so anggan dinan ed saraya, nepeg ton bayaran so akuintan bili tan aruman to ni na kakalima.

³² Say sakey ed kapag samploran amon ayep et kayaryan na Katawan. No bilangen iray ayep, kayaryan na Katawan so balang kumasamplo.

³³ Say akankayaryan na ayep nepeg ya ag to ibiig a kumasamplo iray makapoy, tan nepeg ya ag to met salatan iray maung ya apilin kumasamplo. No salatan to so sakey ya ayep na sananey ya ayep, kayaryan na Katawan iran dua tan ag to nayarin dondonen.

³⁴ Sikara yay ganggan ya inter na Katawan ed kinen Moises diad tagey na Palandey na Sinai; nepeg ira yan onuren na saray totood Israel.