Levitico 23 - Maung a Balita Biblia

Saray Pista da ray Judio

¹ Say Katawan inter tod kinen Moises

² iray onggendan a totontonen a tombuken na saray totood Israel no mampista ra diad pangigalang dad Katawan.

³ Walay anem agew a pankimey yo, balet ag yo lilingwanan a say kumapiton agew et agew na panagpainawa. Diad satan ya agew ag kayo mankikimey, no ag ingen mantitipon kayon mangigalang ed Dios. Say Agew na Panagpainawa et kayaryan na Katawan, anggan iner so panaayaman yo.

⁴ Ibawag mo ray onggendan a pista ed saray niganan panaon.

Say Paskua tan say Tinapay ya Anggapoy Libadura

⁵ Say Paskua a silibraan pamagalang ed Katawan et onggapod kapansironget na kumalabinapat agew na ononan bulan.

⁶ Diad kumalabinliman agew say Pista na Tinapay ya Anggapoy Libadura et onggapo, tan diad loob na pitoy agew nepeg ya anggapoy libaduran tinapay so kanen yo.

⁷ Diad ononan agew na pista mantitipon kayon mangigalang ed Katawan tan tonda kayod inagew-agew a kimey yo.

⁸ Pitoy agew a mangisaklang kayod Katawan na saray bagat a popoolan. Diad kumapiton agew mantitipon kayo lamet a mangigalang ed Katawan, balet tonda kayod inagew-agew a kimey yo.

^9-10 No onsabi kayod dalin ya iter ed sikayo na Katawan et manani kayo, iyakar yod pari so ononan berber na trigo.

¹¹ Say pari isaklang to yan berber na trigo a nidoma-doman rigalo ed Katawan, pian naawat kayo. Say pari isaklang to may trigo diad ontombuk ya agew kayari na Agew na Panagpainawa.

¹² Diad agew a pangisaklang yod bagat a trigo, mangisaklang kayo met na sakey taon a kordiron kalakyan ya anggapoy deral na laman to a sikatoy bagat a popoolan.

¹³ Katekep to ya, mangyapay kayo na sakey tan kapalduan kilon arina ya inkames ed larak na oliba a sikatoy bagat a popoolan. Say balingit na sayan bagat et makapaliket ed Katawan. Mangisaklang kayo met na sakey litron alak.

¹⁴ Ag kayo mangakan na balon trigo ya ag inloto, odino insanglil, odino ginawan tinapay, ya anggad nisaklang yo la yan bagat ed Dios. Sayan totontonen et nepeg a tombuken na amin a kabyangay boleg yo ya anggan kapigan man a panaon.

Say Pistay Panagani

¹⁵ Mambilang kayo na pitoran simba manlapud ontombuk ya agew kayari na Agew na Panagpainawa, say agew na impangisaklang yod Katawan na sakey a berber na trigo.

¹⁶ Diad kumalimamplon agew, say ontombuk ya agew kayari na kumapiton Agew na Panagpainawa, mangisaklang kayo lamet ed Katawan na balon bagat a trigo.

¹⁷ Kapag pamilya mangyakar na duaran tinapay tan iyapay ton nidoma-doman rigalo ed Katawan. Kapag tinapay gawaen ed sakey tan kapalduan kilon arinan nanlibadura insan iyapay ed Katawan a sikatoy bagat ya ononan anien.

¹⁸ Katekep na sayan tinapay, saray Israelita mangisaklang ira na pitoran sakey taon a kordiro, sakey a bakan kalakyan, tan duaran kanding ya anggapoy deral na laman dan amin. Isaklang ira ed Katawan a bagat a popoolan a katekep na bagat a trigo tan bagat ya alak. Say balingit na sayan bagat et makapaliket ed Katawan.

¹⁹ Ontan met say sakey a kanding a kalakyan isaklang yon bagat a para kasalanan tan say duaran sakey taon a kordiro kalakyan isaklang yon bagat a para kareenan.

²⁰ Say pari iyapay toy tinapay a katekep na duaran kordiro a sikaray nidoma-doman rigalo ed Katawan tan para saray pari. Masanto ra yan bagat.

²¹ Diad satan ya agew tonda kayod inagew-agew a kimey yo, balet mantitipon kayon mangigalang ed Katawan. Saray kabyangay boleg yo et nepeg a tombuken da ra yan totontonen ya anggan kapigan man a panaon, tan anggan iner man so panayaman da.

²² No manani kayod saray kaalogan yo, ag yo gagapasen iray walad saray gilig na kaalogan yo, tan ag yo la papawilen a tortoren iray atilak-tilak; itilak yo la ran para saray mairap-bilay tan saray sangkaili. Say Katawan et sikatoy Dios yo.

Say Pista na Balon Taon

^23-24 Diad ononan agew na kumapiton bulan ngilinan yo so sakey a nidoma-doman agew na panagpainawa, tan mantitipon kayon mangigalang ed Katawan no ontanul iray trumpita.

²⁵ Mangisaklang kayoy bagat a popoolan ed Katawan tan tonda kayo ed inagew-agew a kimey yo.

Say Agew a Pangekal na Kasalanan

^26-27 Say kumaplon agew na kumapiton bulan et agew a panggawa na sirimonya a pangekal na saray kasalanan da ray totoo. Diad satan ya agew ag kayon balut mangakan; mantitipon kayon mangigalang ed Katawan, tan mangisaklang kayo na bagat a popoolan ed sikato.

²⁸ Ag kayo mankikimey ed satan ya agew, lapud sikatoy agew a panggawa na sirimonyan pangekal na kasalanan.

²⁹ Siopamay mangan ed satan ya agew ag la nibilang a sakey ed saray totoo na Dios.

³⁰ Tan no walay mankimey ed satan ya agew say Katawan a dili so mamatey ed sikato.

³¹ Sayan totontonen et nepeg a tombuken na amin da ray kabyangay boleg yo ya anggan man iner so panayaman da.

³² Manlapud kaselek na agew na kumasiam ya agew na bulan ya anggad kapansironget na kumaplon agew ngilinan yo yan agew a sakey a nidoma-doman agew na panagpainawa; legan na sayan agew nepeg ya anggapoy kanen na anggan siopa.

Say Pista na saray Abung-abung

^33-34 Say Pista na saray Abung-abung onggapo ed kumalabinliman agew na kumapiton bulan tan silibraan a pitoy agew.

³⁵ Diad ononan agew na pampista yo mantitipon kayon mangigalang ed Katawan tan tonda kayod inagew-agew a kimey yo.

³⁶ Pitoy agew a mangisaklang kayod Katawan na saray bagat a popoolan. Diad kumawalon agew mantitipon kayo lamet a mangigalang ed Katawan tan mangisaklang kayo na bagat a popoolan. Sikato yay agew a pangigalang ed Katawan, tan tonda kayod inagew-agew a kimey yo. (

³⁷ Sikara yay niganan pista a pantitipon yon mangigalang ed Katawan tan pangisaklang yo na saray bagat a kakanen, saray bagat a popoolan, saray bagat a trigo, saray arum a bagat, tan saray bagat ya alak, onung na nakaukolan ed inagew-agew.

³⁸ Sarayan pista et kaaruman ira na saray Agew na Panagpainawa, tan sarayan bagat et kaaruman ira na saray rigalon isasaklang yo, saray bagat a panumpal yod saray sipan yo, tan saray bagat a pinalapud mabolus a linawa ya iter yod Katawan.)

³⁹ No naani yo la ray bunga na saray tanaman yod kaalogan yo, silibraan yon pitoy agew yan pista, manlapud kamalabinliman agew na kumapiton bulan. Say ononan agew et sakey a nidoma-doman agew na painawa.

⁴⁰ Diad satan ya agew mangala kayoy pigaran sankaabigan a bungay kiew, saray sangay kiew a palmira tan saray sangay mabolung a kiew tan igapo yoy mampista a pangigalang yod Katawan a Dios yo.

⁴¹ Pistaan yo a pitoy agew. Sayan totontonen et nepeg a tombuken na saray kabyangay boleg yo ya anggan kapigan man a panaon.

⁴² Amin ya Israelita et manayam iran pitoy agew ed saray abung-abung

⁴³ pian naamtaan na saray kabyangay boleg yo a say Katawan impanayam to rad abung-abung iray Israelita nen impaway to rad Egipto. Sikatoy Katawan a Dios yo.

⁴⁴ Onya sirin so impangiter nen Moises ed saray Israelita na sarayan totontonen diad pansilibra rad saray niganan pista a pamagalang ed Katawan.