Levitico 21 - Maung a Balita Biblia

Say Inkasanto na saray Papari

¹ Say Katawan ingganggan toy Moises ya ikuantod saray paparin anak nen Aaron, Nepeg a say pari ag to dotakay sikaton dili onung ed ganggan diad pibiang tod sirimonyay pompon na kanayon to,

² likud no say inatey et ina to, ama to, anak to, agi ton laki,

³ odino agi ton marikit a manaayam ed abung to.

⁴ Ag to nepeg a dotakan so sikaton dili diad ipatey na kanayon tod asawa.

⁵ Say pari ag nepeg a labahasan toy anggan dinan a parti na olo to, ni potutan toy balbas to odino salsalgeren toy laman to diad pangipanengneng toy paneermen to.

⁶ Nepeg a sikatoy masanto tan ag to nepeg ya ipelag ed kababaingan so ngaran ko. Sikatoy mangisasaklang na bagat a popoolan, kanyan nepeg a masanto.

⁷ Say pari nepeg ya ag mangasawa na biin marotak, odino naakdulan la odino insian na asawa to; say pari et masanto.

⁸ Saray totoo nepeg ya ipasen dan masanto so pari, lapud sikatoy mangisasaklang ed siak na bagat a kakanen. Siak so Katawan, masanto ak tan pasantosen ko ray totook.

⁹ No say anak na pari et magmaliw a marotak a bii, ipelag tod kababaingan so ama to; sayan anak nepeg a poolan ya anggad ag to ipatey.

¹⁰ Say Pangulon Pari et kinalboan na larak so olo to tan nisaklang a mangisolung na saray kawes na pari, kanyan ag to nepeg a paolyan ya ag asagaysay so buek to odino pilaten toy kawes to diad pangipanengneng ton maneermen.

^11-12 Sikatoy nisaklang ed siak kanyan ag to nepeg a dotakan so sikaton dili onung ed ganggan odino dotakan toy masanton Tulda diad itaynan tod man tan iloob tod abung a kawalaay bangkay, anggan say inatey et say dilin ama o ina to. Siak so Katawan.

¹³ Nepeg a say asawaen to et say biin ag nin balut akiakdul ed siopaman,

¹⁴ aliwan balo odino insian na asawa to odino biin marotak. Nepeg ya asawaen toy biin ag ni adiwit a kabolegan to.

¹⁵ No aliwan birhin so asawaen to, saray anak to a nepeg a masanto ra et marotak ira onung ed ganggan. Siak so Katawan tan siak so angibiig ed sikato a Pangulon Pari.

¹⁶ Say Katawan ingganggan toy Moises ya ikuantod

¹⁷ kinen Aaron, Siopamay kabyangay boleg mon walay deral na laman to et ag nepeg a mangisaklang ed siak na bagat a kakanen. Mansiansia yan totontonen ed anggan kapigan a panaon.

¹⁸ Ag nayarin say toon walay deral na laman to et mangibagat: say toon bulag, kitlaey, aliwaliway lupa to odino anggan anton parti na laman to;

¹⁹ say toon lopuy so lima to odino sali to;

²⁰ say toon bokut odino onano, say toon bulding odino walay sakit tod baog; tan anggan say toon kapon.

²¹ Siopaman a kabyangay boleg nen Aaron a pari a walay deral na laman to et ag nayarin mangisaklang ed siak na bagat a kakanen.

²² Sayan toon walay deral na laman to et nayarin mangan na kakanen ya imbagat ed siak, say masanton bagat a kakanen odino say masanton tuloy a bagat a kakanen;

²³ balet lapud walay deral na laman to, ag nayarin onsingger ed masanton kurtina odino diad altar. Ag to nepeg a dotakan ira yan masanton bengatla, lapud siak so Katawan a mamapasantod sikara.

²⁴ Sikara ya sirin so imbaga nen Moises

²⁵ ed kinen Aaron tan diad saray lalakin anak nen Aaron, tan diad amin ya totood Israel.