Juan 21 - Maung a Balita Biblia

Pinmanengneng si Jesus ed saray Pitoran Disipulo

¹ Kasumpal to ya, pinmanengneng lamet si Jesus ed saray disipulo to diad gilig na Dayat na Tiberias. Onyay impampanengneng to.

² Nanoolup ira di Simon Pedro, Tomas (ya apangaranay Siping), Nataniel (a taga Cana ed Galilea), saray anak nen Zebedeo tan duara nin disipulo nen Jesus.

³ Inkuanen Simon Pedro ed saray kakaiba to, Mansigay ak. Mila kami, kuandad sikato. Kanyan nambaloto ran linma. Balet diad saman a labi anggapoy nala ra.

⁴ Nen ompapaway lay agew, manalalagey si Jesus ed gilig na danum, balet ag abirbir na saray disipulo.

⁵ Insan kuantod sikara, Anak, walay nala yon sira? Inmebat ira, Anggapo.

⁶ Inkuantod sikara, Ipelag yoy iket ed nikawanay baloto tan makala kayo. Impelag da sirin so iket, et ag da la nagoyur lapud karakel na siran nala.

⁷ Say disipulo ya inararo nen Jesus kuantod Pedro, Say Katawan iman! Nen nadngel nen Simon Pedro a say Katawan manaya man, insolung toy kawes to (ta lakseb) insan tinmabuy ed danum.

⁸ Akabaloton ginmilig iray arum a disipulo a gogoyuren day iket a napnoy sira. Ag ira arawi ed gilig, sakey a siamaplon mitro labat.

⁹ Kasakbit da, anengneng day ngalab a walay siran ikakalut, tan wala met so tinapay.

¹⁰ Inkuanen Jesus ed sikara, Mangawit kayo diay pigaran siran nala yo.

¹¹ Kanyan linmogad baloto si Simon Pedro tan inggoyur tod gilig so iket a napnoy ankakabaleg a sirasanlasus tan limamplo tan talon amin. Ag apilat so iket, anggaman ya onyay karakel na siran nala.

¹² Inkuanen Jesus ed sikara, Gali la, ta mangalmusal itayo. Anggapoy anggan sakey ed sikara so akakpel ya anepet ed sikato no siopa, ta amta ran sikatoy Katawan.

¹³ Sinmingger si Jesus tan inala toy tinapay, insan inter tod sikara. Onya met so ginawa tod saray sira.

¹⁴ Sikato yay kumatlon impanpanengneng nen Jesus ed saray disipulo, kasumpal a naolid bilay.

Si Jesus tan si Pedro

¹⁵ Kasumpal dan angan, tinepet nen Jesus ed kinen Simon Pedro, Simon ya anak nen Juan, lalon inaro mo ak nen saraya? On, Katawan, ebat to, amtan ya inaro ta ka. Inkuanen Jesus ed sikato, Asikasom iray kordirok.

¹⁶ Pinidwa nen Jesus a tinepet, Simon ya anak nen Juan, inaro mo ak? On, Katawan, ebat to, amtam ya inaro ta ka. Inkuanen Jesus ed sikato, Asikasom iray karnirok.

¹⁷ Pinitlo nen Jesus a tinepet, Simon ya anak nen Juan, inaro mo ak? Naermenay Pedro ta pinitlo nen Jesus a tinepet, Inaro mo ak? Kanyan kuantod kinen Jesus, Katawan, amtam iray amin a bengatla; amtam ya inaro ta ka! Inkuanen Jesus ed sikato, Asikasom iray karnirok.

¹⁸ Ibagak ed sikay katwaan: nen ogaw ka ni, sikay mansosolung na kawes mon dili tan oonla kad labay mon laen. Balet no masiken ka la, iyonat mo ray limam tan sananey so mangisolung na kawes mo tan iyakar to ka ed ag mo labay a laen.

¹⁹ (Imbaga ya nen Jesus diad pangipaamta to no panoy ipatey nen Pedro, tan diad saya et napagalangan nen Pedro so Dios.) Insan inkuanen Jesus ed kinen Pedro, Tombuk mo ak!

Say Disipulon Inararo nen Jesus

²⁰ Linmingaw si Pedro tan anengneng ton manomtombuk imay disipulon inararo nen Jesussamay sinmaral ed pagew nen Jesus nen mamandem ira tan nantepet, Katawan, siopay mantraidor ed sika?

²¹ Diad impakanengneng nen Pedro ed sikato tinepet to ed kinen Jesus, Katawan, sayan too balet ey?

²² Inmebat si Jesus, No labay kon mambilay ya anggad ipawil ko, antoy wala ed sika? Tombuk mo ak!

²³ Kinmayat ed saray mananombuk nen Jesus so balitan ag ompatey yan disipulo. Balet diad tuay tua ag imbaga nen Jesus ya ag ompatey, no ag ingen inkuanto, No labay kon mambilay ya anggad ipawil ko, antoy wala ed sika?

²⁴ Sikato yay disipulon amaneknek ed saraya, tan sikato niy angisulat. Tan amta min katwaan iray imbabaga to.

Kasamputan

²⁵ Dakerakel ni ray arum a ginagawa nen Jesus a no isulat iran amin, isipen kon ag nakargay intiron mundo ray libron pangisulatan.