Juan 14 - Maung a Balita Biblia

Si Jesus so Dalan a Mamaarap ed Ama

¹ Inkuanan Jesus, Ag komun nagunigon so puso yo; manisia kayod Dios tan manisia kayo met ed siak.

² Dakel so napanayaman ed abung nen Amak, et onla ak a mangiparaan na panayaman yo. No aliwa yan tua, ag ko ya komun imbagad sikayo.

³ Kayariy iyakar ko tan pangiparaan koy panayaman yo, ompawil ak dia, tan awiten ta kayo pian manayam kayo ed kawalaan ko.

⁴ Amta yo lay dalan a mamaarap ed laen ko.

⁵ Tinepet nen Tomas ed sikato, Katawan, ag mi amtay laen mo, panoy pakaamta miy dalan?

⁶ Inmebat si Jesus, Siak so dalan, say katwaan, tan say bilay; anggapoy toon makaonlad Ama no ag diad panamegley ko.

⁷ Natan ta kabat yo ak la, kabat yo met lay Amak. Manlapud natan, kabat yo la tan anengneng yo la.

⁸ Inkuanen Felipe ed sikato, Katawan, ipanengneng moy Ama ed sikami, et masarag lad sikami.

⁹ Inmebat si Jesus, Abayag lan kaiba yo ak, balet ag mo ak ni amta, Felipe? Say akanengneng ed siak, anengneng to lay Amak. Akit kekerewen mon ipanengneng koy Ama ed sikayo?

¹⁰ Ag ka ta manisian wala ak ed Ama, tan say Ama wala ed siak? Ag manlalapud siak a dili iray salitan ibabagak ed sikayo. Say Ama a manaayam ed siak gagawaen to ray dilin kimey to.

¹¹ Sisia yon wala ak ed Ama, tan say Ama wala ed siak. No andi, sisia yo ak lapud sarayan gawa.

¹² Ibagak ed sikayoy katwaan: siopamay toon manisiad siak gawaen to ray gagawaen ko, tan lalon dakel ni ingen ta onla ak ed Ama.

¹³ Antokaman a kerewen yod ngaran ko, gawaen ko, pian nipatnag so kagalangay Ama diad panamegley na Anak.

¹⁴ No onkerew kayoy antokaman ed ngaran ko, gawaen ko.

Say Nisipan ya Ispiritu Santo

¹⁵ No inaro yo ak, onuren yo ray ganggan ko.

¹⁶ Mikasi ak ed Ama tan itdan to kayoy sananey a Mananulong a manayam ya anggad angga ed sikayo,

¹⁷ a salanti say Ispiritu na katwaan ya ag naawat na sankamundoan, lapud ag to nanengneng tan ag to met kabat. Balet kabat yo, ta manaayam ed sikayo tan walad sikayo.

¹⁸ Ag ta kayo taynan a mambukbukor; pawilen ta kayo.

¹⁹ Maganggano lan ag ak nanengneng na sankamundoan. Balet nanengneng yo ak lapud mambilay ak tan mambilay ki met.

²⁰ Diad satan ya agew, naamtaan yon wala ak ed Ama tan wala kayod siak, tan wala ak ed sikayo.

²¹ Say mangawat na saray ganggan ko tan onuren to ra, sikato so mangarod siak. Aroen na Amak so toon mangarod siak; sikatoy aroen ko met tan ipaamtak so inkasiak ed sikato.

²² Tinepet nen Judas ed kinen Jesus (aliwa yan si Judas Iscariote), Akin et ipaamtam so sikan dili ed sikami, aliwan diad sankamundoan?

²³ Inmebat si Jesus, Siopamay mangarod siak, onuren to ray salitak; sikatoy aroen nen Amak tan onla kamin manayam ed sikato.

²⁴ Siopamay ag mangarod siak, ag to onuren iray salitak. Ag ko kien iray salitan narerengel yo. Kien na Ama ya angibakid siak.

²⁵ Imbagak ira yad sikayo ambegyan kaiba yo ak ni.

²⁶ Balet say Mananulong, a salanti say Ispiritu Santo ya ibaki na Ama diad ngaran ko, ibangat tod sikayoy amin a bengatla tan ipanunot to ray amin ya imbabagak ed sikayo.

²⁷ Itilak kod sikayoy kareenan; say kareenan kon dili so iter kod sikayo. Aliwan singa panangiter na sankamundoan so pangiter kod sikayo. Ag komun nagunigon tan ontakot so puso yo.

²⁸ Nadngel yon imbagak ed sikayo, Ontaynan ak, balet pawilen ta kayo. No inaro yo ak, panliketan yoy iyakar kod Ama, ta matalonay Ama nen say siak.

²⁹ Ibabagak la ya natan ed sikayo, kasakbayan a nagawa, pian sisiaen yo no nagawa la.

³⁰ Ag ko la dokeyay pansalitak ed sikayo, ta onsasabi lay manoley ed sayan mundo. Anggapon balut so pakayari tod siak.

³¹ Balet pian naamtaan na sankamundoan ya inarok so Ama, oonuren ko ray amin a ganggan tod siak. Alagey kayo. Tila la!