Juan 10 - Maung a Balita Biblia

Say Alimbawan nipaakar ed Koral na Karniro

¹ Ibabagak ed sikayoy katwaan: say toon onloloob ed koral da ray karniro ya ag ondadalan ed puirta no ag ingen onluluksod ag nepeg a dadalanen, sikatoy matakew tan tulisan.

² Say toon onloob ya ondadalan ed puirta, sikatoy pastol da ray karniro.

³ Lolokasan na managbantay na puirta tan derengelen na saray karniro so bosis to. Tatawagen tod kangaranan da ray karniro to, tan ipapaway to ra.

⁴ No nipaway to la ran amin, manaakar a walad onaan da. Totombuken da ta kabat day bosis to.

⁵ Ag ira ontombuk ed sananey; ibatikan da ni ingen, ta ag da kabat so bosis da ray arum.

⁶ Sinalita nen Jesus yan alimbawad sikara, balet ag da atalusay labay ton ibaga.

Si Jesus so Maung a Pastol

⁷ Kanyan inkuan lamet nen Jesus, Ibabagak ed sikayoy katwaan: siak so puirtan dadalanen da ray karniro.

⁸ Tutulisan tan matatakew iray inmona nen siak, balet ag ira dinengel na saray karniro.

⁹ Siak so puirta. Nilaban so siopaman ya onloob ed panamegley ko; onloob tan ompaway, et makalmoy pankabkaban to.

¹⁰ Say matakew onloob labat a mantakew, mamatey, tan maneral. Linma ak dia, pian nawalaan iray bilay, bilay a nagnagnap.

¹¹ Siak so maung a pastol. Say maung a pastol isaklang toy bilay to para saray karniro.

¹² Say mimiupa ya aliwan pastol et ombatik no nanengneng ton nitan lay asod katakelan. Ibatikan to ray karniro lapud mimiupa labat, tan ag to kayaryan iray karniro. Kanyan sibaren tan buyaken na asod katakelan iray karniro.

¹³ Ombatik ta mimiupa labat tan anggapoy panagkawanan tod saray karniro.

¹⁴ Siak so maung a pastol. Kabat ko ray karnirok tan kabat da ak,

¹⁵ a singa say Ama kabat to ak tan sikatoy kabat ko. Tan isaklang koy bilay ko para saray karniro.

¹⁶ Wala ni ray arum a karnirok ya andi rad sayan koral. Nakaukolan ya ipitipon ko met ira. Dengelen da met so bosis ko tan diad onya, magmaliw a saksakey so poluk tan saksakey met so managpastol.

¹⁷ Inaro ak na Ama lapud saya, ta isaklang koy bilay ko pian nabawik lamet.

¹⁸ Anggapoy makaekal na bilay ko, balet isaklang kon manlapud siak a dili so bilay ko. Walay pakayarik a mangiter tan mamawiy bilay ko. Ingganggan nen Amak yan gawaen ko.

¹⁹ Walay pambabalingaan lamet na saray Judio lapud sarayan salita nen Jesus.

²⁰ Dakel ed sikaray angibaga, Inaponay dimonyo! Ambagel! Akit dedengelen yo?

²¹ Balet inkuanday arum, Ag makapansalitay onya so toon inaponay dimonyo! Nayarian kasi na dimonyo so mangiter na pakanengneng ed saray bulag?

Ag Sinisia na saray Judio si Jesus

²² Sinmabiy Pistay Panangibagat diad Jerusalem. Panaon na ambetel ed saman.

²³ Wadmay Jesus a manaakar ed Portiko nen Solomon diad Timplo.

²⁴ Minokut na saray Judio tan tinepet dad sikato, Panduaruwaen mo kami nin mabayag kasi? No sika so Cristo, ibagam lan malinlinew ed sikami.

²⁵ Inmebat si Jesus, Imbagak lad sikayo et ag ki met manisia. Saray kimey a gagawaen kod ngaray Ama, sikaray mamapaneknek na nipaakar ed siak.

²⁶ Balet ag kayo manisia, lapud ag ta kayo karniro.

²⁷ Ondedengel na bosis ko ray karnirok. Amtak ira tan totombuken da ak.

²⁸ Iitdan ko ray bilay ya andi-anggaan. Ag iran balut nabalang tan ag iran balut nasamsam ed siak na anggan siopa.

²⁹ Say Amak ya angiter ed sikara ed siak et lalon makapanyari nen say anggan siopa. Anggapoy makasamsam ed sikara diad limay Amak.

³⁰ Siak tan say Ama, saksakey kami.

³¹ Kanyan anokdok lamet iray Judio na saray baton panupak dad sikato.

³² Inkuanen Jesus ed sikara, Impapanengneng kod sikayo ray maung a gawan impagawa na Ama ed siak. Dinan ed saraya so makasengeg na panupakan yod siak?

³³ Inmebat iray Judio, Ag mi ka tupaken lapud saray maung a gawa, balet lapud maoges a panagsalitam a sumpad Dios! Gagawaen moy sikan dili a Dios, anta too ka!

³⁴ Inmebat si Jesus, Ag ta nisulat ed saray Ganggan yo a say Dios kuanto, Sikayo ray diriyos?

³⁵ Amta tayo ya ag nayarin paandien so ibabaga na Masanton Sulat. Say Dios tinawag toy diriyos iray angitdan toy salita to.

³⁶ No say siak, pinili ak na Ama tan imbaki to ak ed mundo. Panon sirin so pangibaga yon mansasalita ak na maoges sumpad Dios diad pangibabagak ya Anak ak na Dios?

³⁷ No ag ko gagawaen iray kimey na Amak, ag yo ak nepeg a sisiaen.

³⁸ Balet no gagawaen ko ra, anggaman ya ag yo ak sisiaen, sisia yo ray kimey ko. Et diad ontan, naamtaan yo lan talaga a walad siak so Ama, tan wala ak ed sikato.

³⁹ Sinali ra lamet ya erelen, balet imbatikan to ra.

⁴⁰ Pinmawil lamet si Jesus ed basil na Ilog na Jordan a nambibinyagan nen Juan nen saman. Nanayam diman tan

⁴¹ dakel a totoo so linmad sikato tan inkuanda, Anggapo ray milagron ginawa nen Juan, balet tuan amiy imbabaga ton nipaakar ed sayan too.

⁴² Dakel so anisiad man ed kinen Jesus.