Josue 7 - Maung a Balita Biblia

Say Kasalanan nen Acan

¹ Ag asumpal imay ganggan na Katawan ed saray Israelita ya ag iran balut mangala ed Jerico na antokaman a nepeg a deralen, ta angala si Acan. Lapud saya mapalaloy pasnuk na Katawan ed sikara. (Si Acan et anak nen Carmi tan apo nen Sabdi, tan kabyangan na boleg nen Zera a kabyangan na tribu nen Juda.)

² Si Josue angibaki na saray lalaki a manlapud Jerico ta onla ra ed Ai, sakey a siudad ed bokig na Betel tan asingger ed Bet-aven. Ingganggan to ran onla a mannengneng na dalin. Nen asumpal da lay angibakian ed sikara,

³ inkuandad kinen Josue: Ag la nakaukolan a dogpaan na balang sakey ed sikatayo so Ai. Mangibaki ka labat na sakey a duara odino taloran libo a lalaki. Ag mo ibabaki ray amin a sondalod man a mibakal; aliwan baleg man a siudad.

⁴ Kanyan sakey a talon libon Israelita so dinmogpa, balet apasoot iran sinmener.

⁵ Inosilan ira na saray lalakin taga Ai manlapud puirta na siudad ya anggad saray pigaran panagalaan na tinabas a bato tan pinatey day sakey a talomplo tan anem ed sikara diad alusadsar na pokdul. Lapud saya nakalay biskeg na linawa iray Israelita tan ataktakot ira.

⁶ Si Josue tan saray pangulo na Israel pinipilat day kawes da lapud ermen da, intitiblak day laman da ed dalin diad arap na Kaban na Sipanan na Katawan, tan nandodokul irad man ya anggad labi, a kadadabuk so kaoloan da diad pangipanengneng dad ermen da.

⁷ Insan inkuanen Josue, Katawan a Dios, akin et pinabaliw mo kami ni ed Jordan? Pian nipalima mo kami ed saray Amorreo? Pian napatey mo kami? Akin et ag kami labat la nanayam diman ed basil na Jordan?

⁸ Anto kasiy nibagak, O Katawan, natan a sinmener so Israel ed saray kalaban to?

⁹ Narengelan yan andi-saew na saray Cananeo tan amin a totoo ed bansa. Liktuben da kami tan pateyen day balang sakey ed sikami! Antoy gawaen mod satan a pangyagel mod kagalangan mo?

¹⁰ Inkuan na Katawan ed kinen Josue, Bangon ka! Akin et mandodokul kad dalin ya ontan?

¹¹ Nankasalanan so Israel! Sinumlang da so paknaan ya ingganggan kod sikaran sumpalen da. Angala ra na pigaran bengatlan nepeg a deralen. Tinakew da, intila ray impanakew da, tan impikasakey dad saray kayaryan da.

¹² Sikato yay makasengeg ya ag nalabanan na saray Israelita iray kalaban da. Sinmener ira, lapud sikaran dili et asintinsiaan la ran ompatey. Ag ta kayo la olupen no ag yo deralen iray bengatlan sebel ya alaen yo!

¹³ Bangon ka! Linisan mo ray totoo onung ed ganggan tan iparaan mo ran miarapan ed siak. Ibagam ed sikaran sipaparaan ira nabwas, ta siak a Katawan a Dios na Israel et walay ibagak ed sikara: Israel, isisinup yoy pigaran bengatla ya ingganggan kon deralen yo! Ag yo nalabanan iray kalaban yo ya anggad deralen yo ray bengatlan sebel ya alaen!

¹⁴ Kanyan ibagam ed sikara a nabwas ondagod siak a mansosoblay iray tribu. Diad tribun napilik ondagod siak so balang boleg, tan diad boleg a napilik ondago so balang pamilya. Diad pamilyan napilik ondagod siak so balang laki.

¹⁵ Say toon narumog a kawalaan na saray bengatlan nepeg a deralen, poolan a pati saray kabyangay pamilya to tan amin a kayaryan to, ta makapasinagem so inter ton kababaingan ed Israel tan dineral to so impisipanan ko.

¹⁶ Diad kabkabwasan na ontombuk ya agew si Josue pinarago tan nansosoblay iray tribu na Israel, et say tribu nen Juda so apili.

¹⁷ Si Josue pinarago ton nansosoblay iray boleg na tribu nen Juda, et say boleg nen Zera so apili. Insan pinarago ton nansosoblay iray pamilya na boleg nen Zera, et say pamilya nen Zabdi so apili.

¹⁸ Pinarago ton nansosoblay iray lalaki ed pamilya nen Zabdi, et say apili si Acan a lakin anak nen Carmi tan apo nen Zabdi.

¹⁹ Inkuanen Josue ed sikato, Anak ko, ibagam so tua ed arap na Katawan a Dios na Israel, pian sikatoy napagalangan mo. Ibagam natan so ginawam. Ag mo iyaamut ed siak.

²⁰ On, tua, ebat nen Acan. Nankasalanan ak ed Katawan a Dios na Israel, et saya so ginawak.

²¹ Diad saramay asamsam akanengneng ak na marakerakep a kolibemben a nanlapud Babilonia, sakey a duaran kilon pilak, tan sakey a baritan balituk a mambelat na kapalduay kilo. Mapalaloy impanlabay kod saraya, kanyan inalak ira. Narumog yo ran akakotkot ed dalem na tuldak; walad daledalem so pilak.

²² Angibaki sirin si Josue na pigaran lalaki a batik irad samay tulda tan arumog dan nikotkot a tua ira may bengatlan nepeg a deralen; walad daledalem imay pilak.

²³ Impaway da rad tulda, inawit da rad kinen Josue tan amin ya Israelita, tan inggaton da rad arap na Katawan.

²⁴ Si Josue tan amin a totood Israel siningkat day Acan, samay pilak, samay kolibemben, samay baritan balituk, pati saray lalaki tan saray bibiin anak nen Acan, saray baka to, saray asno to, saray karniro to, samay tulda to, tan saray arum nin kayaryan to; insan da ra inyakar ed Patar na Gunigon.

²⁵ Insan inkuanen Josue, Akin et impelag mod sikamiy gunigon? Ipelag natan na Katawan so gunigon ed sika! Amin da ray totoo sirin tinutupak da si Acan ya anggad ag to impatey; tinutupak tan pinopoolan da met iray kabyangay pamilya to tan amin a kayaryan to.

²⁶ Tinabunan day ankakabaleg a bato si Acan; wadman ni ra yan bato ya anggad natan. Sikato yay makasengeg a sayan pasen et atawag na Patar na Gunigon. Lapud sayan agawa kinmepa so mapalalon pasnuk na Katawan.