Josue 23 - Maung a Balita Biblia

Say Kaonuran a Paliwawa nen Josue

¹ Kalabas na abayag a panaon kasumpal to ya, impanari na Katawan so kareenan ed dalin na Israel. Masikesiken lad saman si Josue,

² kanyan tinawag toy intiron Israel, saray mamatakken, saray pangulo, saray huis, tan saray opisyal na saray totoo, tan kuanto, Masikesiken ak la.

³ Anengneng yo ray amin a ginagawa na Katawan a Dios yo ed amin da ra yan bansa lapud sikayo. Say Katawan a Dios so mibabakal para sikayo.

⁴ Impabetang ko lad saray tribu yo so dalin na saray akeraan nin bansa; tan amin da ray bansan dinadakep ko la, manlapud Ilog na Jordan diad bokig ya anggad Dayat na Mediteraneo diad sagur.

⁵ Say Katawan a Dios yo et pabatiken to ra legan yon lolooban iray dalin da. Nakayaryan yoy dalin da onung na insipan ed sikayo na Katawan a Dios yo.

⁶ Kanyan pampelegan yon onuren tan sumpalen iray amin a nisulat ed libro na Ganggan nen Moises. Ag yo papaolyan so anggan anton parti na ganggan,

⁷ et ag kayod satan milimug-limug ed saray akeraan ed sarayan totoo a manaayam ed kawalaan yo, o salitaen yoy kangaranan da ray diriyos da, o ikana yo ray kangaranan da diad pansamba yo, o galangen yo ray diriyos da, odino ondadakmomo kayod sikara.

⁸ Ingen, nepeg a mansiansia kayon matoor ed Katawan, a singa ginawa yo la nen saman ya anggad natan.

⁹ Pinataynan na Katawan iray totood ankakabaleg tan makapanyarin bansa legan na pankukurang yo, et anggapoy akayarin milaban ed sikayo.

¹⁰ Anggan siopad sikayo nayarian ton pabatiken so sanlibon lalaki, ta mibabakal a para sikayo so Katawan a Dios yo, onung na insipan tod sikayo.

¹¹ Pampelengan yo sirin ya aroen so Katawan a Dios yo.

¹² No ipolisay yo so Katawan tan migampi kayod saray akeraan nin bansa tan miasawaan kayod sikara,

¹³ andiduaruwan ag la ra pabatiken na Katawan a Dios yo legan yon lolooban iray dalin da. Ingen, magmaliw iran singa patit o kalut ed sikayo odino singa ra ansakit a bakbak ed beneg yo odino sabit ed mata yo. Et mansiansia yan anggad anggapoy nakeraan ed sikayo ed sayan maung a dalin ya inter ed sikayo na Katawan a Dios yo.

¹⁴ Magano ak lan ontaynan ed sayan mundo. Amta na balang sakey ed sikayo diad puso tan kamarerwa to a say Katawan a Dios yo et inter tod sikayoy amin iran maabig a bengatla ya insipan to. Asumpal ya amin iray insipan to; anggapoy ag agawa.

¹⁵ Balet no panoy impanumpal tod amin ya insipan tod sikayo, ontan met so gawaen tod amin ya impasakbay tod sikayo.

¹⁶ No ag yo sumpaley impisipanan na Katawan a Dios yo onung na ganggan ton sumpalen yo, tan manlingkur tan mangigalang kayod arum a diriyos, dusaen to kayod pasnuk to, et ag mabayag anggapoy nakeraan ed sikayo diad sayan maung a dalin ya inter tod sikayo.