Josue 21 - Maung a Balita Biblia

Saray Siudad da ray Levita

¹ Saray pangulo da ray pamilya na saray Levita linma rad kinen Eleazar a pari, si Josue a lakin anak nen Nun, tan saray pangulo da ray pamilya na amin a tribu na Israel.

² Diad Silo ed dalin na Canaan inkuandad sikara, Ingganggan na Katawan diad panamegley nen Moises a nepeg a naitdan kami na saray siudad a panayaman mi tan saray dalin ed kaliber-liber da a pampastolan mid saray ayayep mi.

³ Kanyan onung ed ingganggan na Katawan saray totood Israel initdan da ray Levita na saray siudad tan saray dalin a panagpastolan a tinaksing dad saray dalin da.

⁴ Say ononan naitdan na saray siudad et saray boleg nen Coat a Levita. Nipabetang ed saray pamilya a say sengeg da et si Aaron a pari so labintalon siudad ya ataksing ed saray dalin na Juda, Simeon, tan Benjamin.

⁵ Nipabetang ed saray arum a kabyangan na boleg nen Coat so samploran siudad ya ataksing ed saray dalin na Efraim, Dan, tan say kapalduay Manases.

⁶ Nipabetang ed boleg nen Gerson so labintalon siudad ya ataksing ed saray dalin na Isacar, Aser, Neftali tan say kapalduay Manases.

⁷ Nipabetang ed saray pamilya na boleg nen Merari so labinduan siudad ya ataksing ed saray dalin na Ruben, Gad, tan Zabulon.

⁸ Diad panamegley na pampapalaranan, saray totood Israel impabetang dad saray Levita ira yan siudad tan saray dalin a panagpastolan da, onung na ingganggan na Katawan diad panamegley nen Moises.

⁹ Sikara yay kangaranan na saray siudad ya ataksing ed saray dalin na Juda tan Simeon, a niiter

¹⁰ irad saray kabyangay boleg nen Aaron a kabyangan ira na boleg nen Coat a say sengeg to et si Levi. Sikara so ononan naitday betang.

¹¹ Niiter ed sikara so siudad na Arba (si Arba so ama nen Anak), a tatawagen natan na Hebron, diad nipokdul a dalin na Juda; niiter met ed sikara so dalin a panagpastolan ed kaliber-liber to.

¹² Balet saray kaalogan ed siudad tan pati saray baley to et niiter la ran kayaryan nen Caleb a lakin anak nen Jefone.

¹³ Likud ed Hebron (sakey ed saray siudad a salimbengan), saray onggendan a siudad et nipabetang ira ed saray kabyangay boleg nen Aaron a pari: Libna,

¹⁴ Jatir, Estemoa,

¹⁵ Holon, Dibir,

¹⁶ Ayin, Juta, tan Bet-semes a pati saray dalin a panagpastolan da; siamiran siudad iran amin a nanlapud rad tribu di Juda tan Simeon.

¹⁷ Manlapud dalin na Benjamin niiter ed sikara so apatiran siudad: Gabaon, Geba,

¹⁸ Anatot, tan Almon, a pati saray dalin a panagpastolan da.

¹⁹ Labintalon amin a siudad a pati saray pastolan dan dalin, so niiter ed saray papari a kabyangan na boleg nen Aaron.

²⁰ Saray arum a pamilyay Levita a kabyangan ira na boleg nen Coat et apabetangan ira na pigaran siudad ya ataksing ed dalin na Efraim.

²¹ Niiter ed sikara so apatiran siudad: Sikem tan saray dalin a panagpastolan to ed kapokdulan a dalin na Efraim (sakey ed saray siudad a salimbengan), Gezer,

²² Kibzaim, tan Bet-horon, a pati saray dalin a panagpastolan da.

²³ Manlapud dalin na Dan niiter ed sikara so apatiran siudad: Elteke, Gibeton,

²⁴ Ayalon, tan Gat-rimon, a pati saray dalin a panagpastolan da.

²⁵ Manlapud dalin na kapalduay Manases niiter ed sikara so duaran siudad: Taanac, tan Gat-rimon, a pati saray dalin a panagpastolan da.

²⁶ Akaawat ira yan pamilya ed boleg nen Coat na samploran siudad a pati saray dalin a panagpastolan da.

²⁷ Say sananey a grupoy pamilya na saray Levita a kabyangan iray boleg nen Gerson et akaawat ira na duaran siudad ya ataksing ed dalin na kapalduay Manases: Golan na Basan (sakey ed saray siudad a salimbengan) tan Be-estera, a pati saray dalin a panagpastolan da.

²⁸ Manlapud dalin na Isacar naawat da so apatiran siudad: Cision, Daberat,

²⁹ Jarmut, tan En-ganim, a pati saray dalin a panagpastolan da.

³⁰ Manlapud dalin na Aser naawat da so apatiran siudad: Misal, Abdon,

³¹ Helcat, tan Rehob, a pati saray dalin a panagpastolan da.

³² Manlapud dalin na Neftali naawat da so taloran siudad: Kedes na Galilea, a pati saray dalin a panagpastolan to (sakey ed saray siudad a salimbengan), Hamot-dor, tan Cartan a pati saray dalin a panagpastolan da.

³³ Akaawat ira yan nandoroman pamilya na boleg nen Gerson na labintalon siudad, pati saray dalin a panagpastolan da.

³⁴ Saray arum a pamilya da ray Levita a kabyangan iray boleg nen Merari et naawat da so apatiran siudad ya ataksing ed dalin na Zabulon: Jocneam, Carta,

³⁵ Dimna, tan Nahalal a pati saray dalin a panagpastolan da.

³⁶ Manlapud dalin na Ruben naawat da so apatiran siudad: Bezer, Jahaz,

³⁷ Kedemot, tan Mefaat, a pati saray dalin a panagpastolan da.

³⁸ Manlapud tribu nen Gad naawat da so apatiran siudad: Ramot na Galaad, a pati saray dalin a panagpastolan to (sakey ed saray siudad a salimbengan), Mahanaim,

³⁹ Hesbon, tan Jazer a pati saray dalin a panagpastolan da.

⁴⁰ Kanyan nipabetang ed boleg nen Merari so labinduan siudad.

^41-42 Manlapud dalin na saray totood Israel niiter ed saray Levita so apataplo tan walon siudad, pati saray dalin a panagpastolan da.

Kinayaryan na Israel so Dalin na Canaan

⁴³ Kanyan say Katawan inter tod Israel so intiron dalin a sinambaan ton iter ed saray lalaki ra. Nen akayaryan da lay dalin, nanayam irad man.

⁴⁴ Say Katawan impanari to so kareenan ed intiron dalin onung na insipan tod saray lalaki ra. Anggapoy anggan sakey ed amin a kalaban da ray Israelita so analod sikara, ta impanalo ra na Katawan.

⁴⁵ Sinumpal na Katawan iray amin ya insipan tod saray totood Israel.