Josue 17 - Maung a Balita Biblia

Say Kapaldua na Manases a Walad Sagur

¹ Say sakey a parti na dalin ed sagur na Jordan et nipabetang ed saray pigaran pamilyan say sengeg da et si Manases a pangulowan a lakin anak nen Jose. Si Makir ya ama nen Galaad et sankapangulowanan a lakin anak nen Manases tan sakey a sondalo, kanyan nipabetang ed sikato so Galaad tan Basan a walad bokig na Jordan.

² Say dalin a walad bandad sagur na Jordan et nipabetang ed kindi Abiezer, Helec, Asriel, Sikem, Hefer, tan Semida a sikaray arum a kabyangay boleg nen Manases a lakin nen Jose tan sikaray pangulo na pamilya ra.

³ Si Zelofehad, a lakin anak nen Hefer a lakin anak nen Galaad a lakin anak nen Makir a lakin anak nen Manases, et anggapoy anak ton laki no ag ta bibii labat. Say kangaranan na anak to et saraya: Mala, Noa, Hogla, Milca, tan Tirza.

⁴ Linma rad kinen Eleazar a pari tan si Josue a lakin anak nen Nun tan diad saray pangulo, tan kuanda, Say Katawan ingganggan toy Moises ya itdan to kami tan saray lalakin kakanayon mi na sakey a parti na dalin a kayaryanen mi. Kanyan onung ed ganggan na Katawan, naitdan ira na dalin a pati saray kakanayon da.

⁵ Sikato yay makasengeg a si Manases et akaawat na samploran betang a kaaruman na Galaad tan Basan diad nibokig na Jordan

⁶ bangta saray bibii tan lalakin kabyangan na pamilya to et apabetangan ira na dalin. Say dalin na Galaad et nipabetang ed saray arum a kabyangan na boleg nen Manases.

⁷ Say dalin nen Manases et onggapod Aser ya anggad Micmetat a bokig na Sikem. Ontuloy ed abalaten so ketegan tan nasakop to ray totood En-tapua.

⁸ Say dalin a kaliber-liber na Tapua et kayaryan nen Manases, balet say baleg na Tapua a walad ketegan et kayaryan na saray kabyangay boleg nen Efraim.

⁹ Insan mampaleksab ed kolus na Cana so ketegan. Saray siudad ed abalaten na kolus et kayaryan nen Efraim, anggaman a sakop ira na dalin nen Manases. Ontuloy so ketegan na Manases ed nibaybay a dapag na kolus tan mansamput ed Dayat na Mediteraneo.

¹⁰ Walad bandad abalaten so Efraim, tan say Manases walad bandad baybay tan say ketegan dad sagur et say dayat na Mediteraneo. Say Aser et walad bandad baybay a sagur, tan say Isacar walad bandad baybay a bokig.

¹¹ Diad loob na dalin di Isacar tan Aser, kayaryan nen Manases so Bet-sean tan Ibleam, a pati saray baley a kaliber-liber da, tan ontan met ed Dor (samay walad gilig na dayat), En-dor, Taanac, Megido, tan saray baley a kaliber-liber da.

¹² Balet saray totoo na Manases ag da apataynan iray totoon manaayam ed sarayan siudad, kanyan siansian manaayam nid man iray Cananeo.

¹³ Anggaman a binmiskeg iray Israelita, ag da pinataynan iray amin a Cananeo, balet pinasoot da ran nankimey para sikara.

Akikerew ni na Arum a Dalin so Efraim tan say Kapalduay Manases

¹⁴ Saray kabyangay boleg nen Jose kuandad kinen Josue, Akin et initdan mo kami na sakey labat a parti na dalin? Dakerakel kami lapud binindisionan kami na Katawan?

¹⁵ Inmebat si Josue, No dakerakel kayo tan meleg a para sikayo so kapokdulan a pasen na Efraim, laka yod katakelan tan manlinis kayod man na dalin diad kawalaan da ray Perezeo tan saray Refaim.

¹⁶ Inmebat ira, Say kapokdulan a pasen et kulang a para sikami, balet saray Cananeon manaayam ed saray patar et wala ray balatyang a karwahi ra, salanti saray manaayam ed Bet-sean, a pati saray baley ed kaliber-liber to tan saray manaayam ed Patar na Jezeel.

¹⁷ Inkuanen Josue ed tribu nen Efraim tan kapalduay tribu nen Manases, Dakerakel kayon tua tan mabisbiskeg kayo. Aliwan saksakey a betang sirin so awaten yo.

¹⁸ Niiter a kayaryan yo so kapokdulan a pasen. Anggaman a matakel, nalinisan yo tan nakaryaryan yo manlapud sakey a samput ya anggad sananey a samput. No nipaakar ed saray Cananeo, napataynan yo ra anggaman a wala ray balatyang a karwahi ra tan mabiskeg iran totoo.