Josue 14 - Maung a Balita Biblia

Say Inkaapag na Dalin a Nisagur na Jordan

¹ Say onggendan et say inkaapag na dalin na Canaan a nisagur na Ilog na Jordan. Saray angapag na dalin ed saray katoowan et si Eleazar a pari, si Josue a lakin anak nen Nun, tan saray pangulo da ray pamilya na saray tribu na Israel.

² Onung na ingganggan na Katawan ed kinen Moises, niiter so betang na balang sakey a tribu ed saray siamira tan kapalduan tribu na Israel diad panamegley na pampapalaranan.

^3-4 Impabetang la nen Moises so dalin a nibokig na Jordan ed saray duara tan kapalduan tribu. (Saray kabyangay boleg nen Jose et nagmaliw a duaran tribu: Manases tan Efraim.) Balet si Moises ag to initdan na dalin iray Levita, likud labat ed saray siudad a panayaman da tan saray kaalogan a pampastolan dad saray baka tan saray karniro ra.

⁵ Inapag-apag na saray totood Israel so dalin onung na ingganggan na Katawan ed kinen Moises.

Niiter ed kinen Caleb so Hebron

⁶ Aminsan ya agew wala ray totoon kabyangan na tribu nen Juda a linma rad kinen Josue diad Gilgal. Say sakey ed sikara a si Caleb, say lakin anak nen Jefone a Cenizeo, kuantod kinen Josue, Amtam so imbaga na Katawan diad Cades-barnea ed kinen Moises a too na Dios nipaakar ed sika tan siak.

⁷ Apataploy taon ko nen si Moises ya aripen na Katawan et imbaki to ak manlapud Cades-barnea a manispia ed sayan dalin. Tuan balita so impawil kon imbagad sikato.

⁸ Balet saramay lalakin kaibak a nanispia pinatakot da ray totoo. Siak balet matoor kon inonur so Katawan a Dios ko.

⁹ Lapud saman a ginawak, insipan nen Moises ed siak ya andi-saew a saray anak ko tan siak et awaten min kayaryan so dalin a panakaran ko.

¹⁰ Balet natan, nengneng mo. Apataplo tan limay taon la so linmabas nanlapu lad samay panaon na impangibagay Katawan na sayan sipan ed kinen Moises. Agawa ya nen ombebeltang ed kalawakan so Israel, et say Katawan pambibilayen to ak ni ya anggad natan, onung na insipan to. Nengneng mo ak! Walomplo tan limay taon ko la

¹¹ et mabiskeg ak ni a singa samay panaon na impangibakid siak nen Moises. Mabisbiskeg ak ni a mibakal odino manggawa na antokaman.

¹² Natan sirin, iter mod siak so kapokdulan a pasen ya insipan ed siak na Katawan diad samay agew na impangibaga miy anengneng mid impanispia mi. Imbaga mid sika a diad saman a baleg tan apaliberan na padir a siudad et wadman iray Anakim a poli ra na alan. Angangko olupen ak na Katawan et napataynan ko ra, onung na imbagay Katawan.

¹³ Binindisionan nen Josue si Caleb a lakin anak nen Jefone tan inter tod sikato so siudad na Hebron.

¹⁴ Anggad natan kayaryan ni ya na saray kabyangay boleg nen Caleb a lakin anak nen Jefone a Cenizeo so Hebron, lapud matoor ton inonur so Katawan a Dios na Israel.

¹⁵ Kasakbayan to ya say Hebron et tatawagen na siudad na Arba. (Si Arba et sankabiskegan nen saman ed saray Anakim.) Wala natan so kareenan ed sayan dalin.