Josue 10 - Maung a Balita Biblia

Atalo iray Amorreo

¹ Si Adonizedek ya ari na Jerusalem nadngelan to a si Josue et dinakep tan sigput ton dineral so siudad na Ai tan pinatey toy ari to a singa ginawa to ed Jerico tan say ari to. Nadngelan to met a saray totood Gabaon akikaaro rad saray Israelita tan manaayam irad kawalaan da.

² Mapalaloy inkapagaan na saray totood Jerusalem lapud say Gabaon et singa kabaleg na saray arum a siudad a walay ari ra; baleg nen say Ai, tan marunong a bumabakal iray totoo to.

³ Kanyan si Adonizedek impaikuantod kindi Ari Hoham na Hebron, Ari Piram na Jarmut, Ari Jafia na Lakis, tan Ari Debir na Eglon:

⁴ Gali dia ta tulongan yo ak ya ondogpad Gabaon, lapud akikaaro ray totoo to ed kinen Josue tan saray Israelita.

⁵ Nanmomoyung ira yan limaran arari da ray Amorreo a salanti saray arari ed Jerusalem, Hebron, Jarmut, Lakis, tan Eglon, insan da niliktub so Gabaon, tan dinogpaan da.

⁶ Saray taga Gabaon impaikuandad kinen Josue a walad kampod Gilgal: Ag mo kami kari ikakaindan! Gala dian tampol ta tulongan mo kami! Amin da ray arari ed nipokdul iran pasen et nanmomoyung ira tan dinogpaan da kami!

⁷ Kanyan nampikal ed Gilgal ira di Josue tan amin a sondalo to a pati saray sankamaungan a bumabakal.

⁸ Inkuan na Katawan ed kinen Josue, Ag kayo ontatakot ed sikara; impanalo ta kayo lad sikara. Anggapod sikaray nayarin onlaban ed sikayo.

⁹ Sanlabin nankurang ira di Josue tan saray sondalo to manlapud Gilgal ya anggad Gabaon, tan biniglaan dan dinogpaan ira may Amorreo.

¹⁰ Say Katawan ginewgew to ray Amorreo nen anengneng da ray sondalo na Israel. Saray Israelita pinapatey dad Gabaon iray Amorreo tan inosilan da rad dalan ed alusadsar na palandey ed Bet-horon; dinogpaan da ra ya anggad Azeka tan Maceda diad abalaten.

¹¹ Nen saray Amorreo et ibabatikan da ra may Israelitan sondalo, impepelag na Katawan ed sikara iray ankakabaleg ya oran a kristal ya anggad Azeka. Dakel niy apatey na oran a kristal nen say pinapatey da ray Israelita.

¹² Diad saman agew ya impanalo na Katawan iray Israelita ed saray Amorreo, akisalitay Josue ed Katawan. Diad arap na saray Israelita inkuanto, Agew, tonda kad petek na Gabaon; Bulan, tonda kad petek na Patar na Ayalon.

¹³ Tinmondan tua so agew tan say bulan ya anggad atalo na saray Israelita iray kalaban da. Nisulat ya ed Libro nen Jaser. Tinmondad pegley na tawen tan ag sinmelek a sanagew.

¹⁴ Anggapon balut nen saman ya anggad natan, so singa sayan agew a tinoluk na Katawan so sakey a too. Tinulongan na Katawan ya akibakal so Israel!

¹⁵ Kayari to yan bakal, amawil lad kampod Gilgal si Josue tan saray sondalo to.

Adakep nen Josue iray Limaran Amorreon Arari

¹⁶ Saraman balet so limaran Amorreon arari akabatik ira tan inmamut ira ed ongib na Maceda.

¹⁷ Walay akalmod sikara tan nibagad kinen Josue so pasen a panaamutan da.

¹⁸ Inkuanto, Mangitolin kayo na ankakabaleg a bato ed sangab na ongib. Mangyan kayo na pigaran guardia,

¹⁹ balet ag kayod man manaayam. Ituloy yon osilan iray kalaban tan dogpaan yo rad bandad beneg; ag yo aabuloyan a makasabi rad siudad da! Say Dios a Katawan impanalo to kayod sikara.

²⁰ Pinapatey ira nen Josue tan saray totood Israel; balet wala ray akaloob ed dalem na saray padir na siudad da, kanyan ag ira apatey.

²¹ Insan amin da ray totoo nen Josue pinmawil irad sikato diad kampod Maceda ya anggapoy agawad sikara. Anggapod saman a dalin so akakpel a nansalita na sumpad saray Israelita.

²² Insan inkuanen Josue, Lokasan yo may ongib tan iyakar yo dia ra may arari.

²³ Kanyan nilokasan da may ongib, tan impaway da ra may arari ed Jerusalem, Hebron, Jarmut, Lakis, tan Eglon, insan da ra

²⁴ inyakar ed kinen Josue. Tinawag ton amin iray lalaki ed Israel tan ingganggan to ya onsingger ed sikato ira may opisyal ya akilad sikato tan iyan da ray sali ra ed kabeklewan na saramay arari. Ginawa ra so nibagad sikara.

²⁵ Insan inkuanen Josue ed saramay opisyal to, Ag kayo natatakot o nabebetelay linawa. Mampabiskeg kayoy linawa tan manmatalek kayo lapud onya so gawaen na Katawan ed amin da ray kalaban yo.

²⁶ Insan pinatey nen Josue ira may arari tan insabit tod limaran kiew iray bangkay da ya anggad labi.

²⁷ Diad inselek na agew impaiyepas nen Josue ira may bangkay tan impaibontuk to rad samay ongib ya inamutan da ra may arari. Ankakabaleg a bato so insara da ed sangab na samay ongib, et wadman ni ra ya anggad natan.

Binmaleg so Adakep nen Josue a Dalin da ray Amorreo

²⁸ Diad saman ya agew dinogpaan tan adakep nen Josue so Maceda tan say ari to. Pinapatey to ray amin a totoon walad siudad; anggapoy atilak a mabilay. Ginawa tod ari na Maceda so singa samay ginawa tod ari na Jerico.

²⁹ Manlapud man ed Maceda si Josue tan saray sondalo to linma rad Libna tan dinogpaan da.

³⁰ Impanalo met na Katawan iray Israelita ed sayan siudad tan say ari to. Anggapoy inkera ra ya anggan sakey, no ag ta pinatey da ray amin a totood man. Ginawa, rad ari na Libna so singa samay ginawa ra ed ari na Jerico.

³¹ Manlapud Libna si Josue tan saray sondalo to linma rad Lakis, niliktub da insan da dinogpaan.

³² Impanalo na Katawan iray Israelita diad kumadwan agew na impibakal da ed Lakis. Singa samay ginawa ra ed Libna, anggapoy inkera ra, no ag ta pinatey da ray amin a totood man.

³³ Si Ari Joram na Gezer dinmagon ontulong ed Lakis, balet tinalo nen Josue tan saray sondalo to tan anggapoy intilak dad sikaran mabilay.

³⁴ Manlapud Lakis si Josue tan saray sondalo to linma rad Eglon, niliktub da insan da dinogpaan.

³⁵ Adakep da ed saman lamlamang ya agew tan pinatey day balang sakey a tood man, a singa ginawa ra ed Lakis.

³⁶ Manlapud Eglon si Josue tan saray sondalo to tinmatdang irad kapokdulan tan dinogpaan day Hebron,

³⁷ et adakep da. Pinatey day ari to tan amin iray totood siudad, a pati saray totood kaliber-liber ton baley. Sigput a dineral nen Josue so siudad, a singa ginawa tod Eglon. Anggapod may atilak a mabilay.

³⁸ Insan si Josue tan saray sondalo to pinmoliktar irad Debir, tan dinogpaan da.

³⁹ Adakep da, pati say ari to tan saray kaliber-liber ton baley. Pinatey day balang too ed saman a pasen. Ginawa nen Josue ed Debir tan say ari to so singa ginawa tod Hebron tan diad Libna tan say ari to.

⁴⁰ Adakep nen Josue so intiron dalin. Tinalo to ray arari ed kapokdulan a pasen, diad nibokig a palasur, tan diad nisagur ya alusadsar, ontan met ed ampetang a pasen diad abalaten. Anggapoy intilak ton mabilay; pinapatey ton amin iray totoo ed sarayan pasen. Sikato ya so ingganggan na Katawan a Dios na Israel.

⁴¹ Tinalo nen Josue ira yan amin a pasen manlapud Cades-barnea diad abalaten ya anggad Gaza ed gilig na dayat, pati intiron dalin na Gosen, tan anggad Gabaon diad baybay.

⁴² Tinalo nen Josue ira yan amin ya arari tan saray nanarian da diad aminpinsan ya inliber ton nandodogpa, lapud kaiba na Israel ya akibakal so Katawan a Dios to.

⁴³ Kayari to ya, pinmawil ed kampod Gilgal si Josue tan saray sondalo to.