Jonas 3 - Maung a Balita Biblia

Inonur nen Jonas so Katawan

¹ Akitongtong lamet so Katawan ed kinen Jonas.

² Inkuanto, Lakad Ninive, say baleg a siudad, ta ibagam ed saray totood man so sinalitak ed sika.

³ Inmonur si Jonas ed Katawan kanyan linmad Ninive, say siudad a diad gaway kabaleg to et taloy agew ya akaren no beltangen.

⁴ Ginapwan nen Jonas so nanakar ed siudad tan kalabas na sanagew ya impanakar to, imbawag to, Naderal so Ninive kalabas na apataplon agew manlapud natan!

⁵ Sinisia na saray totood Ninive so impaibalita na Dios. Kanyan nampapaknaan da a manayuno so balang sakey ed sikara, tan amin a totoo, manlapud sankatageyan ya anggad sankaabebaay kipapasen, et nansolung ira na sako a pangipanengneng da a nagbabawi ra.

⁶ Nen nadngelan na ari ed Ninive so nipaakar ed saya, inmepas a nanlapud trono to, nilakseb toy kawes to, nansolung na sako, tan nanirung ed dapul.

⁷ Impaibawag tod saray totood Ninive: Sikato yay ganggan na ari tan saray opisyal to: Anggapoy siopaman a mangan; amin a totoo, amin a baka, tan amin a karniro et nisebel ed sikaran mangan odino oninom.

⁸ Amin a too tan amin ya ayayep et nepeg a mansolung na sako. Balang too nepeg a benegan to la ray amin a maoges a kagagawa to tan amin a kaogsan a gagawaen to.

⁹ Angangko mangoman na kanunotan so Dios; pakepaen to angangkoy pasnuk to, et ag itayo ompatey!

¹⁰ Anengneng na Dios so ginawa ra; anengneng ton imbebeneg da ray maoges a kagagawa ra. Kanyan angoman na kanunotan, et ag to la intuloy imay imbaga ton panusa tod sikara.