Joel 1 - Maung a Balita Biblia

¹ Sikato yay salita na Katawan a sinmabid kinen Joel a lakin anak nen Petuel.

Pannangis na saray Totoo lapud Kaderal na saray Tanaman

² Dengel kayo, sikayon mamatakken a totoo; dengel kayo, sikayon amin a totood Juda. Walay bengatlan singa onyan agawa diad panaon yo odino diad panaon da ray lalaki yo?

³ Ibaga yod saray anak yo so nipaakar ed sayan agawa; ibaga da met ed satan ed saray anak da, insan saratan ya anak da ibaga da met ed ontombuk a kailalakan.

⁴ Nantotombukan a dinmadapod saray tanaman ed kaalogan iray pigaran grupoy dorun; inooput na arum a grupo iray tanaman a kera-keray sakey a grupo.

⁵ Bangon tan mannangis kayo, sikayon buanges; akis kayo, sikayon mainom na alak; aderal-deral la ray ubas a panggawaay balon alak.

⁶ Dinogpaan na amayamay a dorun so dalin tayo; makapanyari ra tan ag ira nabilang; matdem a singa tarem na ngipey lion so ngipen da.

⁷ Dinederal da ray sengeg na ubas tayo tan nginingitngit da ray kiew tayon igos. Ineekal dan impepelag iray obak ya anggad ampoti-poti ray sanga.

⁸ Akis kayon singa sakey a marikit a nanangisan toy impatey na nubio to.

⁹ Anggapo lay trigo odino alak ya ibagat ed Timplo; maermen iray papari lapud anggapoy nibagat da ed Katawan.

¹⁰ Anggapoy tanaman ed kaalogan; maermen so dalin lapud aderal-deral iray trigo, amagaan iray sengeg na ubas, tan nalnes iray kiew na oliba.

¹¹ Manermen kayo, sikayon dumaralos; akis kayo, sikayon managasikasoy kaubasan, lapud aderal la ray trigo, sibada, on, aderal lan amiy tanaman ed kaalogan.

¹² Nalnes iray sengeg na ubas tan saray kiew ya igos; nalnes ya amin iray kiew a mambunga, insan ira inaatey. Naandi lay liket da ray totoo.

¹³ Mankawes kayoy sako tan mannangis kayo, sikayo ran paparin manlilingkur ed altar! Laka yod Timplo tan manermen kayon sanlabi! Anggapoy trigo odino alak a nibagat ed Dios yo.

¹⁴ Iganggan yon nagawa so sakey a panayuno; pantitipon yo ray totoo. Pantitipon yo ray pangulo tan amin da ray totood Juda. Pantitipon yo ra ed Timplo na Katawan a Dios yo tan tawag kayod sikato!

¹⁵ Asingger lay agew na KATAWAN, say agew ya iyakar na Makapanyarin-amin so deral. Makapataktakot yan agew!

¹⁶ Legan a nadederal iray tanaman mid kaalogan mambanbantay kami labat ya anggapoy nagawaan. Anggapo lay liket ed Timplo na Dios tayo.

¹⁷ Inaatey ed kinmelang a dalin iray bokel na tanaman. Anggapoy trigon isempen, kanyan aderal-deral la ray kamalir.

¹⁸ Manngakngak a tangaw-tangaw iray baka, lapud anggapoy pampastolan ed sikara; maniiirap met iray amayamay a karniro.

¹⁹ Ontatawag ak ed sika, O Katawan, lapud amagaan iray pastolan tan saray kakiewan, singa ra apoolan.

²⁰ Oneeyey ed sika iray ayayep ed katakelan, lapud nakatan iray kolus.