Jeremias 8 - Maung a Balita Biblia

¹ Diad satan a panaon naekal ed saray lobuk so pokel da ray arari, saray opisyal na Juda, saray papari, saray propita, tan saray arum a totoon nanaayam ed Jerusalem.

² Natipon tan nipompon ira komun, balet magmaliw iran singa saray taiy ayayep ya ataytayak ed dalin. Nitayak irad arap na agew, bulan, tan saray bitewen ya inaro tan nanlingkuran na sarayan totoo; angipanonan tan angigalangan da ra.

³ Saray makapaliis ed patey a totood sayan maoges a bansa a manaayam irad saray lugar ya angikaykayatan kod sikara et lablabayen da niy ompatey nen say mambilay. Siak, say Katawan a Makapanyarin-amin so nansalita.

Say Kasalanan tan say Dusa

⁴ Say Katawan imbaga tod siak ya ikuankod saray totoo to iray salita to, Wala tay natumba ya ag ombangon? Wala tay nabalang ya ag ompawil ed nanlapwan to?

⁵ Totook, akin et onaarawi kayod siak tan ag kayo ompawil? Ag kayo oniikban ed saray talintaoy diriyos yo tan ag yo labay so ompawil ed siak.

⁶ Tinmalineng ak a maung, balet aliwan katwaan iray sinalita yo. Anggapoy anggan sakey ed sikayon maermen ed kaogsan to; anggapoy anggan tinmepet, Antoy ginawak a kaogsan? Balang sakey itutuloy toy dilin kabibilay to, singa sakey a kabayon maples ya ombabatik ya onlad bakal.

⁷ Anggan saray gikgik ed liwang amta ra no oras lay kapapawil; saray malapati, saray mangalimpana, tan saray dolakak amta ra no kapigay iyakar dad arum a pasen a panayaman da. Balet, sikayo ran totook, ag yo amta ray ganggan ko a nepeg yo ran onuren.

⁸ Panoy pangibaga yo, Makabat kami; walad sikamiy ganggan na Katawan? Nengneng yo, inoman na saray matilan iskriba iray ganggan.

⁹ Abaingan iray makabat yon totoo; ag da amtay gawaen da tan apatitan ira. Impolisay da ray salitak; anton kakabatan so walad sikara natan?

¹⁰ Kanyan iter kod arum a lalaki so kaasawaan da, tan saray kaalogan da iter ko met ed saray arum ya akankien. Balang sakey, abeba may atagey so kipapasen, mansasaol ed panaanap toy kuarta; anggan saray propita tan saray papari et sasaolen da ray totoo.

¹¹ Gagalgalawen day pananambal dad sugat na saray totook; kuanda, Maung ya amiy kipapasen, anta andi.

¹² Totook, ambaing kayo kasi lapud ginagawa yo ra yan makapaingungot a bengatla? Andi! Anggapon balut so baing yo; ag anggan ombabalangay lupa yo! Kanyan natumba kayo a singa impakatumbay arum; no dusaen ta kayo, samput yo la. Siak, say Katawan, so nansalita.

¹³ Nilabay kon tiponen iray totook, a singa pantitipon na too na naani to; balet singa ra sengeg na ubas ya anggapoy bunga, singa ra sengeg na igos ya anggapoy bunga; amagaan iray anggan bolung da. Kanyan inabuloyan ko ray taga paway na bansa a manakup ed dalin da.

¹⁴ Akin et wadya itayon manyodyorung ya ag onggalaw? tepet na saray totooy Dios. Onla itayo la, ta ombatik itayod saray siudad a pinaliberay padir, tan diman ti la ompatey. Say Katawan a Dios tayo sinintinsiaan to itayon ompatey; initdan to tayo na samal ya inomen, lapud nankasalanan itayod sikato.

¹⁵ Nampilalek itayod kareenan, balet anggapoy naalagar tayo; nanalagartayoy panaon na pakatambal, balet takot lalaingen so sinmabi.

¹⁶ Wala lad siudad na Dan iray kalaban tayo; narerengel tayo so ariba na saray kabayoy kalaban tayo. Manggiwgiw lay intiron bansa no manaringing iray kabayo ra. Sinmabi la ran manderal na dalin tayo tan amin a logan to, manderal na siudad tayo tan saray totoon manaayam.

¹⁷ Mantalaran kayo! kuay Katawan, Ibakik ed sikayo ray oleg, nanditan oleg ya ag ira napaamo. Ketketen da kayo.

Say Ermen nen Jeremias lapud saray Totoo to

¹⁸ Ag napaabig so kaermenan ko; walay sakit ko diad pusok.

¹⁹ Dengel kayo! Diad intiron bansa narerengel koy pambabando na saray totook, Anggapo lad Sion so Katawan? Andi lad man so ari na Sion? Inmebat so Katawan ya ari ra, Akin et impanpasnuk yo ak diad impangigalang yod saray talintaoy diriyos yo tan diad indakmomo yod saray kayaryan yon andi-kakanaan a diriyos na arum a bansa?

²⁰ Inmeyag iray totoo, Linmabas lay tiagew, asumpal lay panagani, balet ag kami ni nilaban.

²¹ Asugat so pusok lapud asugat iray totook. Maneermen ak; sigput a nakalan ak na biskeg na linawa.

²² Anggapo ta lay tambal ed Galaad? Anggapo ta lad may doktor? Akin et ag naabigan iray totood bansak?