Jeremias 7 - Maung a Balita Biblia

Nampulong ed Dalem na Timplo si Jeremias

^1-3 Say Katawan imbaki to ak ed puirta na Timplo, a nila na saray totood Juda ta mangigalang irad Katawan. Imbaga tod siak a manalagey ak diman tan ibawag ko so labay ya ibaga ed sikara na Katawan a Makapanyarin-amin a Dios na Israel: Pasimbalo yoy panagbilay yo tan saray gagawaen yo, pian abuloyan ta kayon mansiansian mambilay dia.

⁴ Tondaan yo lay panagmatalek yod managpalikdon balikas, Arawi kamid kaatapan! Sikato yay Timplo na Katawan, sikato yay Timplo na Katawan, sikato yay Timplo na Katawan!

⁵ Pasimbalo yoy panagbilay yo tan tondaan yo ray gagawaen yo. Matonung komuy panoolup na sakey tan sakey ed sikayo.

⁶ Tondaan yoy panamairap yod saray sangkaili, saray olilan sigput, tan saray balo. Tondaan yoy panagpatey yo diad sayan dalin na saray totoon anggapoy kasalanan. Tondaan yoy panangigalang yod saray arum a diriyos, ta deralen to kayo.

⁷ No sumpalen yo ra ya, abuloyan ta kayon manayam ed sayan dalin ya inter kon magnayon a kayaryan na saray lalaki yo.

⁸ Imano yo, andi-kakanaan so panmamatalek yod managpalikdon balikas.

⁹ Mantatakew kayo, mamapatey kayoy totoo, milalawanan kayo, anta nansamba kayo mantitila kayo, mangibabagat kayod Baal, tan mangigagalang kayod saray arum a diriyos ya ag yo ra kabat nen saman.

¹⁰ Gagawaen yo ray makapaingungot ed arap ko, insan manalagey kayod imatun ko diad dalem na Timplo tan kuanyo, Arawi kamid kaatapan!

¹¹ Abaloan yo amon amutan na saray tulisan so Timplok? Anengneng koy gagawaen yo.

¹² Laka yod Silo, say inmonan pasen a pinilik a pangigalangan ed siak, tan nengneng yo no antoy ginawak ed sikato lapud saray kaogsan na saray totook ya Israel.

¹³ Ginagawa yo ra yay kasalanan a binitlak. Anggaman ya akisalita ak ed sikayon amimpiga-piga, ag kayo dinmengel. Ag kayo inmebat nen tinawag ta kayo.

¹⁴ Kanyan gawaen kod sayan Timplok a panmamatalkan yo so singa samay ginawak ed Silo. Gawaen kod sayan pasen ya inter kod sikayo tan saray lalaki yo so singa samay ginawak ed Silo.

¹⁵ Paandipaten ta kayod pakanengneng ko a singa samay ginawak ed saray kakanayon yon totood Israel. Siak, say Katawan, so nansalita.

Say Ag Intoluk na saray Totoo

¹⁶ Inkuay Katawan, Jeremias, ag mo ipipikasi ra yan totoo. Ag mo ra itatagleeyan o ikekerewan ed siak, ta ag ta ka dengelen.

¹⁷ Ag mo ta nanenengneng so gagawaen da ed saray siudad na Juda tan saray dalan na Jerusalem?

¹⁸ Saray ogogaw mantitipon ira na kiew ya itotongo, saray totoon baleg a lalaki et mamaparlang ira, tan saray bibii manmamasa ra na gawaen dan kanen a para diosan tatawagen da na Riyna na Tawen. Angisaklang met ira na saray bagat ya iinomen ed saray arum a diriyos, pian napasakitan da ak.

¹⁹ Balet siak kasiy napapasakitan da? Andi, say sikaran dili so papasakitan da, tan ipepelag day sikaran dili ed kababaingan.

²⁰ Kanyan siak, say Katawan a Dios, idapok ed sayan Timplo so ontan lan pasnuk ko. Idapok ed saray totoo, saray ayayep, tan anggan diad saray kakiewan tan saray tanaman. Say pasnuk ko singa pool ya anggapoy makadepdep.

²¹ Totook, akan yo la laingen iray bagat a popoolan, a pati saray bagat a nayarin kanen. Sikato yay ibabagak, siak a Katawan a Makapanyarin-amin a Dios na Israel.

²² Nen impaway kod Egipto iray lalaki yo, anggapoy ingganggan kod sikaran nipaakar ed bagat a popoolan odino antokaman a bagat.

²³ Balet ingganggan kod sikaran onuren da ak, pian siak so magmaliw a Dios da tan sikaray magmaliw a totook. Imbagak ed sikara a mambilay ira onung na ingganggan kod sikara, pian maung so kasumpalan da.

²⁴ Balet ag ira inmonur odino dinmengel. Ingen inonur day imbaga na anawet tan maoges a puso ra, kanyan onmaung ira komun, linmoor lalaingen so kaogsan da.

²⁵ Manlapud samay agew ya impaway ed Egipto na saray lalaki yo ya anggad natan, intutuloy koy angibakid sikayo na saray aripen kon propita.

²⁶ Balet ag kayo dinmengel odino angimano. Ingen, nagmaliw kayon lalon anawet so puso tan lalon mananumpa nen saray lalaki yo.

²⁷ Kanyan, Jeremias, salitaen mo ra yad saray totook, balet ag da ka dengelen; tawagen mo ra, balet ag da ka ebatan.

²⁸ Ibagam ed sikara a say bansa ra et ag onoonur ed siak, say Dios dan Katawan; ag ira makakaaral ed panametek ko. Inatey lay katooran da; ag da la anggan sasalitaen.

Say Maoges a Gawgawa ed Patar na Hinnom

²⁹ Manermen kayo, sikayo ran totood Jerusalem; potut yoy buek yo, insan yo ibantak. Manogtog kayod toktok na kapok-dulan na makapaermen, ta siak, say Katawan, impolisay tan inkaindan ko ra yan totoo a pamapasnukan ko.

³⁰ Nanggawa na sakey a kaogsan iray totoo ed Juda. Inyan dad dalem na Timplok iray karimdimlak a talintaoy diriyos da, kanyan dinotakan da.

³¹ Diad Patar na Hinnom nanggawa ray altar a tatawagey Tofet, a diay nampopoolan dad saray imbabagat dan anak da. Ag ko ingganggan a gawaen da ya odino sinmebang ed kanunotan koy onya.

³² Kanyan, onsabiy panaon ya ag la natawag na Tofet, odino Patar na Hinnom, no ag ingen natawag na Patar na Panagpateyan. Ipompon dad man iray bangkay na totoo lapud anggapo lay nakeraan a pasen a pangipomponan.

³³ Magmaliw a kanen na saray manok tan saray ayayep ed katakelan iray bangkay, tan anggapoy manibwak a manaktakot ed sikara.

³⁴ Magmaliw a kabueran so dalin. Pansamputen ko ray tanul na liket tan gayaga diad saray siudad na Juda tan diad saray dalan na Jerusalem tan saray maliket a tanul na bansal.