Jeremias 47 - Maung a Balita Biblia

Say Sinalita na Katawan Nipaakar ed saray Filisteo

¹ Kasakbayan a dinogpaan na ari na Egipto so Gaza, akisalitay Katawan ed siak nipaakar ed saray Filisteo.

² Inkuanto: Nengneng yo! Onaatagey so danum ed baybay, tan maples ya onagos a singa ilog no delap. Delapen toy dalin tan amin a logan to, saray siudad tan saray totoon manaayam diman. Saray totoo oneyag iran onkerew na tulong; onakis na ampaipait ya amin iray katoowan.

³ Narengel da ray kutdang na saray kabayo, say pampanaspas na saray karwahi, say tanul na pantetlek da ray dalig. Ag la pawilen na saray ama iray anak da; laoylaoy iray taklay da.

⁴ Sinmabi lay oras na paneral ed Filistia, say oras na pamatonda ed amin a nakdaan a tulong a manlapud Tiro tan Sidon. Siak, say Katawan, deralen ko ray Filisteo, amin da ray nanlapud saray gilig na Creta.

⁵ Sinmabiy baleg a kaermenan ed saray totood Gaza, tan ag oneseesel iray totood Ascalon. Kapigan ontonda so panermen na saray arum a Filisteo?

⁶ Oneeyag kayo, Ispada na Katawan! Kapigan ontonda so pantipas mo? Pawil ka lad kaluban mo, manayam ka lad tan a mampainawa!

⁷ Balet panoy pampainawa to, anta initdan koy gawaen ton kimey? Ingganggan kon dogpaan toy Ascalon tan saray totoon manaayam ed gilig na dayat.