Jeremias 32 - Maung a Balita Biblia

Analiw na Alog si Jeremias

¹ Akisalitay Katawan ed siak nen kumaplon taon na panaari nen Sedekias ed Juda, tan kumalabinwalon taon na panaari nen Nabucodonosor ed Babilonia.

² Diad saman a panaon, dodogpaan na saray sondalo na ari na Babilonia so Jerusalem, tan asaraan ak ed patio na palasioy ari.

³ Impriso ak diman nen Ari Sedekias tan inakusa to ak ya imbawag kon say Katawan kuanto, Ipadakep ko yan siudad ed ari na Babilonia,

⁴ tan ag makabatik si Ari Sedekias. Niawat ed ari na Babilonia; napilupaan to tan napitongtongan ton dili.

⁵ Niakar ed Babilonia si Sedekias, tan manayam diman ya anggad arapen kon tulongan. Anggano mibakal ed saray tagan Babilonia, ag manalo. Siak, say Katawan, so nansalita.

⁶ Imbagad siak na Katawan

⁷ a si Hanamel a lakin anak nen pangamaen kon Sallum et onsabi a kerewen tod siak a saliwen koy alog to ed Anatot a sakop na dalin na Benjamin, ta siak so sankaasinggeran a kanayon to, tan walay kanepegan kon manaliw.

⁸ Insan, onung na imbagay Katawan, linmad siak si kapinsan kon Hanamel diad patio na palasioy ari tan kinerew tod siak, Saliw mo pa la may alog ko ed Anatot a sakop na dalin na Benjamin. Sikay sankaasinggeran a kanayon ko, tan walay kanepegan mon manaliw tan mangayaryan ed saman ya alog. Saliw mo pa la. Akabatan ko lad saman ya ingganggan ak na Katawan a gawaen ko ya.

⁹ Kanyan sinaliw kod kinen Hanamel imay alog tan imbilang kod sikatoy kuarta; labinpiton pilak ya amin so bili to.

¹⁰ Pinirmaan tan tinimbrian koy kasulatan, impatasian ko, tan inalay belat na kuarta ed simbangan.

¹¹ Insan ko inala ray kupia na saliwansay atimbrian a kupia a logan toy paknaan tan saray nepeg a gawaen, tan say lokas a kupia.

¹² Insan diad arap nen Hanamel, saray tasi a nampirmad kasulatay saliwan, tan amin da ray Judion manyodyorung ed patio na palasio, inyawat ko ra may kupia ed kinen Baruc a lakin anak nen Nerias tan apo nen Maasias.

¹³ Diad arap dan amin inkuankod kinen Baruc,

¹⁴ Say Katawan a Makapanyarin-amin, say Dios na Israel, et ingganggan to ka ya alaen mo ra yan kasulatan, say atimbrian a saliwan tan say lokas a kupia, insan mo ra iyan ed dalem na pasig, pian ag naderal ya anggan pigay taon.

¹⁵ Imbaga na Katawan a Makapanyarin-amin, say Dios na Israel, a nasaliw lamet ed sayan dalin iray kaabungan, kaalogan, tan saray kaubasan.

Say Pikakasi nen Jeremias

¹⁶ Kayarik ya inter imay kasulatay saliwan ed kinen Baruc nampikasi ak,

¹⁷ Katawan a Dios, lapud baleg a pakayarim tan biskeg mo, ginawam so tawen tan dalin; mainomay mon gawaey antokaman a bengatla.

¹⁸ Impanengneng moy ag mangoman a panangarom ed saray nilibon totoo, balet dudusaen mo met iray totoo lapud saray kasalanan da ray atateng da. Matalonggaring tan makapanyari kan Dios; Yahweh a Makapanyarin-amin so ngaran mo.

¹⁹ Manggagawa ka ray planon napnoy kakabatan tan saray matalonggaring a bengatla; sankanengneng mo ray amin a kabibilay na saray totoo, tan tutumangan mo ra onung na gawgawa ra.

²⁰ Nanggawa ka na saray milagro tan pakelaw ed dalin na Egipto. Itutuloy mo ra yan gagawaen ya anggad sarayan agew, diad Israel tan diad saray arum a bansa, kanyan anggan iner a pasen kabat ka na saray totoo.

²¹ Diad panamegley na saray milagro tan pakelaw ya anaktakot ed saray kalaban mi, inkanam so pakayarim tan biskeg mo diad impangipaway mod Egipto na saray totood Israel.

²² Inter mod sikara yan mayaman tan mataban dalin, onung na insipan mod saray lalaki ra.

²³ Balet nen akakar irad sayan dalin tan kinayaryan da, ag da inonur iray ganggan mo odino nambilay onung ed bangat mo; ag da sinumpal so antokaman a pagagawam ed sikara. Sikato yay makasengeg no akin et inyakar mod sikara yan amin a deral.

²⁴ Saray taga Babilonia nanggagawa rad kaliber-liber na siudad na saray bunton a looban dan manakep, tan ondodogpa ra. Lapud bakal, eras, tan salot napelag ed lima ra so siudad. Katawan, nanengneng mo a tinmuan amin iray imbagam.

²⁵ Balet, Katawan a Dios, sikay angiganggan ed siak a saliwen ko may alog diad arap da ray tasi, anggaman a ngalngali la nadakep na saray taga Babilonia so siudad.

²⁶ Insan inkuan na Katawan ed siak,

²⁷ Siak so Katawan, say Dios na amin a katoowan. Anggapoy antokaman a mairap ed siak.

²⁸ Kanyan sirin, iter ko yan siudad ed Ari Nabucodonosor na Babilonia tan saray sondalo to, tan dakepen da,

²⁹ tan poolan da. Poolan da ray pati abung a nampopoolan na saray totoo na insinson bagat ed kinen Baal diad saray toktok na kaabungan tan nankakalboan da na alak a bagat ed saray diriyos. Diad sarayan abung saray totoo impanpasnuk da ak.

³⁰ Manlapu lad inggapoy awaran na saray totood Israel tan saray totood Juda, kaogsan labat so ginagawa ra tan impanpasnuk da ak lapud saray ginagawa ra.

³¹ Impanpasnuk to ak na mapalalo yan siudad nanlapu lad agew na inkipaalagey to. Ginetmak lan paandipaten,

³² lapud amin a kaogsan a ginagawa da ray totood Juda tan Jerusalem, pati saray arari tan saray pangulo ra, saray papari ra tan saray propita ra.

³³ Imbeneg da ak; anggaman ya intutuloy koy pambangat ed sikara, ag ira ondengel tan makaaral.

³⁴ Inyan da ni ingen ed dalem na Timplo a nipaalagey ed ngaran ko iray talintaon kabosul ko tan dinotakan day Timplo.

³⁵ Nanggagawa ra na saray altar a para Baal diad Patar na Hinnom, a pangibagatan dad dios a Moloc na saray anak dan lalaki tan bibii. Ag ko ingganggan ed sikara a gawaen day onya, tan ag anggan sinmebang ed kanunotan ko a gawaen da man a makapaingungot a bengatla, pian pankasalananen da ray totood Juda.

Say Sipan a Walay Ilalo

³⁶ Say Katawan a Dios na Israel kuantod siak, Jeremias, ibabaga na saray totoo a lapud bakal, eras, tan salot napelag yan siudad ed lima na ari na Babilonia. Balet dengel mo niy nepeg kon ibaga.

³⁷ Saray totoon inkaykayat kod saray bansa lapud petang na olok, pasnuk, tan sanuk kod sikara et tiponen ko ra, insan ipawil ko rad sayan pasen tan panayamen ko ra dian arawid kaatapan.

³⁸ Diad satan magmaliw iran totook, tan siak so Dios da.

³⁹ Itdan ko ray saksakey a getmad bilay: say pamagalang da lawas ed siak a pankaabigan da tan saray kabyangay boleg da.

⁴⁰ Misipanan ak na andi-anggaan ed sikara. Ag ak ontondan manggaway kamaungan ed sikara, tan pagmaliwen ko ran ontakot ed siak diad intiron puso ra, pian ag da ak lan balut benegan.

⁴¹ Panliketan koy panggawak na kamaungan ed sikara, tan pansiansiaen ko ran iletneg ed sayan dalin.

⁴² Onung na impangyakar koy deral ed sarayan totoo, ontan met iter kod sikaray amin a maung a bengatla ya insipan kod sikara.

⁴³ Ibabaga na saray totoo a sayan dalin et magmaliw a kalawakan ya anggapoy too odino ayep a manayam, tan niiter ed saray taga Babilonia. Balet nasaliw lamet iray kaalogan ed sayan dalin.

⁴⁴ Saliwen ira na saray totoo, tan napirmaan iray kasulatan na saliwan, natimbrian ira, tan natasian ira. Nagawa ya ed pasen a sakop na dalin na Benjamin, diad saray bario ed kaliber-liber na Jerusalem, diad saray baley na Juda, tan diad saray baley ed kapokdulan, diad saray alusadsar, tan diad abalaten na Juda. Papawilen kod dalin da iray totoo. Siak, say Katawan, so nansalita.