Jeremias 30 - Maung a Balita Biblia

Saray Sipan na Katawan ed saray Totoo to

¹ Say Katawan a Dios na Israel

² inkuantod siak: Isulat mod sakey a libro iray amin ya imbagak ed sika,

³ ta onsabi lay panaon ya ipawil koy maung a kipapasen da ray totook ed Israel tan Juda. Papawilen ko rad dalin ya inter kod saray lalaki ra, tan kayaryanen da lamet. Siak, say Katawan, so nansalita.

⁴ Say Katawan kuantod saray totood Israel tan Juda,

⁵ Nadngel koy makapataktakot ya eyag, sakey ya eyag a mangiter na takot, aliwan kareenan.

⁶ Tonda kayo natan, ta mannunot kayo! Mananak ta na sakey ya ogaw so laki? Akin sirin et sankanengneng koy balang laki a sankabembenan toy eges to a singa biin mampapasakit? Akin et ampoti-potiy bosaleg na balang sakey a too?

⁷ Onsasabi so sakey a makapataktakot ya agew; anggapoy agew a makapipara ed sikato sikatoy panaon a kagunigon na saray totook, balet nayarian dan agwantaan.

⁸ Say Katawan a Makapanyarin-amin kuanto: No nasabi tan ya agew, poteren koy pakon walad tenger da tan ekalen koy akagolunggolung ed sikara. Ag la rad satan aripenen na saray taga arum a bansa.

⁹ Maglingkur ira ingen ed siak, say Katawan a Dios da, tan diad kabyangay boleg nen David ya iter kon manarid sikara.

¹⁰ Totook, ag kayo natatakot; totood Israel, ag kayo nasesegawan. Iyagel ta kayod saman ya arawin lugar, diad saman a dalin ya akaprisoan yo. Ompawil kayod dalin yo tan manayam kayod man a walay kareenan; niarawi kayod kaatapan, tan anggapoy manaktakot ed sikayo.

¹¹ Laen ta kayon iyagel. Deralen kon amin iray bansan angikayatan kod sikayo, balet ag ta kayo deralen. Ag ko abuloyan ya ag kayo nadusa; balet no dusaen ta kayo, gawaen ko onung ed katonungan. Siak, say Katawan, so nansalita.

¹² Inkuan na Katawan ed saray totoo to, Ag napaabig iray sugat yo; ag la ra onabig.

¹³ Anggapoy mangasikasod sikayo, anggapoy nitambal ed saray sugat yo, anggapo lay ilalon onabig kayo.

¹⁴ Alingwanan kayo la na amin da ray kainarowan mo; ag da ki la labay. Dinogpaan ta kayon singa sakey a kalaban; mapalaloy inkadusa yo, lapud amayamay so kasalanan yo tan mapalaloy kaogsan yo.

¹⁵ Ag kayo manririklamo lapud saray sugat yo; ag kayo la napaabig. Onyay impanusak ed sikayo, lapud amayamay so kasalanan yo tan mapalaloy kaogsan yo.

¹⁶ Balet natan, nabwag ya amin iray mambubuag ed sikayo; naalan priso iray amin a kalaban yo. Napairap ya amin iray mamapairap ed sikayo, nasamsaman ya amin iray manasamsam ed sikayo.

¹⁷ Pagmaliwen kon maung lamet so kipapasen yo; paabigen ko ray sugat yo, anggaman ibabaga na saray kalaban yo, Nibantak so Sion; anggapoy malabay ed sikato. Siak, say Katawan, so nansalita.

¹⁸ Say Katawan kuanto, Papawilen kod dalin da iray totook, tan kasian koy balang pamilya; napasimbalon nipaalagey so Jerusalem; tan say palasio.

¹⁹ Mankanta na panangidayew iray totoon manaayam diman; maneyag irad liket. Lapud panamindision ko ondakel ira, tan napagalangan ira.

²⁰ Ipawil kod gendat a pakayari so bansa ra, tan iletneg kon malmalet lamet; dusaen kon amin iray mamapairap ed sikara.

^21-22 Manlapud dilin bansa ra iray manoley ed sikara, kadalaan da met lamlamang so prinsipi ra. No imbitaan kon onsingger, ondagod siak; ta siopay ondagon ag inimbitaan? Magmaliw iran totook tan siak so Dios da. Siak, say Katawan, so nansalita.

^23-24 Sakey a bagyo so pasnuk na Katawan, sakey a mabiskeg a dagem ya ombasig ed tagey na olo na saray totoon maoges. Ag ontonda ya anggad nasumpal ya amin iray labay ton gawaen. Diad arapen iran agew natalutalusan ya na saray totoo to.