Jeremias 26 - Maung a Balita Biblia

Asalaysay si Jeremias

¹ Ag abayag, nen nagmaliw ya ari na Juda si Joakim a lakin anak nen Josias,

² say Katawan inkuantod siak, Manalagey kad patio na Timplo tan ibawag mo ray ingganggan kon salitaen mod saray totoon nanlapud saray baley na Juda a mangigalang diman. Ibagam ya amiy bengatla.

³ Ag la pigan ondengel iray totoo tan ikaindan day maoges a panagbilay da. No onyay gawaen da, mangoman ak ed kanunotan nipaakar ed ginetmak lan panderal ed sikara lapud saray maoges a gawgawa ra.

⁴ Say Katawan imbaga tod siak ya ikuankod saray totoo yan salita to, Siak, say Katawan, imbagak lad sikayo a nepeg yo ak a toluken diad pangonur yod saray bangat kod sikayo.

⁵ Nepeg yon dengelen iray salita na saray aripen kon propita ya imbabakik ed sikayo. Ag yo nin balut inonur iray imbabaga rad sikayo.

⁶ No ituloy yoy ag mangonur ed siak, gawaen kod sayan Timplo so singa samay ginawak ed Silo tan saray amin a bansa ikana ray ngaran na sayan siudad a sakey a samba.

⁷ Saray papari, saray propita, tan amin a totoo et nadngel da ak a nansalita na sarayan bengatla diad dalem na Timplo,

⁸ tan kapangibagak ed saray amin ya ingganggan na Katawan a salitaen ko, siningkat da ak tan ineeyag da, Nepeg moy pateyen lapud saya!

⁹ Akin et imbagam, diad ngaran na Katawan, a sayan Timplo et magmaliw a singa Silo, tan naderal yan siudad, tan anggapoy manayam dia? Insan minokut ak na saray totoo.

¹⁰ Nen saray pangulo na Juda nadngelan da no antoy agawa, nangganat iran linma ed Timplo manlapud palasio tan inmirung irad pasen da diad Balon Puirta.

¹¹ Insan saray papari tan saray propita kuandad saray pangulo tan saray totoo, Sayan too kanepegan toy pateyen lapud nansalita sumpad siudad tayo. Sikayon dili so akadngel ed sikato.

¹² Insan inkuanko, Imbaki ak na Katawan a mampropisiya nipaakar ed amin a nadngel yo sumpad sayan Timplo tan sumpad sayan siudad.

¹³ Nepeg yo sirin so mangoman na panagbilay yo tan saray bengatlan gagawaen yo, tan onur yo la so Katawan a Dios yo. Diad ontan, sikatoy mangoman ed kanununotan nipaakar ed paneral tod sikayo.

¹⁴ No para say siak, wala ak ed silong na pakayari yo! Gawa yod siak labat so antokaman ya amta yon kaptekan tan kamaungan.

¹⁵ Balet onyay andi-duaruwan nagawa: no pateyen yo ak, sikayo tan saray totood sayan siudad et mankasalanan lapud impamatey yod toon anggapoy kasalanan, ta say Katawan so angibakid siak ya iter kod sikayo yan pasakbay.

¹⁶ Insan saramay pangulo tan saramay totoo kuandad saray papari tan saray propita, Ag nepeg a pateyen yan too, lapud nansalita ed sikatayo diad ngaran na Katawan tayon Dios.

¹⁷ Insan pigarad saray mamasiken na baley so inmalagey tan inkuandad saray totoon nantitipon,

¹⁸ Nen ari ed Juda si Ezekias, si propita Mikias a taga Moreset imbaga tod amin a totoo a say Katawan a Makapanyarin-amin inkuanto, Nabakan singa alog so Sion; magmaliw a bunton na deral-deral so Jerusalem, tan magmaliw a takel so palandey a panalalageyan na Timplo.

¹⁹ Ag pinatey nen Ari Ezekias tan saray totoo to si Mikias. Ingen tinakotan nen Ezekias so Katawan tan nala to so maung a linawa to. Diad onman angoman so Katawan ed kanununotan ton manderal ed sikara. Balet sikatayo, ngalngali ti la iyakar so baleg a deral ed sikatayon dili. (

²⁰ Wala met so sakey a lakin nansalita ed ngaran na Katawan, say anak nen Semaya a si Urias a taga Kiryat-jearim. Nansalita sumpad sayan siudad tan sayan bansa a singa samay ginawa nen Jeremias.

²¹ Nen si Ari Joakim tan saray sondalo to, tan saray opisyal to nadngel day imbaga nen Urias, impaanap na ari a papatey si Urias. Balet nadngelan ya nen Urias, kanyan diad inkataktakot to batik ed Egipto.

²² Balet si Ari Joakim imbaki tod Egipto si Elnatan a lakin anak nen Acbor tan saray arum a lalaki ta alaen day Urias.

²³ Manlapud Egipto inyakar dad kinen Ari Joakim si Urias; impapatey nen ari insan to impaibantak so bangkay to ed panangipomponan ed saray karaklan.)

²⁴ Balet ag ak nipalimad saray totoo pian pateyen da ak, lapud inyagel ak nen Ahikam a lakin anak nen Safan.