Jeremias 25 - Maung a Balita Biblia

Say Kalaban a Nanlapud Baybay

¹ Diad kumapat a taon na panaarid Juda nen Joakim a lakin anak nen Josias, naawat ko so salita na Katawan nipaakar ed amin a totood Juda. (Sikato yay ononan a taon na panaarid Babilonia nen Nabucodonosor.)

² Inkuankod amin a totood Juda tan Jerusalem,

³ Diad loob na duamplo tan taloy taon, nanlapu lad kumalabintalon taon na panaarid Juda nen Josias a lakin anak nen Amon ya anggad natan, nansasalitad siak so Katawan tan intutuloy kon imbagad sikayo so sinalita to. Balet ag yo inasasikaso.

⁴ Ag kayo dinmengel odino angasikaso, anggaman ya intutuloy na Katawan so mangibaki na saray aripen ton propita.

⁵ Imbabaga rad sikayo a benegan yo ray maoges a panagbilay yo tan kaindanan yo ray maoges a gagawaen yo, pian nayarian yoy manayam ya ando lan ando ed dalin ya inter na Katawan ed sikayo tan saray lalaki yo.

⁶ Imbaga rad sikayo ya ag kayo mangigagalang tan manlilingkur ed arum a diriyos, tan ag yo pampapasnuken so Katawan diad panamegley na pangigalang yod saray talintaon ginagawa yo. No inonur yo labat so Katawan, ag to kayo la komun dinusa.

⁷ Balet say Katawan a dili imbaga to a sikatoy ag yo dinengel. Ingen impanpasnuk yo diad panamegley na saray talintaoy diriyos yo, kanyan sikayon dili so nanlapwan na sayan panudusa tod sikayo.

⁸ Kanyan sirin, lapud ag kayo dinmengel ed sikato, say Katawan a Makapanyarin-amin, kuanto,

⁹ Tawagen kon amin iray totood baybay tan say aripen kon Ari Nabucodonosor na Babilonia. Pibakalen ko ra sumpad sayan bansa tan amin a manaayam dia tan amin a kaliber-liber ton bansa. Deralen ko ya anggad angga yan bansa tan saray kaabay to, paolyan ko ran aderal-deral ya anggad angga, makapataktakot tan makapasinagem iran nengnengen.

¹⁰ Patondaen ko ray paneeyag dad liket tan gayaga tan saray maliket a tanul ed saray bansal. Naandian ira na larak a para saray lamparaan da tan saray trigo.

¹¹ Magmaliw a bontun na dera-deral yan intiron dalin tan makaptaktakot a nengnengen. Pitomploy taon a panlingkuran na sarayan kakaabay a bansa so Babilonia.

¹² Kayari tod satan dusaen koy Babilonia tan say ari to lapud saray kaogsan da. Deralen ko man a bansa tan paolyan kon aderal-deral ya anggad angga.

¹³ Dusaen ko man a bansa na saray deral ya iyakar kod saray bansa nen akitongtong ak diad panamegley nen Jeremiasamin da ray deral a nisulat ed sayan libro.

¹⁴ Pambayaren ko ray taga Babilonia lapud saray ginagawa ra, et amayamay a bansa tan matalonggaring ya arari so mangaripen ed sikara.

Say Sintinsia na Dios ed saray Bansa

¹⁵ Say Katawan a Dios na Israel inkuantod siak, Nia so kupa na alak a napnoy pasnuk ko. Alam ta ipainom mod saray bansan pangibakian kod sika.

¹⁶ No inomen da, mandongilngil ira tan naderal so olo ra lapud bakal a padalanen kod sikara.

¹⁷ Kanyan inalak ed lima na Katawan imay kupa, insan ko impainom ed saray bansan angibakian tod siak.

¹⁸ Apainom so Jerusalem tan amin a baley ed Juda, pati saray arari tan saray pangulo na Juda, pian magmaliw iran bunton na dera-deral; makapataktakot tan makapasinagem iran nengnengen, tan saray totoo ikana ran sakey a samba so ngaran da a singa gagawaen da ni. (Onya natan so agawad sikara.)

^19-26 Saya so listaan na amin da ray arum ya inminom ed samay kupa: say ari na Egipto, saray opisyal tan saray pangulo to; amin da ray Egipsio, tan amin a sangkaili a manaayam ed Egipto; amin ya arari na dalin na Uz; amin ya arari na saray Filisteo ed saray siudad na Ascalon, Gaza, Ekron, tan say akeraan ed Asdod; amin da ray totood Edom, Moab, tan Ammon; amin ya arari na Tiro tan Sidon; amin ya arari ed saray dalin na Meditiraneo; saray siudad na Dedan, Tema, tan Buz; amin da ray totoon nampapotut na buek da; amin da ray arari ed Arabia; amin da ray kabyangay tribu a walad kalawakan; amin da ray arari ed Zimri, Elam, tan Media; amin da ray arari ed baybay, arawi may asingger, mansosoblayan ira. Nepeg ya inminom so balang bansa ed intiron mundo. Say kaonuran ya oninom et say ari na Babilonia.

²⁷ Insan inkuan ed siak na Katawan, Ibagam ed saray totoo a siak, say Katawan a Makapanyarin-amin a Dios na Israel, igaganggan ko ra ya oninom a anggad nabuwek-buwek ira tan manota-ota ra, anggad natumba ra tan ag ira la makabangon lapu ed bakal ya ipadalan kod sikara.

²⁸ No ag da labay ya awaten tan inoman itay kupan walad limam, ibagam ed sikara a say Katawan a Makapanyarin-amin so angibaga a nepeg dan inomen so walad kupa.

²⁹ Igapok ed dilin siudad ko so panderal. Abaloan da amon ag ira nadusa? Nadusa ra, ta ipadalan koy bakal ed amin a katoowan diad tapew na dalin. Siak, say Katawan, so nansalita.

³⁰ Sika, Jeremias, nepeg mon ipulong ya amin iray imbagak. Nepeg mon ikuan ed sarayan totoo, Say Katawan unungol manlapud tawen tan onkarul manlapud saray tagey na tawen. Unungol sumpad saray totoo to; oneyag a singa lakin manggagatingatin na saray ubas, Narengel na balang too ed tapew na dalin,

³¹ say tanul na bosis to makmakbaw ed anggan iner a sokung na mundo. Say Katawan akusaen to ray bansa. Salaysayen ton amin iray katoowan, tan papatey to ray totoon maoges. Say Katawan so nansalita.

³² Say Katawan a Makapanyarin-amin imbaga to a say deral et mansosoblay ya onsasabi ed balang bansa, tan sakey a mabiskeg a bagyo so mantitipon ed saray arawin sokung na mundo.

³³ Diad satan ya agew, saray pinapatey na Katawan kitongilang ed intiron mundo so bangkay da. Anggapoy manermen ed sikara. Anggapoy mangisinup odino mangipompon na bangkay da. Nabunbunton irad dalin a singa taiy ayayep.

³⁴ Akis kayo, sikayo ran pangulo, sikayo ran pumapastol na saray totook, akis kayoy maksil! Manermen kayo tan mantolin kayod dabuk. Sinmabi lay panaon a sikayoy pateyen, tan napatas kayon singa karniron kalakyan.

³⁵ Ag kayo la makabatik.

^36-37 Manayay tan onaakis kayo lapud kaermenan, ta dineral na Katawan so bansa yo diad pasnuk to tan tinaynan ton aderal-deral so bansa yon panaariay kareenan.

³⁸ Inkaindan na Katawan iray totoo to a singa lion ya ontataynan ed ongib to. Nagmaliw a kalawakan so bansa ra lapud baleg a bakal tan lapud mapalalon petang na olo na Katawan.