Jeremias 17 - Maung a Balita Biblia

Say Kasalanan tan Dusa na Juda

¹ Say Katawan kuanto, Totood Juda, insulat na balatyang a lapis so kasalanan yo; intatak na maotuk a diamanti ed kapusoan yo, tan nikorti ed saray sokung na saray altar yo.

² Saray totoom et mangigagalang ira diad saray altar tan saray tanda a nipaalagey para si diosan Ashera diad abay na masalumpapak a kiew, diad toktok na saray pokdul,

³ tan diad toktok na saray palandey ed maawang a dalin. Pasamsam kod saray kalaban yo iray kayamanan tan saray mabmablin kayaryan yo lapud amin a kasalanan a ginagawa yo ed intiron mundo.

⁴ Napasoot kayon mangikban na dalin ya inter kod sikayo. Pagmaliwen ta kayon aripen na saray kalaban yo diad dalin ya ag yo kabat, lapud say pasnuk ko et singa apoy, tan ondalang ya anggad angga.

Say Nandoroman Balikas

⁵ Say Katawan kuanto, Dusaen koy toon onarawid siak, tan manmatalek ed too, tan diad biskeg na saray ompatey a totoo.

⁶ Sikatoy singa abeban kiew ed kabueran ya ontutubod andi-kakanaan amagan dalin, diad maasin a dalin ya anggapoy tanaman a mabilay; anggapoy antokaman a maabig a nagawad sikato.

⁷ Balet bindisionan koy toon manmatalek tan manisiad siak.

⁸ Sikatoy singa kiew a nitanem ed abay na kolus tan ipapasabi tod danum iray lamut to. Ag antakot no onsabiy tiagew, ta mansiansian birdi ray bolung to; anggapoy pagpaga to no ag onoran; ag ontonda a mambunga.

⁹ Siopay makatalus ed puso na too? Anggapoy ontalona ed panamalikdo to; ag onabig so sakit to.

¹⁰ Siak, say Katawan, sokayan ko ray kanunotan tan suboken ko ray puso da ray totoo. Tumangan ko so balang too onung na panagbilay to, onung na gagawaen to.

¹¹ Say toon masaol ed kuarta singa manok a poposnakan to ray ag to iniknol. Diad kabisbiskegan to nabalang toy kayamanan to, tan diad kaonuran sikatoy sakey a makulang-kulang.

¹² Singa mapagalang a trono so Timplo tayo; nanlapud gapo manalalagey ed toktok na sakey a palandey.

¹³ Katawan, sika so ilalo na Israel; nabaingan ya amin iray mangikaindan ed sika. Naandipat iran singa saray ngaran a nisulat ed dabuk, lapud inkaindan da ka, say Katawan, say sobul na ambetebetel a danum.

Kinmerew na Tulong si Jeremias ed Katawan

¹⁴ Katawan, tambal mo ak pa, et sigput ak ya onabig; iyagel mo ak, et sigput ak a nilaban. Sika so idadayew ko!

¹⁵ Saray totoo kuandad siak, Iner so kawalaan na saray taktakot na Katawan sumpad sikami? Pagawam la ra natan ed sikato!

¹⁶ Balet, Katawan, ag ta kan balut tinanggoyur a mangyakar na deral ed sikara; ag ko anggan nampilalekan ya onsabiy panaon na gunigon ed sikara. Katawan, kabat mo ya; amtam no antoy imbagak.

¹⁷ Ag mo ak pa tataktakoten; no onsabiy gunigon, sikay salimbengan ko.

¹⁸ Ipelag mo pad kababaingan iray mamapairap ed siak, balet ipaliis mo ak pa, Katawan. Patakot mo pa ra, balet ag mo ak tataktakoten. Iyakar mo pad sikaray deral tan mekmek mo ra.

Say Panagngilin no Agew na Panagpainawa

¹⁹ Inkuan ed siak na Katawan, Jeremias, laka ta ibawag mo ray salitak diad Puirta na Totoo, a sikatoy puirtan dadalanen na saray ararid Juda no onloob odino ompaway irad siudad; insan ka onlad arum nin puirta na Jerusalem.

²⁰ Ibagam ed saray arari tan amin a totood Juda tan amin a taga Jerusalem ya onloloob irad saraman a puirta, ya ondengel irad salitaen ko.

²¹ Ibagam ed sikara a no inaro ray bilay da, ag ira mansasakbat na antokaman no Agew na Panagpainawa; ag ira manawit na bengatlan idalan dad saray puirta na Jerusalem,

²² odino manaawit na antokaman ya ipaway dad saray abung da no Agew na Panagpainawa. Ag ira nepeg a mankimey no Agew na Panagpainawa; ngilinan dan sakey a masanton agew, onung na ingganggan kod saray lalaki ra.

²³ Ag dinmengel odino angasikaso ed siak iray lalaki ra. Ingen nagmaliw iran anawet a puso; ag ira ononur ed siak odino manaral ed siak.

²⁴ Ibagam ed sarayan totoo a nepeg dan onuren iray amin a ganggan ko. Ag ira nepeg a manawit na antokaman ya idalan dad saray puirta na sayan siudad no Agew na Panagpainawa. Nepeg dan ngilinan a masanton agew so Agew na Panagpainawa tan ag iran balut manggagawa na antokaman a kimey.

²⁵ No onuren da ra ya, onloob ed puirta na Jerusalem iray arari tan saray pangulo ra tan walay pakayari ran singa samay pakayari nen Ari David. Kaiba da ray totood Juda tan Jerusalem, a mankarwahi tan mankabayo ra, tan nawalaan lawas na saray totoo so siudad na Jerusalem.

²⁶ Onsabi ray totoo a manlapud saray baley na Juda tan saray bario ed kaliber-liber na Jerusalem; manlapu rad dalin na Benjamin, diad saray alusadsar na saray pokdul, diad saray kapalandeyan, tan diad abalaten na Juda. Mangawit irad Timplok na saray bagat a popoolan tan saray isasaklang, saray bagat a trigo tan insinso, tan saray bagat a pangiter na pisasalamat.

²⁷ Balet nepeg ya onuren da ak tan ngilinan da a masanton agew so Agew na Panagpainawa. Ag ira nepeg a mangawit na antokaman ya idalan dad saray puirta na Jerusalem ed satan ya agew, ta no mangidalan ira, poolan ko ray puirta na Jerusalem. Temeken na pool iray palasio na Jerusalem, tan anggapoy makasebseb.