Jeremias 16 - Maung a Balita Biblia

Saray Ganggan na Katawan ed kinen Jeremias

¹ Akisalita lamet ed siak so Katawan tan inkuanto,

² Ag ka mangaasawa odino maniilalak ed sayan pasen.

³ Ibagak ed sika no antoy nagawa ed saray anak a nianak dia tan saray atateng da.

⁴ Ompatey irad ambelat a sakit. Anggapoy manermen ed ipatey da, tan ag ira nipompon. Magmaliw a singa taiy ayep ya abunton ed dalin iray bangkay da. Napatey irad bakal, odino ompatey irad eras, tan buagen na saray manok tan saray ayayep ed katakelan iray bangkay da.

⁵ Ag ka onloloob ed abung a walay maneermen. Ag mo paneermenan so siopaman. Ag ko la bindisionan na kareenan iray totook, odino aroen tan kasian.

⁶ Ompatey ed sayan dalin iray mamayaman tan saray mairap-bilay, balet anggapoy manermen odino mangipompon ed sikara. Anggapoy manggerger na laman odino mangiskis na olo to a pangipanengneng toy paneermen to.

⁷ Anggapoy mirongon mangan odino oninom ed siopaman pian ligliwaen tod impatey na inaro tod bilay. Anggapoy mangipanengneng na abagey tod siopaman anggan diad toon naandi so ina o ama to.

⁸ Ag ka onloloob ed abung a kawalaay totoon manliliket. Ag ka mirorongod sikaran mangan odino oninom.

⁹ Dengel kad siak a Katawan a Makapanyarin-amin, say Dios na Israel, ed nepeg kon ibaga. Patondaen ko ray tanul na likeliket tan gayaga, tan say sayaksak na saray nubio tan saray nubia ed sayan pasen. Saray totoo dia mambilay ira ya anggad pakanengneng dan nagawa ya.

¹⁰ No ibagam ed saray totoo ira yan bengatla, tepeten dad sika no akin et ginetmak lan dusaen ira a mapalalo. Tepeten da no antoy kaogsan da tan no antoy kasalanan da ed Katawan a Dios da.

¹¹ Insan mo ibagad sikara a say Katawan inkuanto, Saray lalaki yo inkaindan da ak tan nanlingkur tan angigalang irad arum a diriyos. Inkaindan da ak tan ag da inonur iray bangat ko.

¹² Balet mapalalo nin maoges so ginawa yo nen saray lalaki yo. Amin yo et anawet so puso yo tan maoges kayo, tan ag kayo ontoluk ed siak.

¹³ Kanyan ibantak ta kayod dalin ya ag yon balut kabat tan saray lalaki yo. Diad agew tan labi, diman kayo manlingkur ed saray arum a diriyos, tan ag ta kayo kasian.

Say Impawil Manlapud saray Bansan Inkibantakan

¹⁴ Say Katawan kuanto, Onsabiy panaon ya anggapoy toon mansamba ed siak a mabilay a Dios ya angipaway ed dalin na Egipto ed saray totood Israel.

¹⁵ Ingen mansamba rad siak a mabilay a Dios ya angipaway ed saray totood Israel manlapud dalin ed baybay tan manlapud amin a bansan angikaykayatan kod sikara. Ipawil ko rad dilin bansa ra, say dalin ya inter kod saray lalaki ra. Siak, say Katawan, so nansalita.

Say Onsabin Dusa

¹⁶ Say Katawan kuanto, Mangibaki ak na saray amayamay a sumisigay a mangerel ed sarayan totoo. Insan mangibaki ak na saray amayamay ya umaanup a manganup ed sikara diad palandey tan pokdul, tan anggan diad saray abut ed saray ankakabaleg a bato.

¹⁷ Nanenengneng koy amin a gagawaen da. Anggapoy antokaman ya akaamut ed siak; ag makapaliis ed pakanengneng ko iray kasalanan da.

¹⁸ Mamidway belat so dusan iter kod sikara, lapud kasalanan tan kaogsan da; dinotakan day dalin ko na saray talintaon anggapoy bilay a singa bangkay, tan pinano ra na saray tila-tilan diriyos.

Say Pikakasi nen Jeremias

¹⁹ Katawan, sika so mangyaagel ed siak, tan mangiiter na biskeg ko; tutulongan mo ak no panaon na gunigon. Onlad sika ray bansan nanlapud nandoroman sokung na mundo tan ikuanda, Tila-tilan diriyos labat so walad saray lalaki mi; anggapo lay arum no ag ta saray andi-kakanaan a talintaoy diriyos.

²⁰ Makagawa kasi na saray dili ton diriyos so sakey a too? Andi! Say nagawa to aliwa ran peteg a diriyos.

²¹ Kanyan sirin, kuay Katawan, maminsan tan duga la, ipaamtak ed sikara so pakayarik tan say biskeg ko; naamtaan da a siak so Katawan.