Isaias 9 - Maung a Balita Biblia

¹ Anggapoy pakapaliis dad sayan panaon na gunigon. Aminsan naplag ed kababaingan so dalin na saray tribu di Zabulon tan Neftali; balet diad arapen a panaon nitanduro yan lugar, manlapud Mediteraneo a mampabokig ya anggad dalin ed nibaliw na Jordan, tan nasakop to ya anggad Galilea a panaayaman na saray sangkaili.

² Akanengneng ba baleg a silew iray totoon nankukurang ed kabilongetan. Nanayam irad sakey a dalin ya ambilbilonget, balet natan onsisindag so silew ed sikara.

³ Initdan mo ray baleg a gayaga, Katawan; impagmaliw mo ran maliket. Magayaga ra lapud saray ginagawam; singa saray totoon maliket no manaani ra, odino singa ra saray manaapag na asamsam dan kayamanan.

⁴ Maliket ira lapud pinoter moy pakon sasakbaten da tan say bastun a mamepekpek na saray takeb da. Tinalom so bansa ya amairap ed saray totoom, a singa samay impanalom nen saman ed saray sondalo na Madian.

⁵ Oputen na apoy iray buta na ondodogpan sondalo tan amin a kawes dan ataltalagsikan na dala.

⁶ Dida sikatayo nianak so sakey ya ogaw! Niiter ed sikatayo so sakey ya anak a laki! Sikatoy magmaliw a manoley tayo. Natawag a Makapakelaw a Mananimbawa, Makapanyarin Dios, Andi-anggaan ya Ama, Prinsipi na Kareenan.

⁷ Onlaknab lan onlaknab so pakaoley ton ari, mansiansian mareen so panarian to. Manoley a kasalat nen Ari David, tan iletneg tod kaptekan tan katonungan so pakayari to manlapud natan ya anggad angga. Andi-saew a sumpalen ya amin na Makapanyarin-amin a Katawan.

Dusaen na Katawan so Israel

⁸ Say Katawan sinintinsiaan toy nanarian na Israel, saray kabyangan na boleg nen Jacob.

⁹ Amin da ray totood Israel, balang sakey a manaayam ed siudad na Samaria, naamtaan da a ginawa ya na Katawan. Matangsit tan mapaatagey ira natan. Kuanda,

¹⁰ Ageba ray laryon paalagey, balet salatan mi ra na saray baton paalagey. Apoter iray wanan a sikamoro, balet salatan mi ra na sankaabigan a kiew a sidro.

¹¹ Sinogsogan na Katawan iray kalaban da a dogpaan da ra.

¹² Say Siria ed bokig tan say Filistia ed sagur sinmangi ran mangakmun ed Israel. Anggaman ontan ag ni tinmonda so pasnuk na Katawan, so ag ingen siansia nin akaonat so lima ton manusa.

¹³ Ag nagbabawi ray totood Israel; anggaman a dinusa ra na Katawan a Makapanyarin-amin, ag ira pinmawil ed sikato.

¹⁴ Diad sanagew dusaen na Katawan iray pangulo na Israel tan saray totoo to; potuten toy olo ra tan say ikul da.

¹⁵ Say olo et saray matakken tan gagalangen a totootan say ikul et saray propitan tilay ibabangat da!

¹⁶ Saray mangiwawanwan ed sarayan totoo et imbalang da ra tan sigput da ran ginewgew.

¹⁷ Ag yabuloy sirin na Katawan a makabatik so siopaman ed saray tobun-balo, tan ag to kasian so siopaman ed saray balo tan saray olila, lapud anggapoy Dios da ray amin a totoo tan maoges ira tan kaogsan ya amin so sasalitaen da. Anggaman ontan ag ni ontonda so pasnuk na Katawan, no ag ingen siansia nin akaonat so lima ton manusa.

¹⁸ Say kaogsan na saray totoo et ondadalang a singa apoy a manemek na abeba ran kiew tan saray masabit a dika. Ondadalang a singa pool ed takel a mangipapaatagey na makapal ya asewek.

¹⁹ Lapud pasnuk na Katawan a Makapanyarin-amin, say pananusa to et ondadalang a singa pool ed intiron dalin tan papateyen to ray totoo, tan balang sakey iyaagel toy sikaton dili.

²⁰ Diad intiron bansa saray totoo alaen tan kanen day antokaman a naakan da, balet ag iran balut napesel. Kanen day anggan saray dilin anak da!

²¹ Saray totood Manases tan saray totood Efraim et manlalaban ira, tan mammomoyung iran ondogpa ed Juda. Anggaman ontan ag ni ontonda so pasnuk na Katawan, no ag ingen siansia nin akaonat so lima ton manusa.