Isaias 4 - Maung a Balita Biblia

¹ No onsabiy tan a panaon, singkaten na pitoran bibii so sakey a laki tan ikuanda, Nayarian min pakanen tan kawesan so sikamin dili, balet ipangasim ya ibagam a sikay asawa mi, pian naekal ed sikamiy kababaingan na anggapoy asawa.

Napasimbaloy Kipapasen na Jerusalem

² Onsabiy panaon a say Katawan pabalegen tan pagmaliwen ton marakep so balang tanaman tan kiew a walad dalin. Amin da ray nakdaan a totood Israel et ikinon tan panliketan da ray bungay dalin.

³ Natawag a masanto ya amin iray totoon atilak ed Jerusalem, a sikaray pinili na Dios a napaliisan day patey.

⁴ Lapud pakayari na Katawan sintinsiaan tan pasantosen to so bansa tan orasan tod kasalanan to Jerusalem tan ekalen toy dala a naibung diman.

⁵ Insan diad tagey na Palandey na Sion tan diad tagey na saray totoon nantitipon diman, ibaki na Katawan so lorem no agew, tan say asewek tan say marlang ya apoy no labi. Say kagalangan na Dios sakbungan tan iyagel toy intiron siudad.

⁶ Say kagalangan na Dios tarungan toy siudad pian ag napetangan no agew tan pagmaliwen ton pasen ya arawid kaatapan, pasen a siruman no walay oran tan bagyo.