Isaias 3 - Maung a Balita Biblia

Say Gewgew ed Jerusalem

¹ Natan say Katawan a Makapanyarin-amin a Katawan et ngalngali to la ekalen ed Jerusalem tan Juda iray amin a panmamatalkan na saray totoo. Ekalen toy tagano ra tan say danum da,

² saray bayani tan saray sondalo ra, saray huis tan saray propita ra, saray managparles tan saray mamasiken da,

³ saray pangulo na sondalo tan saray manoley ed baley da, saray politiko tan saray salamangkiro ra a labay dan naoleyan so nagagawa.

⁴ Abuloyan na Katawan ya oleyan ira na saray walad kalangweran a kulang na kakabatan tan salsali iray totoo.

⁵ Mampapairapan tan manlalamesan so balang sakey ed sikara. Saray tobun-balo ag da pagalangan iray pangulowan da, tan saray andi-kakanaan a totoo ag da italtalek iray walad pakaoley.

⁶ Onsabiy panaon a saray kabyangay sakey a boleg et mamili ray sakey ed sikara tan ikuandad sikato, Walay isolung mo, kanyan sikay pangulo mid sayan panaon na gunigon.

⁷ Balet onebat, Andi! Aliwan siak! Ag ta kayo natulongan. Anggapoy nakan ko a nisulong ko. Ag yo ak pagmamaliwen a pangulo yo!

⁸ On, aderal la so Jerusalem! Abagbag lay Juda! Sumpad Katawan iray amin a sasalitaen tan gagawaen na saray totoo ra; maparontal dan papabaingan so Dios.

⁹ Nisingil ed sikara so panaglabi ra. Maparontal iran mankakasalanan a singa impankasalanan na saray totood Sodoma. Pangaskasiyan ira. Sikara met ni lamlamang so nanlapwan na pakadusa ra.

¹⁰ Manliket iray totoon matonung, tan maung so pansumpalan da. Panliketan da so antokaman a nansagputan da.

¹¹ Balet pangaskasiyay kipapasen da ray totoon maoges; nagawad sikara so ginagawa rad arum a totoo.

¹² Papairapen na saray managpaabang na kuarta iray totook tan sasaolen ira na saray akautangan da. Totook, ibabalang kayo na saray pangulo yo, kanyan ag yo amta no iner so laen yo.

Sinintinsiaan na Katawan iray Totoo to

¹³ Akaparaan lay Katawan a mangibaga na liknaan to; sipaparaan lan manintinsia ed saray totoo to.

¹⁴ Say Katawan iyaakar tod panagsintinsiaan iray mamasiken tan saray pangulo na saray totoo to. Kuantod sikara, Sikayoy nanaala na saray bungay kaubasan, tan napno na saray sinamsam yod saray mairap-bilay iray kaabungan yo.

¹⁵ Anggapoy kanepegan yon mamairap ed saray totook tan mamasegsegang ed saray mairap-bilay. Siak, say Katawan a Dios a Makapanyarin-amin, so nansalita.

Say Pasakbay ed saray Bibiid Jerusalem

¹⁶ Inkuay Katawan, Agaylay panag-paatagey na saray bibiid Jerusalem! Mataltalker so tenger dan manakar: Mankindat ira lawas. Ankekelanting so kupbang da, tan mantaningting so pulsiras dad kalit-kalit.

¹⁷ Balet dusaen ko rakiskisan koy olo ra tan paolyan ko ran tugo.

¹⁸ Onsabiy agew a say Katawan et ekalen tod saray bibiid Jerusalem iray amin a bengatlan ikikinon dan mapalalosaray pampapagangganan isosolung dad saray kalitkalit da, diad olo ra, diad beklew da,

¹⁹ tan diad saray ngalngalowan da. Ekalen to ray pandung da

²⁰ tan saray sombriro ra; ekalen to met iray isosolung dan galing ed saray taklay da tan diad balangbang da;

²¹ saray singsing ya isosolung dad saray gamet da tan diad eleng da;

²² amin da ray mararakep a kawes da, saray kawes dan andorokey, saray kolibemben da, tan saray pitaka ra;

²³ saray maimimpis a kawes da, saray linen a panyo ra, saray tubrban tan saray andokey a pandung ya isosolung dad olo ra.

²⁴ Anta mampabalingit ira komun, naboluk ira; anta mambalkes ira komun na balibali, mambalkes iray magasgasal a lobir; anta marakerakep komun so buek da, nakiskisan so olo ra; anta mankawes ira komun na marakerakep, lupot so ikawes da; magmaliw a makapabaing so ganggana ra!

²⁵ Saray lalakid siudad, anggan antoy biskeg da et napatey irad bakal.

²⁶ Manermen tan manakis iray puirta na siudad, tan say dilin siudad magmaliw a singa biin labus-lakseb a manyodyorung ed dalin.