Genesis 50 - Maung a Balita Biblia

¹ Intakba nen Jose so laman to ed kinen ama to, manakakis tan inaanguban tod lupa.

² Insan to ingganggan iray aripen ton doktor ya ibalsamo ray bangkay nen ama to.

³ Apataplon agew so impakaibalsamod sikato a singa pakakaibalsamod karaklan. Insan pitomplon agew ya inermenan na saray Egipsio.

⁴ Nen kayariy panaon na panagermen, inkuanen Jose ed saray opisyal na ari, No walay panagmatalek yod siak, ibaga yo pad ari,

⁵ Nen ngalngali la ompatey so amak, impaisipan dad siak ya ipompon kod lobuk ya imparaan dad dalin na Canaan. Kanyan abuloyan yo ak pan onla, ta ipompon koy amak, insan ak dia ompawil.

⁶ Inmebat so ari, Laka, ta ipompon moy amam onung na insipan mon gawaen.

⁷ Kanyan linman imponpon nen Jose so ama to, Akilad kinen Jose iray amin ya opisyal na ari, saray lalakin atagey so kipapasen dad palasio, tan amin a manonan lalaki ed Egipto.

⁸ Akilad sikato ray kabyangay pamilya to, saray lalakin agagi to, tan saray arum nin kabyangay pamilya nen ama to. Atilak ed dalin na Gosen iray ankekelag ya anak da, tan saray karniro, kanding, tan saray baka ra.

⁹ Akila met ed sikato ray lalakin akalogan ed karwahi, tan saray akakabayo; dakerakel iran nanoolup.

¹⁰ Nen akasabi rad pasen a panagilikan diad Atad a bokig na Jordan, nanggawa ra na andokey tan maermen a sirimonyay pompon. Pitoy agew a nanggaway Jose na sirimonyay ermen.

¹¹ Nen anengneng na saray Cananeo ira may totoon maneermen diad Atad inkuanda, Sirimonya ya na ermen da ray Egipsio. Sikato yay makasengeg no akin et atawag iman a pasen na Abel-mizraim.

¹² Kanyan ginawa na saray lalakin anak nen Jacob so ingganggan tod sikara:

¹³ inyakar dad Canaan so bangkay to, imponpon dad ongib ed Macpela a bokig na Mamre, diad samay alog a sinaliw nen Abraham ed kinen Efron a Heteo, ta ginawa ton pasen a pomponan.

¹⁴ Kayarin nipompon nen Jose so bangkay nen ama to, pinmawil ed Egipto a kaiba to ray lalakin agagi to tan amin ya akilad sikaton akitolur.

Pinabiskeg nen Jose so Linawa da ray Agagi ton Lalaki

¹⁵ Kayariy impatey nen ama ra, inkuan na lalakin agagi nen Jose, Nayarin bosulen itayo ni nen Jose tan mamplanon ombawid sikatayon amin, lapud samay ginawa tayod sikato.

¹⁶ Kanyan impaikuan dad kinen Jose, Kasakbayan ya inatey si ama tayo,

¹⁷ impaikuandad sika, Pirdonam pa la ray agagim a lalaki ed samay kasalanan a ginawa rad sika. Pirdona mo kami pa la sirin natan ed samay kaogsan a ginawa mi, sikamin aripen na Dios nen amam. Inmakis si Jose nen nadngel to yan impaibaga ra.

¹⁸ Insan saray agagi ton dili so dinmago tan dinmakmomo rad sikato. Inkuanda, Nia kami ran aripen mo.

¹⁹ Balet inkuanen Jose ed sikara, Ag kayo natatakot; ag ko nayarian ya alaey pasen na Dios.

²⁰ Nankokomplutan yo aka nanggawaay maoges, balet say Dios impagmaliw to a pankaabigan iman a kaogsan, pian makapambilay iray amayamay a totoo, saray totoon mabilay natan lapud saman ya agawa.

²¹ Anggapoy nepeg yon takotan. Asikasoen ta kayo tan saray anak yo. Onya so impamabiskeg toy linawa ra tan impanligliwa tod sikara.

Say Impatey nen Jose

²² Kaiba nen Jose a nanayam ed Egipto iray kabyangay pamilya nen ama to; sanlasus tan samploray taon to nen inatey.

²³ Naalagar to nin anengneng iray anak nen Efraim tan saray apo tod sikato. Mabilay ni nen naawat a kabyangan na pamilya to iray anak nen Makir, say lakin anak nen Manases.

²⁴ Inkuantod saray lalakin agagi to, Ngalngali ak la ompatey, balet andi-saew ya asikasoen kayo na Dios, tan ipaway to kayod sayan dalin tan iyakar to kayod dalin a sinambaan ton iter ed kindi Abraham, Isaac, tan Jacob.

²⁵ Insan kinerew tod saray totoo to a sambaan dan gawaen yan bilin to. Inkuanto, Isipan yod siak a no say Dios et iyakar to kayod saman a dalin, piawit yo ray pokel ko.

²⁶ Kanyan inatey si Jose nen mantaoy sanlasus tan samplora. Imbalsamo rad Egipto, insan da inkargad longun.