Genesis 46 - Maung a Balita Biblia

Linmad Egipto si Jacob tan say Pamilya to

¹ Binalkut nen Jacob so amin a kayaryan to, linmad Beer-seba, tan diman angisaklang na saray bagat ed Dios nen ama ton Isaac.

² Akisalitay Dios ed sikato diad panamegley na sakey a pasingayew ed labi tan inkuanto, Jacob, Jacob! Wadya ak! Anto man? ebat to.

³ Siak so Dios, say Dios nen amam, inkuanto. Ag ka natatakot ya onlad Egipto; gawaen kod man a baleg a bansa iray kabyangay boleg mo.

⁴ Ibaan ta kayod man, tan ipawil kod sayan dalin iray kabyangay boleg mo. Walad diking moy Jose no ompatey ka.

⁵ Manlapud Beer-seba, nambiahi si Jacob. Saramay anak to inlogan day Jacob, saray ogogaw, tan saray kaasawaan da ed saramay kariton ya impawit na arid Egipto.

⁶ Inawit da ray ayayep da tan amin a bengatlan akayaryan dad Canaan, tan linma rad Egipto. Inawit nen Jacob ya amin iray kabyangay boleg to:

⁷ saray anak ton lalaki tan bibii, saray apo ton lalaki tan bibii.

⁸ Sikara yay kabyangay pamilya nen Jacob ya akilad sikato ed Egipto: si Ruben a pangulowan ya anak to,

⁹ tan saray lalakin anak nen Ruben: Hanoc, Fallu, Hezron, tan Carmi;

¹⁰ si Simeon tan saray anak ton lalaki: Jemuel, Jamin, Ohad, Jakin, Zohar, tan Saul ya anak na biin Cananea;

¹¹ si Levi tan saray anak ton lalaki: Gerson, Coat, tan Merari;

¹² si Juda tan saray anak ton lalaki: Er, Onan, Sela, Fares, tan Zara (di Er tan Onan inatey irad Canaan); saray lalakin anak nen Fares et di Hezron tan Hamul;

¹³ si Isacar tan saray anak ton lalaki: Tola, Pua, Job, tan Simron;

¹⁴ si Zabulon tan saray anak ton lalaki: Sered, Elon, tan Jahleel.

¹⁵ Sikara yay anak nen Jacob ed kinen Lea a nianak irad Mesopotamia. Kaiba ra met si Dina, say marikit ya anak nen Jacob. Talomplo tan talon amin iray kabyangay boleg nen Jacob ed kinen asawa ton Lea.

¹⁶ Si Gad tan saray lalakin anak to: Zefon, Hagui, Suni, Ezbon, Eri, Arodi, tan Areli;

¹⁷ si Aser tan saray lalakin anak to: Emna, Isva, Isvi, Beria, tan Sera ya agi ran bii. Saray lalakin anak nen Beria: Heber tan Malkiel.

¹⁸ Sarayan labinanem et kabyangay boleg nen Jacob ed kinen Zilpa, samay aripen ya inter nen Laban ed kinen Lea ya anak to.

¹⁹ Duaray lakin anak nen Raquel ya asawa nen Jacob: di Jose tan Benjamin.

²⁰ Diad Egipto duaray anak nen Jose, di Manases tan Efraim, ed kinen Asenat ya anak nen Potifera a pari ed Heliopolis.

²¹ Saray lalakin anak nen Benjamin sikara di Bela, Beker, Asbel, Gera, Naaman, Ehi, Ros, Mupia, Hupim, tan Ard.

²² Sarayan labinapat so kabyangay boleg nen Jacob ed kinen Raquel.

²³ Si Dan tan say anak ton laki a si Husim.

²⁴ Si Neftali tan saray lalakin anak to: Jazeel, Guni, Jezer, tan Silem.

²⁵ Sarayan pitoran lalaki so kabyangay boleg nen Jacob ed kinen Bilha, samay aripen ya inter nen Laban ed kinen Raquel ya anak to.

²⁶ Anemaplo tan anem ya amin iray anak tan apo nen Jacob a linmad Egipto, likud ed saray asawa na saray anak to.

²⁷ Duaray anak nen Jose ed Egipto, kanyan pitomplon amin so kabyangay pamilya nen Jacob a linmad Egipto.

Si Jacob tan say Pamilya to ed Egipto

²⁸ Pinaona nen Jacob si Juda, ta kerewen tod Jose ya abeten to rad Gosen. Kasabi ra,

²⁹ linmogan si Jose ed karwahi to, insan linmad Gosen a mangabet ed kinen ama to. Kaasingger to, nilakap to, tan abayag a nanakis.

³⁰ Inkuanen Jacob ed kinen Jose, Sipaparaan ak lan ompatey, natan ta anengneng ta ka tan amtak a mabilay ka ni.

³¹ Insan inkuanen Jose ed saray agagi to tan amin a kabyangay pamilya nen ama to, Onla ak, ta ibagak ed ari a sinmabid siak iray agagik tan amin a kabyangay pamilya na amak a manaayam irad Canaan.

³² Ibagak ed sikato a pumapastol kayo tan managkomponi kayoy ayayep; ibagak met ya inawit yo ra diay karniro yo, saray baka yo, tan amin a kayaryan yo.

³³ No tawagen kayoy ari tan tepeten to no antoy anapan yo,

³⁴ ag yo lilingwanan ya ibagan managkomponi kayoy ayayep a nanlapud gapo, a singa saray lalaki yo. Diad ontan, panayamen to kayod dalin na Gosen. Imbaga ya nen Jose, ta ag labay a kaamung na saray taga Egipto iray pumapastol.