Genesis 30 - Maung a Balita Biblia

¹ Balet anggapoy anak nen Raquel, kanyan angimon ed kinen atsi to. Inkuantod kinen Jacob, Itdan mo ak na anak ko; ta no andi, ompatey ak.

² Akapasnuk si Jacob ed kinen Raquel tan inkuanto, Dios ak sirin? Say Dios, aliwan siak, so makasengeg na ag mo pananak.

³ Inkuanen Raquel, Niay Bilha ya aripen ko; akdulan mo pian mananak na para siak tan magmaliw ak ya ina ed panamegley to.

⁴ Kanyan inter toy Bilha ed kinen Jacob, insan inakdulan to.

⁵ Nanlokun si Bilha tan nananak ed kinen Jacob na sakey a laki.

⁶ Inkuanen Raquel, Pinilaan ak na Dios. Dinengel toy pikakasik, tan initdan to ak na anak a laki; kanyan inngaran to na Dan.

⁷ Nanlokun lamet si Bilha tan nananak ed kinen Jacob na kumadwan laki.

⁸ Inkuanen Raquel, Pinasyay impilaban kod kinen atsik, balet analo ak; kanyan inngaran to na Neftali imay ogaw.

⁹ Nen anengneng nen Lea ya ag la mananak, inter tod kinen Jacob si Zilpa ya aripen to.

¹⁰ Insan nananak ed kinen Jacob si Zilpa na sakey a laki.

¹¹ Inkuanen Lea, Mapalar ak; kanyan inngaran to na Gad imay ogaw.

¹² Nananak lamet ed kinen Jacob si Zilpa na sakey a laki;

¹³ inkuanen Lea, Agaylay liket ko! Saray bibii tawagen da ak a maliket; kanyan inngaran to na Aser.

¹⁴ Nen panaganiy trigo, linmay Ruben ed kaalogan tan akalmo na saray tanaman a mandragora, insan inawit to rad kinen ina ton Lea. Inkuanen Raquel ed kinen Lea, Itdan mo ak pa na mandragoran awit nen anak mo.

¹⁵ Inmebat si Lea, Ag ka ni napnek ed impangalam na asawak? Natan labay mo nin alaen iray mandragora na anak ko. Inkuanen Raquel, No iter mod siak iray mandragora nen anak mo, sikam lay miakdul ed kinen Jacob diad sayan labi.

¹⁶ Nen sinmempet ed labi si Jacob a nanlapud kaalogan, inabet nen Lea tan inkuanto, Miakdul kad siak ed sayan labi, ta binayaran ta ka na saray mandragora nen anak ko. Kanyan inakdulan tod saman a labi.

¹⁷ Inebatan na Dios so pikakasi nen Lea; nanlokun tan nananak ed kinen Jacob na kumaliman laki.

¹⁸ Inkuanen Lea, Tinumangan ak na Dios, ta inter kod kinen asawak so aripen ko; kanyan inngaran to na Isacar imay ogaw.

¹⁹ Nanlokun lamet tan nananak ed kinen Jacob na kumanem a laki.

²⁰ Inkuanto, Initdan ak na Dios na marakep a rigalo. Natan akoen ak la na asawak, ta inyanakan koy anemiran lalaki; kanyan inngaran to na Zabulon imay ogaw.

²¹ Ag abayag, nananak na sakey a bii, tan inngaran to na Dina.

²² Anunotan na Dios si Raquel; inebatan toy pikakasi to, kanyan inyabuloy ton makaanak.

²³ Nanlokun tan nananak na sakey a laki. Inkuanto, Inekal na Dios so kababaingan ko diad impangiter tod siak na sakey ya anak a laki.

²⁴ Itdan ak ni komun na Katawan na sakey ya anak a laki; kanyan inngaran to na Jose imay ogaw.

Say Paknaan di Jacob tan Laban

²⁵ Kasumpal na inkianak nen Jose, inkuanen Jacob ed kinen Laban, Bolusan yo ak pa la, pian makapawil ak lad bansa mi.

²⁶ Iter yod siak iray asawak tan saray anak ko; binayaran ko la ra diad impanlingkur kod sikayo. Kabat yo met so ontan lan kaabigan na impanlingkur kod sikayo.

²⁷ Inkuanen Laban ed sikato. Niay nibagak; inaral koy panagparles, et naamtaan kon binindisionan ak na Katawan lapud sika.

²⁸ Ibagam labat no pigay labay mon iyupak ed sika.

²⁹ Inmebat si Jacob, Kabat yo no panoy impanlingkur kod sikayo tan no panoy imbolaslas na saray ayayep yo diad impangasikasok.

³⁰ Say daiset a walad sikayo kasakbayay insabik et dinmakerakel, tan binindisionan kayoy Katawan lapud siak. Natan sinmabi lay panaon a nunoten ko lay pankaabigan na pamilyak.

³¹ Antoy upa ya iter kod sika? tepet nen Laban. Inmebat si Jacob, Anggapoy labay kon upa. Ituloy koy pangasikasok ed saray karniro yo no onabubon kayod sayan paknaan:

³² Onla ak natan ed kawalaan na saray karniro, tan alaen koy balang andeket a kordiro tan balang kanding a batekan o baklayan. Saraya labat so labay kon iyupa yod siak.

³³ Diad panakar na panaon, mainomay yon amtaen no niluko ta kayo o andi. No nengnengen yo ray ayayep ya inyupa yod siak, tan walay nanengneng yon kanding ya aliwan baklayan o batekan tan karniron aliwan andeket, nibaga yon tinakew.

³⁴ Inmebat si Laban, Marakep itan! Ontan sirin so gawaen ta.

³⁵ Balet diad saman ya agew inekal nen Laban iray kanding a kalakyan a gulisan o batekan tan saray kabatyan a baklayan tan batekan o walay ampotin batek; inekal to met iray andeket a karniro. Impaasikaso to rad saray anak ton lalaki,

³⁶ insan to ra inyarawid kinen Jacob a taloy agew no akaren so kaarawi to. Inasikaso nen Jacob ira may atilak ya ayayep nen Laban.

³⁷ Angalay Jacob na saray sanga na estoraki, almindra, tan platano, insan to inobakan iray arum a partiy sanga pian singa walay gulis dan ampoti.

³⁸ Inyan to ra yan sanga ed arap na saramay ayayep, diad pasen a paniinoman da. Inyan to rad man, ta mankakastaan ira no onla ran oninom.

³⁹ Lapud akastaan ira diad arap na saramay sanga nananak iray baklayan a binmawer, baklayan, tan batekan.

⁴⁰ Imbiig nen Jacob iray karniro ed saray kanding, tan impaarap to rad saray baklayan a binmawer tan andeket ya ayayep nen Laban. Diad onya, dinmakel lan dinmakel so ayayep nen Jacob tan imbiig to rad saray ayayep nen Laban.

⁴¹ No mankasta ray ayayep a maung so laman da, iyan nen Jacob ira may sanga ed arap da diad paniinoman da, pian mannginew ira ed pegley na saramay sanga.

⁴² Balet ag to iyan ira may sanga ed arap na saray ayayep a makapoy so laman. Ag abayag, kayaryan nen Laban iray makapoy so laman, tan kayaryan nen Jacob iray maung so laman.

⁴³ Lapud saya nagmaliw a mayamyaman si Jacob. Amayamay iray karniro, kanding, kamilyo tan asno to, tan aripen to.