Genesis 3 - Maung a Balita Biblia

Say Impankasalanan na Too

¹ Say oleg so sankasiliban ed saray amin ya ayayep a pinalsay Katawan a Dios. Tinepet na oleg ed samay bii, Imbaga tan tua na Dios ya ag yo kanen so bunga na dinanman a kiew ed tanamanan?

² Inmebat imay bii, Nayarian min kanen so bunga na dinanman a kiew ed tanamanan,

³ likud ed bunga to may kiew a walad pegley to. Imbagay Dios ed sikami ya ag mi kanen odino diwiten so bunga to man a kiew; no kanen mi o diwiten mi, ompatey kami.

⁴ Inkuanto may oleg, Aliwan tua tan; ag kayo ompatey.

⁵ Imbagay Dios itan ta amta ta a no kanen yo, magmaliw kayon singa Dios ya amta yo no anto so maung tan maoges.

⁶ Anengneng na samay bii a marakerakep imay kiew tan masamsamit a kanen so bunga to, tan sakey a pampilpilalekan a pakagamuray kakabatan. Kanyan amorbor na bunga, insan to kinan. Initdan toy asawa to, tan kinan to met.

⁷ Kapangan da, naitdan iray pakatalus tan naamtaan da a labus-lakseb ira; kanyan nandadait iray bolung na igos, insan da intapi-tapi.

⁸ Nen ngarngarem la arengel da so tanul na panaakar na Katawan a Dios ed tanamanan, kanyan inamutan dad otel na kakiewan.

⁹ Balet tinawag na Katawan a Dios imay laki, Iner so kawalaan mo?

¹⁰ Inmebat imay laki, Arengel ta kad tanamanan; antakot ak ta labuslakseb ak, kanyan inamutan ta ka.

¹¹ Tinepet na Dios, Siopay angibagad sikan labus-lakseb ka? Kinan mo sirin imay bunga ya imbagak ed sikan ag mo kanen?

¹² Inmebat imay laki, Samay biin inter mon kaibak et inter tod siak imay bunga, insan ko kinan.

¹³ Tinepet na Katawan a Dios ed samay bii, Akin et ginawam so ontan? Inmebat imay bii, Pinalikdo ak na samay oleg, et angan ak na samay bungay kiew.

Dinusa na Dios ira may Totoo

¹⁴ Insan inkuan na Katawan a Dios ed samay oleg, Nadusa ka lapud sayan ginawam; sika labat so nisamba ed amin da ray ayayep. Saya so dusam: Manlapud natan manilak-ilak ka, tan say dabuk so kanen mo legan mon mambilay.

¹⁵ Pambosulan ta ka tan samay bii; mambosulan lawas so anak mo tan say anak to. Temeken na anak to so olom tan ketketen mo so mokur da.

¹⁶ Inkuanto natan ed samay bii, Aruman koy gunigon mo no manlokun ka tan nairapan ka ed pananak mo. Anggaman ontan, pampilalekan mo nin siansiay asawam tan sikatoy manoley ed sika.

¹⁷ Inkuantod samay laki, Dinengel moy asawam tan kinan moy prutas ya imbagak ed sikan ag mo kanen. Lapud sayan ginawam, nisambay dalin. Nakaukolan a mansagput kay baleg legan mon mambilay, pian mangiter so dalin na malaem a taganom.

¹⁸ Patuboen to ray dika-rika tan sabisabit, tan mangan ka ray tantanaman a balang.

¹⁹ Nakaukolan moy manlinget tan mansagput na baleg, pian makaiter so dalin na antokaman a napambilay ya anggad ipatey tan ipawil mod dalin a nanlapwan mo. Nanlapu kad dalin, tan magmaliw ka lamet a dalin.

²⁰ Eva so impangingaran nen Adan ed samay asawa to, ta sikatoy ina na amin a katoowan.

²¹ Insan say Katawan a Dios nanggawa na saray kawes a katat a para si Adan tan samay asawa to, tan kinawesan to ra.

Apataynan ed Tanamanan si Adan tan si Eva

²² Insan inkuan na Katawan a Dios, Nagmaliw la a singa sakey ed sikatayo so too, tan wala lay pakaamta tod maung tan maoges. Nakaukolan a sebelan a mangala na bungay kiew na bilay, ta no mangala tan mangan, mambilay ya anggad angga.

²³ Kanyan say Katawan a Dios pinataynan tod tanamanan na Eden imay too, pian nadalusan toy dalin a nanlapwan na laman to.

²⁴ Diad bandad bokig na tanamanan na Eden angipasen na saray kirubin tan sakey a mandarlang ya ispada a manwasiwas ed amin a dapag, pian anggapoy makaasingger ed samay kiew na bilay.