Genesis 18 - Maung a Balita Biblia

Nisipan a Nawalaay Anak si Abraham

¹ Pinmanengneng so Katawan ed kinen Abraham diad saray masanton kiew nen Mamre. Manyodyorung si Abraham ed puirtay tulda to nen kapetapetangay agew;

² tinmangwa, et anengneng toy taloran totoo a manalalagey irad ag arawin pasen. Binatik to ran tampol ya inabet, insan dinmakmomo ya anggad dalin so lupa to.

³ Inkuanto, Wadya ak a magter a manlingkur ed sikayo. Ag yo komun lalabasay abung ko; tonda ki nin magano.

⁴ Abuloyan yo ak a mangalay danum a panoras yoy sali yo; nayarian yoy mampainawad silong to yan kiew.

⁵ Mangala ak met na kanen yo, pian naitdan kayoy biskeg a mangituloy na panaakar yo. Pinagalangan yo ak ed inyakar yo dia, kanyan abuloyan yo aka manlingkur ed sikayo. Inmebat ira, Salamat; sigi sirin.

⁶ Linmoob a tampol si Abraham ed tulda tan inkuantod Sara, Ganatan mo, mangala kay sankaabigan ya arina, tan manggawa kay tinapay.

⁷ Insan batik ed poluk na baka, tan angalay sakey a mataban kilaw, insan inter tod sakey ya aripen a nangganat ya angiparaan.

⁸ Angalay kiso, gatas, tan samay niluton karniy kilaw, insan to ra-imparongo ed saramay taloran too. Sikaton diliy nansirbid sikara legan dan angan diad silong na kiew.

⁹ Tinepet dad sikato, Kawalaan nen asawam a Sara? Wadyad dalem na tulda, ebat to.

¹⁰ Inkuan na sakey ed sikara, Siam bulan a manlapud natan, ompawil ak dia, et wala lad satan so lakin anak nen Sara. Wadmay Sara ya onderengel ed biek na puirta a nibeneg nen Abraham.

¹¹ Mataktakken la ra di Abraham tan Sara, tan ag la naliliberay Sara.

¹² Kanyan inmelek a bukor si Sara tan inkuantod sikaton dili, Natan ta akolaw ak la, manliket ak ni kasin miakdul? Insan sakey ni, matakken met lay masiken ko.

¹³ Tinepet na Katawan ed kinen Abraham, Akin et inmelek si Sara tan inkuanto, Makapananak ak ni kasi, anta akolaw ak la?

¹⁴ Akin, walay mairap ed Katawan? Onung na inkuanko la, siam bulan a manlapud natan, ompawil ak dia, et wala lad satan so lakin anak nen Sara.

¹⁵ Lapud antakot si Sara, ag to inako. Ag ak pa inmelek, inkuanto. Ag ka la mantitila, ebat to. Inmelek ka.

Impikasi nen Abraham so Sodoma

¹⁶ Pinmikal la ra may lalaki tan linma rad pasen a naosdungan day Sodoma; akilay Abraham, ta pasiputen to ra.

¹⁷ Inkuan na Katawan ed sikaton dili, Ag ko iyamut ed kinen Abraham so gawaen ko.

¹⁸ Magmaliw a baleg tan makapanyarin bansa iray kabyangay boleg to, tan diad panamegley to bindisionan kon amin iray bansa.

¹⁹ Sikatoy pinilik, pian niganggan to ray anak to tan saray kabyangay boleg to ya ontoluk irad siak diad panggawa ray kaptekan tan katonungan. No gawaen da ya, sumpalen koy amin ya insipan kod sikato.

²⁰ Insan inkuan na Katawan ed kinen Abraham, Makapataktakot iray dalem ed siak sumpad Sodoma tan Gomorra, tan balbaleg so kasalanan da.

²¹ Nakaukolan ya onakseb ak, ta kabaten ko no tua kasi o andi ira yan nadngelan kon dalem.

²² Linma la ra may duaran lalaki tan amaarap irad Sodoma, balet tinmilak so Katawan ed kinen Abraham.

²³ Sinmingger si Abraham ed Katawan tan inkuanto, Talaga sirin a deralen mo ray matonung a totoo, pati saray maoges?

²⁴ No wala bilang ed siudad so limamplon totoo a matonung, deralen mo nin siansiay intiron siudad? Ag mo kasi palabasen, pian nilaban ira may limaplo?

²⁵ Andi-duaruwan ag mo pipatey iray matonung ed saray maoges. Ag nayarin balut a gawaen moy ontan. Ta no gawaen mo, napidusa ray matonung ed saray maoges. Ag nayarin balut! Ag ta matonung so huis na intiron mundo?

²⁶ Inmebat so Katawan, No walay narumog kon limamplon matonung a totoo ed Sodoma, ag ko la deralen so intiron siudad lapud sikara.

²⁷ Nansalita lamet si Abraham, Pasinsiaan mo pa lay tepel na linawak a misalita lamet ed sika, Katawan. Sakey ak labat a too, tan anggapoy kanepegan kon onkerew.

²⁸ Balet nayarin wala rad may apataplo tan liman totoo a matonung, aliwan limamplo. Deralen mo kasiy intiron siudad lapud kulang na limarad limaplo? Inmebat so Katawan, No walay narumog kon apataplo tan liman totoo a matonung, ag ko la deralen lapud sikara.

²⁹ Nansalita lamet si Abraham, No bilang ta apataplo ra, deralen mo ni kasi? Inmebat, No walad may apataplo, ag ko la deralen lapud sikara.

³⁰ Inkuanen Abraham, Ag ka komun mamapasnuk, Katawan, ta mansalita ak lamet. No bilang ta talomplo ra, deralen mo ni? Inmebat, No walad may talomplo, ag ko deralen lapud sikara.

³¹ Inkuanen Abraham, Pasinsiaan mo pa lay tepel na linawak, ta mikasi ak lamet ed sika, Katawan. No bilang ta dogduamplo ra, deralen mo ni? Inmebat, No walad may narumog kon duamplon matonung, ag ko la deralen lapud sikara.

³² Inkuanen Abraham, Ag ka komun mamapasnuk, Katawan, ta mikasi ak nin maminsan. No bilang ta samsamploray narumog diman a matonung? Inmebat, No walay samplora, ag ko deralen lapud sikara.

³³ Kasumpal na Katawan ya akisalitad kinen Abraham, linma la tan sinmempet met lay Abraham.