Genesis 15 - Maung a Balita Biblia

Akisipanay Dios ed kinen Abram

¹ Kasumpal to yan inkagawa, walay pasingayew ed kinen Abram tan arengel ton inkuan na Katawan ed sikato, Ag ka natatakot, Abram. Salimbengan ta kad kaatapan tan itdan ta kay baleg a tumang.

² Balet inkuanen Abram, Katawan a DIOS, antoy kaabigan ya iter ed siak na tumang mo, anta anggapo met so anak ko. Si Eliezer labat a taga Damasco so tumatawir ko.

³ Ag mo ak initday anak, kanyan say sakey ed saray aripen ko so manawir ed saray kayaryan ko.

⁴ Arengel to lamet ya inkuan na Katawan, Ag tawiren nen Eliezer ya aripen mo iray kayaryan mo; say dilin anak mo so manawir.

⁵ Say Katawan pinapaway to tan inkuanto, Nengneng moy tawen tan salim a bilangen iray bitewen; ontan naani so karakel na saray kabyangay boleg mo.

⁶ Anisiay Abram ed Katawan, tan lapud sayan pananisia to say Katawan impasen ton matonung si Abram.

⁷ Insan inkuan ed sikato na Katawan, Siak so Katawan ya amataynan ed sika manlapud Ur na Babilonia, pian niiter kod sika yan dalin.

⁸ Balet tinepet nen Abram, Katawan a DIOS, panoy pakaamtak a nakayaryan ko yan dalin?

⁹ Inmebat, Awit ka diay sakey a baka, sakey a kanding, tan sakey a karniro, a mantaon iran amin na talora. Awit ka dia met na sakey a sibong na malapati tan sakey a palekpek.

¹⁰ Inawit nen Abram ira yan ayayep ed Dios, pinaldua to ra likud ed saramay manok, insan to ra impandarasig a nampepetekan so balang kapaldua.

¹¹ Dinapoan ira na saray buitri, balet inaabul ira nen Abram.

¹² Nen onseselek lay agew, akaogip na malmalet si Abram, tan balbaleg a takot so sinmabid sikato.

¹³ Inkuan na Katawan ed sikato, Magmaliw iran sangkaili ed sakey a bansa iray kabyangay boleg mo; aripenen da rad man tan pairapen da ran apat a lasus a taon.

¹⁴ Balet dusaen koy bansan mangaripen ed sikara, tan dakel a kayamanan so awiten da no taynan da man a bansa.

¹⁵ Sika, andokey so bilay mo, mareen so ipatey mo, insan ka nipompon.

¹⁶ Onlabas so apatiran kailalakan kasakbayan a makapawil ira diay kabyangay boleg mo. Pansiansiaen kon panayamen ira diay Amorreo ya anggad alablabas lay inkaoges da, insan ko ra dusaen tan pataynanen.

¹⁷ Nen sinmelek lay agew tan ambilonget la, biglan walay banga a manasasewek tan kiew a mandarlang a dinmalan ed nanleetan na saramay pinalduan laman na ayayep.

¹⁸ Diad saman ya agew, akisipanan so Dios ed kinen Abram. Inkuanto, Isipan kon iter ed saray kabyangay boleg mo yan dalin, manlapud ketegan na Egipto ya anggad Ilog na Eufrates,

¹⁹ pati saray dalin da ray Cineo, Cinezeo, Cadmoneo,

²⁰ Heteo, Perezeo, Rafaita,

²¹ Amorreo, Cananeo, Gergeseo, tan Jebuseo.