Genesis 13 - Maung a Balita Biblia

Nansian no Nila di Abram tan Lot

¹ Manlapud Egipto linmay Abram ed bandad abalaten na Canaan a kaiba to si Sarai ya asawa to tan amin a kayaryan to; akilad sikato si Lot.

² Mayamyaman lay Abram, ta amayamay la ray karniro, kanding, baka, pilak tan balituk to.

³ Tinmaynan lamet diman tan nanalis-alis so nankampoan to ya anggad akasabit Betel. Insan asabi to may pasen a nanleetan na Betel tan Ai a nanayaman to nen samam

⁴ tan nanggawaan toy altar. Diman to inggalang so Katawan.

⁵ Si Lot a kaiba nen Abram et wala met iray karniro to, kanding tan saray baka to; wala met so dilin pamilya to tan saray dilin aripen to.

⁶ Kulang so pampastolan no manolup iran dua, ta dakerakel iray ayayep da.

⁷ Lapud saya mabetbet so siblangan da ray pumapastol nen Abram tan saray pumapastol nen Lot. (Diad saman a panaon, manaayam nid man iray Cananeo tan saray Perezeo.)

⁸ Inkuanen Abram ed kinen Lot, Sankanayon ita, tan ag nepeg a mansebeg iray totook tan saray totoom.

⁹ Say maung, mansiyan ita la. Pilim so labalabay mon dalin. Lakad sakey a pasen; onla ak balet ed sananey.

¹⁰ Ninengneng sirin nen Lot so kaliber-liber tan abantag ton say patar na Jordan ya anggad Zoar et dakel so danum to, a singa Tanamanan na Katawan o singa dalin na Egipto. (Diad saman a panaon, ag ni dineral na Katawan so siudad na Sodoma tan say siudad na Gomorra.)

¹¹ Kanyan pinili nen Lot a betang to so intiron Patar na Jordan, insan amaarap diman ed bokig. Onyay impansian dan dua.

¹² Tinmilak si Abram ed Canaan, balet nanayam si Lot ed saray siudad diad patar ya asingger ed Sodoma.

¹³ Maoges iray totood man; mapalaloy kasalanan dad Katawan.

Inmalis ed Hebron si Abram

¹⁴ Kasiput nen Lot, inkuan na Katawan ed kinen Abram, Manlapud tan ed kawalaan mo, nengneng mon maung so kaliber-liber mo;

¹⁵ amin a dalin a nabantag mo, iter kod sika tan diad saray kabyangay boleg mo, tan kayaryan mo ra ya anggad angga.

¹⁶ Diad karakel na iter kod sikan kabyangay boleg mo, no bilangen mo ra singa ka mambibilang na dabuk.

¹⁷ Natan sirin, liber mo yan dalin, ta iter kod sikan amin.

¹⁸ Inyalis nen Abram so tulda to ed abay na saray masanton kiew ed Mamre diad Hebron tan nanayam diman. Nanggawad man met na altar a para Katawan.