Genesis 11 - Maung a Balita Biblia

Say Tori ed Babilonia

¹ Nen saman saksakey so salita tan panagbalikas na amin a katoowan ed intiron mundo.

² Nen amaarap irad bokig, asabi ray patar ed Babilonia tan nanayam irad man.

³ Inkuandad sakey tan sakey, Manggawa tayoy laryo tan palbaen tayo ran maung. Kanyan wala ray laryo ra a pinagkabato ra, tan alkitran a pinagkasiminto.

⁴ Insan inkuanda, Mangipaalagey tayoy sakey a siudad a walay tori ton toktokdulen toy tawen, pian ombantug itayo ta ag la pigan nikaykayat itayod intiron mundo.

⁵ Inmakseb so Katawan, ta nengnengen toy siudad tan say tori ya impaalagey na saraman a totoo,

⁶ insan inkuanto, Natan, saksakey ira yan totoo tan saksakey so salita ra. Gapo labat ya na getma ran gawaen. Ag mabayag, nagawaan da lay labalabay dan gawaen.

⁷ Onakseb itayo tan pandoromaen tayoy salita ra, pian ag ira makapantatalusan.

⁸ Inkayat ira sirin na Katawan diad intiron mundo, kanyan tinondaan da ya impaalagey imay siudad.

⁹ Babilonia so impanawag dad saman a siudad, ta diad sayan lugar impandoroma na Katawan so salita na amin a katoowan tan manlapud man, inkayat to ran amin ed intiron mundo.

Saray Kabyangay Boleg nen Sem

¹⁰ Sikara yay kabyangay boleg nen Sem. Kalabas na duay taon kayari to may linmabas a delap, si Sem, nen mantaon na sanlasus, walay anak ton laki a manngaray Arpaksad.

¹¹ Nambilay ni na liman lasus a taon tan wala ni ray arum ya anak ton lalaki tan bibii.

¹² Nen mantaon na talomplo tan lima si Arpaksad, awalaay ilalak a laki a si Sela;

¹³ nambilay ni na apat a lasus tan taloy taon tan wala ni ray arum ya anak ton lalaki tan bibii.

¹⁴ Nen mantaoy talomplo si Sela, walay anak ton laki a si Eber;

¹⁵ nambilay ni na apat a lasus tan taloran taon tan wala ni ray arum ya anak ton lalaki tan bibii.

¹⁶ Nen mantaoy talomplo tan apat si Eber, walay anak ton laki a si Peleg;

¹⁷ nambilay ni na apat a lasus tan talomplon taon tan wala ni ray arum ya anak ton lalaki tan bibii.

¹⁸ Nen mantaon na talomplo si Peleg, walay anak ton laki a si Reu;

¹⁹ nambilay ni na duan lasus tan siamira a taon tan wala ni ray arum ya anak ton lalaki tan bibii.

²⁰ Nen mantaon na talomplo tan dua si Reu, walay anak ton laki a si Serug;

²¹ nambilay ni na duan lasus tan piton taon tan wala ni ray anak ton lalaki tan bibii.

²² Nen mantaon na talomplo si Serug, walay anak ton laki a si Nacor;

²³ nambilay ni na duan lasus taon tan wala ni ray arum ya anak ton lalaki tan bibii.

²⁴ Nen mantaon na duamplo tan siam si Nacor, walay anak ton laki a si Tare;

²⁵ nambilay ni na sanlasus tan labinsiam taon tan wala ni ray arum ya anak ton lalaki tan bibii.

²⁶ Nen mantaon na pitomplo si Tare, walay anak ton lalaki a di Abram, Nacor, tan Haran.

Saray Kabyangay Boleg nen Tare

²⁷ Sikara yay kabyangay boleg nen Tare: si Tare so ama di Abram, Nacor, tan Haran. Si Haran so ama nen Lot,

²⁸ tan inatey si Haran diad dilin baley ton Ur na Babilonia nen mabilay niy ama to.

²⁹ Inasawa nen Abram si Sarai, tan inasawa nen Nacor si Milca ya anak nen Haran ya ama nen Isca.

³⁰ Anggapoy anak nen Sarai, ta lepes.

³¹ Tinmaynan si Tare ed baley na Ur na Babilonia, a kaiba toy anak ton Abram, si apo ton Lot ya anak nen Haran, tan si manugang ton Sarai ya asawa nen Abram. Linma rad dalin na Canaan, et nen asabi ray dalin na Haran, diman la ra nanayam.

³² Inatey diman si Tare nen mantaoy duan lasus tan lima.