Ezekiel 7 - Maung a Balita Biblia

Asingger lay Pansamput na Israel

¹ Akisalitad siak so Katawan.

² Inkuanto, Sika a toon ompatey, sikato yay ibabagak ed dalin na Israel, siak a Katawan a Dios: Sikato yay pansamput na intiron dalin!

³ Israel, sinmabi lay anggaan mo. Ondapod sikay pasnuk ko, lapud sisintinsiaan ta kad saray ginagawam. Singilen ta kad amin a makapaingungot a kagagawam.

⁴ Ag ta ka pirdonaen odino kasian. Dusaen ta ka lapud saray makapaingungot a ginagawam, pian naamtaan mo a siak so Katawan.

⁵ Sikato yay ibabaga na Katawan a Dios: Mantotombukay deral ya onsabid sika.

⁶ Sinmabi lay pansamput mo. Anggaan mo la. Ayari ka la.

⁷ Onsasabi lay pangangga yon totoo a manaayam ed dalin na Israel. Asingger lay isabi na panaon a gewgew labat so nagawa ed saray paganon panagdayewan ed toktok na palandey; anggapo lad satan so narengel a tanul na panliliket.

⁸ Ag la mabayag, ondapo lad sikayoy amin a biskeg na pasnuk ko. Sisintinsiaan ta kayo lapud saray ginagawa yo, tan singilen ta kayo lapud saray makapaingungot a kagagawa yo.

⁹ Ag ta kayo pirdonaen odino kasian. Dusaen ta kayo lapud saray makapaingungot a ginagawa yo, pian naamtaan yo a siak so Katawan tan siak so manudusad sikayo.

¹⁰ Onsasabi lay agew na kaderal yo. Ondarakel so panagduksa. Mapalalo lay panagpaatagey da ray totoo.

¹¹ Say gewgew et mambubungay kaogsan. Anggapoy mansiansian kayaryan da, saray kayamanan da, kagalangan da, odino inkatalonggaring da.

¹² Onsasabi lay panaon na golo. Asingger lay agew ya anggapoy kabaliksan na panlako tan pansaliw, lapud nampaparan dusaen na Dios so balang sakey a too.

¹³ Anggapoy nigosianti ya andokey so pambilay to pian nabawi toy apirdi to, lapud ondapod balang sakey a too so pasnuk na Dios. Ag makapaliis ed patey iray totoon maoges.

¹⁴ Napapaknul so trumpita, tan mampaparaan so balang sakey. Balet anggapoy anggan sakey ya onlad bakalan, ta ondapon para-para ed balang sakey so pasnuk na Dios.

Say Dusa na saray Kasalanan na Israel

¹⁵ Peles lay laban ed saray dalan, tan wala lay salot tan eras ed kaabungan. Ompatey ed laban so siopaman a walad kaalogan; ompatey ed sakit tan eras so siopaman a walad siudad.

¹⁶ Wala ray ombatik ed kapalandeyan tan singa ra malapatin ataktakot a nanlapud saray patar. Amin da pandageyeman da ray kasalanan da.

¹⁷ Onkapoy so lima ran amin tan ompayegpeg so pueg da.

¹⁸ Mankawes iray sako lapud ermen tan ompayegpeg so intiron laman. Nakiskisan so kaoloan da tan napelag iran amin ed kababaingan.

¹⁹ Ibanbantak dad saray dalan a singa dotak iray balituk tan saray pilak da, lapud ag ira nilaban na pilak odino balituk da no idapo na Katawan so pasnuk to. Ag da ra nikanan makapenek na nakaukolan da odino makapesel na narasan ya eges da. Say balituk tan say pilak so angipelag ed sikarad kasalanan.

²⁰ Nen saman inkikinon da ray mararakep ya alahas da, balet inkakana da rad panggaway makapaingungot iran talintao. Lapud saya impagmaliw na Katawan a makarimdimla iray balituk tan saray pilak da.

²¹ Abuloyan ko ray sangkaili a mantakew ed sikara, kuay Katawan, ta saray totoon maoges alaen da ray amin a kayamanan da, insan da ra dotak-dotaken.

²² Anggapoy pibabalik no adotakan so pinablik a Timplo, no looban na saray matatakew insan da dotakan.

²³ Agewgew ya amiy bengatlapateyan ed amin a sokung na bansa tan napno na inkaruksa iray siudad.

²⁴ Iyakar ko dia iray sankaogsan a bansa tan paalak ed sikara so kaabungan yo. Saray sankabiskegan a lalaki naekalan iray biskeg na linawa no palooben ko ray bansa a mandotak ed saray pasen a panangigalangan yo.

²⁵ Onsasabi lay kaermenan. Anapen yo so kareenan, balet ag yo narumog.

²⁶ Mantotombukan so deral, tan mansasbi so maoges a balita. Kerewen yod saray propita ya ipaamta ray nanenengneng dan nagawa ed arapen a panaon. Saray papari anggapoy amta ran ibangat ed saray totoo, tan saray mamasiken anggapoy nisimbawa ra.

²⁷ Manermen so ari, naekalan na ilalo so prinsipi, tan onggiwgiw ed takot iray totoo. Dusaen ta kayo lapud amin a ginagawa yo, tan sintinsiaan ta kayo onung na impansintinsia yo ed saray arum a totoo. Diad saya naamtaan yo a siak so Katawan.