Exodo 36 - Maung a Balita Biblia

¹ Si Bezalel, si Oholiab, tan amin nin arum a marunong a kumikimey, ya angiteran na Katawan na karunongan tan pakatalus a manggawa na antokaman a nakaukolan ed pangipaalagey na Tuldan Ayamay Katawan, et nepeg a gawaen day amin a bengatla onung na ingganggan na Katawan.

Saray Totoo Angyakar iray Amayamay a Rigalo

² Si Moises tinawag to ra di Bezalel, Oholiab tan amin nin arum a lalakin marunong a mankimey ya angiteran na Katawan na karunongan tan maliket iran ontulong, tan imbaga nen Moises ed sikara ya igapo da lay mankimey.

³ Inawat dad kinen Moises iray amin a bagat a maliket ya inyaakar na saray Israelita ya ikanad pangipaalagey na masanton Tulda. Balet saray Israelita intuloy day angyaakar ed kinen Moises na saray bagat da kapag kabwasan.

⁴ Insan saramay marunong a kumikimey a manggagawad santuario linma rad kinen Moises

⁵ tan kuandad sikato, Saray totoo et mangyaakar ira na masoluk nen say nakaukolan ed kimey ya ingganggan na Katawan a gawaen.

⁶ Kanyan si Moises ingganggan to ed intiron kampo ya ag la aruman na siopaman so bagat a para masanton Tulda; ag la sirin angyakar na bagat iray totoo.

⁷ Saray niyakar lan bagat et masoluk la a panumpal na amin a kimey.

Say Impanggawa na Tuldan Ayamay Katawan

⁸ Amin iray sankarunongan ed saramay mankikimey et sikaray nanggawa na Tuldan Ayamay Katawan. Ginawa ra ed samploran kurtina a pinon linen. Asul, purpura, tan ambalanga so tinebey da, tan binordaan da ra na saray kirubin.

⁹ Nampapara so kabaleg na balang sakey a kurtina; labinapat a yarda so dokey da tan duaran yarda so benlag da.

¹⁰ Impansasaip dan dinait so limara tan ontan met so ginawa ra ed limara.

¹¹ Nanggawa rad gilig na samput na kapag samay impansasaip na saray panagkawitan ya asul ya abel.

¹² Pineketan da na limamplon panagkawitan so onaan a kurtina ed sakey ya impansasaip tan limamplo met so samput a kurtina ed samay sakey; impanpepetekan da ra.

¹³ Nanggawa ra na limamplon balituk a panagkawit a sikaray amakasakey ed saramay duaran impansasaip a kurtina.

¹⁴ Insan nanggawa ra na labinsakey a kurtina a bagoy kanding a para sakbung na Tulda.

¹⁵ Ginawa da ran nampaparay kabaleg, labinliman yarda so dokey da tan duaran yarda so benlag da.

¹⁶ Impansasaip dan dinait so limara tan ontan met so ginawa ra ed saramay anemira.

¹⁷ Pineketan da na limamplon panagkawitan so gilig na samput a kurtina ed samay sakey ya impansasaip tan limamplo met so samput a kurtina ed samay sakey.

¹⁸ Nanggawa ra na limamplon gansan panagkawit a mamakasakey ed saramay duaran impansasaip, pian nagawa ran sakey a sakbung.

¹⁹ Nanggawa ni ray duaran sakbung, sakey so pinabalanga tan pinamagan katat na karniron kalakyan tan say sakey a pinon katat; inkana da ran sakbung ed tapew.

²⁰ Nanggawa ra na saray tablan akasia a pamaalagey na Tulda.

²¹ Limaran mitro so dokey na kapag tabla tan duamplo tan piton pulgada so lapar to,

²² tan walay duaran kagur to, pian makapantetekep ira yan tabla. Amin a tabla wala ray kagur da.

²³ Nanggawa ray duamplon tabla a para bandad abalaten na Tulda,

²⁴ tan nanggawa ra met na apataplon pilak a dapan na tabla, duaran dapan ed silong na kapag tabla a sikaray pineketan na duaran kagur.

²⁵ Nanggawa ra na duamplon tabla a para bandad baybay na Tulda,

²⁶ tan nanggawa ra met na apataplon pilak a dapan, duaran dapan ed silong na kapag tabla.

²⁷ Nanggawa ra na anemiran tabla para beneg na Tulda diad bandad sagur

²⁸ tan duaran tabla a para saray sokung.

²⁹ Sarayan tabla ed sokung et asangal ira manlapud leksab ya anggad tagey. Onyay impakagawa na saray duaran tabla a sikaray duaran sokung.

³⁰ Kanyan walay waloran tabla a walay labinanem a pilak a dapan da, duara ed silong na kapag tabla.

³¹ Nanggawa ra na labinliman balewet ya akasia, limara so para saray tabla ed sakey a diking na Tulda,

³² limara so para saray tabla ed sananey a diking, tan limara so para saray tabla ed bandad sagur na Tulda diad beneg to.

³³ Say karokey na pegley a balewet, a nilira ed pegley da ray tabla, et manlapud sakey a samput ya anggad sakey a samput na Tulda.

³⁴ Inokupan da na balituk iray tabla tan pineketan da na saray balituk a liken a mangegnad saray balewet a naokupan met na balituk.

³⁵ Nanggawa ra na kurtina a pinon linen. Asul, purpura, tan ambalanga so tinebey to tan binordaan da ra na saray kirubin.

³⁶ Nanggawa ra na apatiran lusek ya akasia a pangibitinan ed samay kurtina, inokupan da ra na balituk, tan pineketan da ra na saray panagkawit a balituk. Insan ira nanggawa na apatiran dapan a toonan na sarayan lusek.

³⁷ Inggawaan da na kurtina a pinon linen so lolooban na Tulda; asul, purpura, tan ambalanga so tinebey to tan binordaan da.

³⁸ Para sayan kurtina nanggawa ra na limaran lusek ya akasia a wala ray nipeket a panagkawit, inokupan da na balituk iray toktok da tan saray tekang da, tan nanggawa ra na gansan dapan para sarayan lusek.