Exodo 35 - Maung a Balita Biblia

Saray Totontonen a para Agew na Panagpainawa

¹ Si Moises tinawag to ray amin ya Israelita tan kuantod sikara, Sikato yay gawaen yo ya ingganggan na Katawan:

² Anem agew a makapankimey kayo, balet masanto so kumapiton agew, sakey a masanton agew na panagpainawa a nisaklang ed siak a Katawan. Siopamay mankimey ed satan ya agew nepeg a pateyen.

³ Ag kayo anggan mamaparlang ed dalem na kaabungan yo no Agew na Panagpainawa.

Saray Bagat ya Onkanad Masanton Tulda

⁴ Si Moises kuantod amin ya Israelita, Sikato yay ingganggan na Katawan:

⁵ Mangibagat kayo ed Katawan. Amin a maliket a mangibagat nepeg a mangisaklang na balituk, pilak, odino gansa;

⁶ pinon linen; asul, purpura, tan ambalangan tinebey; abel a bagoy kanding;

⁷ ambalangan pinamagan katat na karniron kalakyan; pinon katat; tablan akasia;

⁸ larak a para saray lamparaan; saray rikadon onkanad panaglana a larak tan ambalingit ya insinso;

⁹ kornalina tan arum iran alahas ya ipepeket ed ipod tan diad apis na pagew na Pangulon Pari.

Saray Kagawaan na Tuldan Ayamay Katawan

¹⁰ Dago kayon amin a marunong a kumikimey, ta gawa yoy amin ya ingganggan na Katawan:

¹¹ say Tulda, saray sakbung to, saray kawit tan saray tabla to, saray balewet to, saray lusek to, tan saray dapan to;

¹² say Kaban na Sipanan, saray tiken to, say sakub to, tan say mananib a kurtina;

¹³ say lamisaan, saray tiken to tan amin a kagawaan to; saray tinapay ya inyapay ed Dios;

¹⁴ say panangipatoonan na lamparaan a para silew tan saray kagawaan to; saray lamparaan tan say larak da;

¹⁵ say altar a panagpoolan na insinso tan saray tiken to; say panaglana a larak; say ambalingit ya insinso; say kurtina na lolooban na Tulda;

¹⁶ say altar a panagpoolan na saray bagat, pati say gansan parilya to, saray tiken to, tan amin a kagawaan to; say talyasi tan say ansagan to;

¹⁷ saray kurtinan pinagkaalar na Tulda, saray lusek to tan saray dapan to; say kurtina na pinagkaalar;

¹⁸ saray palpal tan saray lobir na Tulda tan say pinagkaalar to;

¹⁹ tan saray balibalin kawes na saray pari ya isolung da no manlingkur ira ed Masanton Pasensaray masanton kawes nen Aaron a pari tan saray lalakin anak to.

Saray Totoo Angyaakar iray Bagat da

²⁰ Saray amin ya Israelita tinaynan day Moises,

²¹ tan amin a maliket tan mabolus a mangibagat et inyaakar da ray bagat da ed Katawan a panggawa na Tuldan Ayamay Katawan. Inyaakar day amin a nakaukolan ya ikana ed pangigalang ed Dios tan diad panggawa na saray kawes na pari.

²² Amin a totoon mabolus so linawa, bii may laki, inyaakar da ray balituk a sara da, saray ikaw da, saray singsing da, saray kolintas da, tan amin a klasiy balituk ya alahas, tan insaklang da ra ed Katawan.

²³ Balang toon walay pinon linen to; asul, purpura, odino ambalangan tinebey; abel a bagoy kanding, ambalangan pinamagan katat na karniron kalakyan; odino pinon katat, inyakar to.

²⁴ Amin a totoon nayarian day mangiter na pilak odino gansa, inyaakar da ya imbagat ed Katawan, tan amin a walaan na tablan akasia a nayarin ikana ed antokaman a kimey, inyaakar da.

²⁵ Amin iray bibiin marunong a mankimey angyaakar ira na ginagawa ran pinon linen a tinebey tan saray tinebey ya asul, purpura, tan ambalanga.

²⁶ Nanggagawa ra met na bagoy kanding a tinebey.

²⁷ Saray pangulo angyaakar ira na saray kornalina tan arum ni ran alahas ya ipeket ed ipod tan apis na pagew;

²⁸ angyaakar met ni ra na saray rikado tan larak a para saray lamparaan, para panagpoyuk a larak, tan para ambalingit ya insinso.

²⁹ Amin da ray Israelita a maliket a mangibagat ed Katawan et mabolbolus dan inyaakar iray bagat da a para kimey ya ingganggan na Katawan a gawaen nen Moises.

Saray Totoon Angipaalagey na Tuldan Ayamay Katawan

³⁰ Si Moises kuantod saray Israelita, Say Katawan pinili toy Bezalel a lakin anak nen Uri tan apo nen Hur a kabyangan na boleg nen Juda.

³¹ Say Dios pinano to na pakayari to tan initdan to na karunongan, pakayari, tan pakatalus a manggawa na antokaman a kimey ya inartian,

³² nayarian toy mamplano na balibalin kimey tan nagawa to ra ed balituk, pilak, tan gansa;

³³ marunong a mantabas na saray alahas ya ilira tan mankorti na tabla tan arum ni ran inartian a kimey.

³⁴ Say Katawan initdan toy Bezalel tan si Oholiab, a lakin anak nen Ahisamac tan kabyangan na boleg nen Dan, na karunongan a mangibangat na arum a totoo na nipaakar ed dunong dan mankimey.

³⁵ Initdan to ra na karunongan a manggawa ed amin a klasiy kimey a gagawaen na saray managtatak na arti, managgolis na arti, tan managinaramey na pinon linen; asul, purpura, tan ambalangan lana; tan arum ni ran abel. Nayarian da a gawanen so antokaman a kimey tan marunong iran mangigolis na arti.