Exodo 29 - Maung a Balita Biblia

Saray Bilin a nipaakar ed Pangikonsagra ed Kinen Aaron tan saray Anak ton Lalaki

¹ Saya so gawaen mo ed kinen Aaron tan saray lalakin anak to diad pangikonsagram ed sikara, pian manlingkur iran papari ed siak. Mangala ka na sakey a kilaw a bakan kalakyan tan duaran karniron kalakyan ya anggapoy deral na laman da.

² Ikanam so sankaabigan ya arina, balet ag mo lalaukan na libadura, diad panggawam na tinapay. Igawam ed larak na oliba so arum ya arina, say arum igawam ya anggapoy larak, tan say arum gawam a maimpis a kanen a pinoranisay larak.

³ Ikargam irad baskit tan ibagat mo rad siak no isaklang mo may bakan kalakyan tan saramay duaran karniron kalakyan.

⁴ Iyakar mo ra di Aaron tan saray anak to diad lolooban na Tuldan ayaman ko tan ames mo ra onung ed ganggan.

⁵ Insan mo isolung ed kinen Aaron iray kawes na parisay antikey a taklay a kawes, say ipod, say andokey a kawes ya onlatup ed ipod, say apis na pagew, tan say balkes.

⁶ Itoon mod olo to so turban tan isinger mod saya so masanton tanda na impangisaklang ya akaitatakay, Nisaklang ed Katawan.

⁷ Insan mo alaen so larak a panagpoyuk, ikalbom ed olo to, tan poyukan mo.

⁸ Paasingger mo ray anak to tan solungan mo ra na kawes ya antikey so taklay;

⁹ balabalan mo rad awak tan isinger mod kaoloan da so sakub na toktok na olo. Ontan so pangikonsagram ed kinen Aaron tan saray lalakin anak to. Sikara tan saray kabyangay boleg da et nepeg a manlingkur iran papari ed siak diad ando lan ando.

¹⁰ Iyakar mod arap na Tuldan Ayamay Katawan so bakan kalakyan tan ibagam ed kinen Aaron tan saray lalakin anak to ya itapew dad olo to iray kalimaan da.

¹¹ Patey mod arapan ko so baka diad lolooban na Tulda.

¹² Mangala kay daiset a dala na bakan kalakyan tan diad panamegley na tamorom iponaris mod saramay pinagkasaklur na altar. Say keran dala ikalbom ed leksab na altar.

¹³ Insan mo alaen so amin a taba a kinmulyapot ed saray loob-loob, say sankaabigan a parti na altey, tan saray duaran batuk a pati taba ra, tan poolan mo ran sakey a bagat ed siak diad tapew na altar.

¹⁴ Balet poolan mod paway na kampo so laman na bakan kalakyan, say katat to tan say pait to; sikatoy bagat a para kasalanan.

¹⁵ Alam so sakey ed saramay karniron kalakyan tan ibagam ed kinen Aaron tan saray lalakin anak to ya itapew dad olo to iray kalimaan da.

¹⁶ Patey mo may karniro tan alam so dala to, insan mo isibo ed saray apatiran dapag na altar.

¹⁷ Tegtegteg mo may karniro; orasan mo ray loob-loob to tan saray sali to tan iyan mo ra ed tapew na olo to tan saray arum a tegteg.

¹⁸ Poolan mod tapew na altar so intiron karniro a sakey a bagat a popoolan. Makapaliket ed siak so balingit na sayan bagat.

¹⁹ Alam so sananey a karniro tan ibagam ed kinen Aaron tan saray anak to ya itapew dad olo to iray kalimaan da.

²⁰ Patey mo may karniro, tan mangala ka na daiset a dala to tan iporanis mod gilig na kawanan a kalayagan di Aaron tan saray anak to; iporanis mo met ed saray kawanan a tangan na kalimaan da tan diad saray kawanan a tangan na kasaliyan da. Isibom ed apatiran dapag na altar so keran dala.

²¹ Mangala ka na daiset a dala a walad altar tan say daiset a larak a panagpoyuk, tan iwalsik mo ra ed saray kawes di Aaron tan saray anak to. Diad ontan si Aaron, saray anak to, tan saray kawes da et nisaklang iran masanto ed siak.

²² Gerger moy taba na karniron kalakyan, say taba na ikul, say taba na saray loob-loob, say sankaabigan a parti na altey, saray duaran batuk a pati taba ra, tan say kawanan ya ulpo.

²³ Diad sambaskit a tinapay a nisaklang ed siak, mangala ka na sansasakey a tinapay: sakey a tinapay ya inggawad larak na oliba, sakey a tinapay ya ag inggawad larak, tan sakey a kanen a maimpis.

²⁴ Iyan mo ra yan amin a kakanen ed saray lima nen Aaron tan saray anak to tan paisaklang mo ran sakey a nidoma-doman rigalo ed siak.

²⁵ Insan mo ra alaen ed sikara tan poolan mo ra ed tapew na altar diad tapew na samay bagat a popoolan; tan sikato yay kakanen a bagat ed siak. Makapaliket ed siak so balingit na sayan bagat.

²⁶ Alam so pagew na sayan karniron kalakyan tan iyapay mon nidoma-doman rigalo ed siak. Sayan parti na ayep et kayaryan mo.

²⁷ No nikonsagra la so pari, say pagew tan say ulpo na karniron kalakyan ya inkanad pangikonsagra et nepeg ya iyapay a nidoma-doman rigalo ed siak tan nibiig a kayaryan na saray papari.

²⁸ Nepeg ya ag balut naoman yan imbagak; no saray totoo et mangisaklang ira na saray bagat a para kareenan, say pagew tan say ulpo na ayep et kayaryan ira na saray papari. Sikato yay rigalod siak a Katawan na saray totoo.

²⁹ Saray masanton kawes nen Aaron et nepeg ya ipalima ed saray anak to kayari na ipatey to, pian nisolung da ra no sikaray ikonsagra.

³⁰ Say lakin anak nen Aaron, ya onsalat ed sikato a sakey a pari tan onloob ed Tuldan Ayamay Katawan a manlingkur ed Masanton Pasen, et nepeg ya isolung to ra yan kawes ed loob na pitoran agew.

³¹ Alam so karni na karniron kalakyan ya inkanad impangikonsagrad kindi Aaron tan saray anak to tan ilambung mo ed sakey a masanton pasen.

³² Diad lolooban na Tuldan Ayamay Katawan so panganan dad saya, a pati saray tinapay ya atilak ed samay baskit.

³³ Kanen da so inkanad sirimonya na pakapaandiy kasalanan nen akonsagraan ira. Saray papari labat so nayarin mangan ed sayan kakanen, lapud masanto yan kakanen.

³⁴ No walay kerad kabwasan a karni odino tinapay, nepeg a poolan; ag nepeg a kanen, ta masanto.

³⁵ Diad loob na dugarugan pitoran agew gawam so sirimonya na pangikonsagra ed kinen Aaron tan saray anak to onung na ingganggan ko.

³⁶ Inagew-agew a nepeg mon ibagat so sakey a karniron kalakyan, pian napaandi so kasalanan; saya et linisan to so altar. Insan mo lanaan na larak na oliba, pian napasanto.

³⁷ Gawam ya ed loob na pitoran agew. Diad ontan magmaliw a sigput a masanto so altar, tan siopaman odino antokaman a makadiwit ed sayan altar et napasakitan, lapud pakayari na inkasanto to.

Saray Inagew-agew a Bagat

³⁸ Inagew-agew ed anggan kapigan a panaon, mangibagat kayo na duaran kordiro ya ataonan la.

³⁹ Ibagat yod kabwasan so sakey a kordiro tan diad labi say sakey.

⁴⁰ Say ononan kordiro tekepan yo na sakey kilon pinon arina a nikames ed sakey a litron puron larak na oliba tan sakey a litron alak a sikatoy sakey a bagat.

⁴¹ Ibagat yod labi so kumadwan kordiro, tan tekepan yo na singa karakel na arina, larak na oliba, tan alak a singa samay bagat ed kabwasan. Saya so kakanen a bagat ed siak a Katawan, tan makapaliket ed siak so balingit to.

⁴² Diad amin a panaon ya onsabi, sayan bagat a popoolan et nepeg ya ibagat ed arap ko diad lolooban na Tuldan Ayamay Katawan. Diman ak miabetan ed saray totoo tan mitongtong ak ed sika.

⁴³ Diman ak miabetan ed saray Israelita, tan say kagalangan ko pagmaliwen ton masanto iman a pasen.

⁴⁴ Gawaen kon masanto so Tulda tan say altar, tan gawaen ko met a masanto si Aaron tan saray anak ton lalaki, pian makapanlingkur iran papari ed siak.

⁴⁵ Manayam ak ed kawalaan na saray Israelita tan siak so Dios da.

⁴⁶ Naamtaan da a siak so Katawan a Dios da ya angipaway ed sikara ed Egipto, pian makapanayam ak ed kawalaan da. Siak so Katawan a Dios da.