Exodo 23 - Maung a Balita Biblia

Say Inkatonung tan say Kaptekan

¹ Ag yo iwawakawak so tila-tilan balita, tan ag yo tutulongan so toon nankasalanan diad pantasi yo na tila.

² Ag kayo mibibiang ed saray karaklan no maoges so gagawaen da, o no mantasi ra na tila diad pamikewret dad katonungan.

³ Ag yo kikilingan so mairap-bilay no salaysayen ed korti.

⁴ No nanengneng yon nablus so baka odino asno na kalaban yo, ipawil yod sikato.

⁵ No niparokul so asno na mamobosul ed sikayo, lapud belat na awit to, tulongan yon onalagey lamet imay asno; ag kayo ompapaliis.

⁶ Ag yo pipikeweten so katonungan na mairap-bilay no onapireng ed korti.

⁷ Ag kayo mantitila ed pandalem yo, tan ag yo papateyen so toon matonung tan anggapoy kasalanan, ta ag ko ipasen a matonung so toon manggawa na ontan a kaogsan.

⁸ Ag kayo mangaawat na pasoksok, ta say pasoksok bulagen to so too, kanyan ag to la nanengneng so katonungan, tan deralen to so kanepegan da ray anggapoy kasalanan.

⁹ Ag yo papairapen so sangkaili; amta yo so liknaan na sangkaili lapud sangkaili kayo met nen saman ed Egipto.

Say Kumapiton Taon tan say Kumapiton Agew

¹⁰ Diad loob na anem taon taneman yoy dalin yo tan ani yoy bunga da ray tanaman to.

¹¹ Balet diad kumapiton taon pampainawa yoy dalin yo, tan ag yo aanien so bunga na ontubon tanaman. Nayarin kanen la na saray mairap-bilay so antokaman ya ontubod man, tan nayarin buagen la na saray ayayep ed katakelan so antokaman a natilak. Onya met so gawaen yo ed saray kaubasan yo tan saray kaolibaan yo.

¹² Mankimey kayo na anem agew ed loob na sakey simba, balet ag kayo mankikimey ed kumapiton agew, pian makapampainawa ray aripen tan saray sangkailin kumikimey yo, a pati saray ayayep yo.

¹³ Dengel kayod amin a bengatlan imbagak ed sikayo, siak a Katawan. Ag kayo mampipikasi ed arum a diriyos; ag yo anggan bibitlaen so kangaranan da.

Saray Taloran Baleg a Pista

¹⁴ Diad loob na sakey taon mamitlo kayon mampista a pamagalang ed siak.

¹⁵ Diad bulan na Abib, say bulan ya intaynan yod Egipto, silibraan yo so Pista na Tinapay ya Anggapoy Libadura onung na ingganggan kod sikayo. Ag kayo mamangan na tinapay a pinaalsa ed libadura legan na pitoran agew na sayan pista. Ag kayo ondadagon mangigalang ed siak ya anggapoy awit yon bagat.

¹⁶ Silibraan yo so Pista na Panagani no igapo yo lan anien iray bungay tanaman yo. Silibraan yo so Pista na saray Abung-abung diad samput na taon, no borboren yo la ray bunga na kaubasan yo tan arum a tanaman yo.

¹⁷ Kapag taon diad sarayan taloran pista amin da ray lalaki ed sikayo et nepeg ya ondagon mangigalang ed siak a Katawan a Dios yo.

¹⁸ Ag kayo mangisasaklang na tinapay a pinaalsad libadura no mangibagat kayod siak na ayep. Say taba na saray ayep ya imbagat ed siak legan na sarayan pista et ag nepeg ya ikera ya anggad ontombuk a kabwasan.

¹⁹ Iyakar yo ed abung na Katawan a Dios yo so sankaabigan ya onaan a trigon naani yo. Ag yo ilulutod gatas na ina to so kordiro odino kilaw na kanding.

Saray Sipan tan saray Bilin

²⁰ Mangibaki ak na sakey ya anghil ya onona nen say sikayo, ta iyagel to kayo legan na pambiahi yo tan iyakar to kayo ed pasen ya imparaan ko.

²¹ Dengel kayod sikato tan onur yo. Ag kayo onsusumlang ed sikato, ta ag to pirdonaen iray onsumlang ed sikato. Sikato so imbakik.

²² Balet no onuren yo tan sumpalen yo ray amin ya ingganggan ko, siak so mibakal ed saray amin a kalaban yo.

²³ Onlan onona nen say sikayo so anghil ko tan iyakar to kayo ed dalin na saray Amorreo, saray Heteo, saray Perezeo, saray Cananeo, saray Heveo, tan saray Jebuseo, tan deralen ko ra.

²⁴ Ag kayo ondadakmomo odino mangigagalang ed saray diriyos da, tan ag yo aaligen iray kagagawa rad panangigalang da. Deral yo ray diriyos da tan igeba yo ray masanton lusek da a bato.

²⁵ No igalang yo ak a Katawan a Dios yo, bindisionan ta kayo na kanen tan inomen tan ekalen ko ray sakisakit yo.

²⁶ Diad dalin yo anggapoy biin naekalan, o biin lepes. Itdan ta kayo na andokey a bilay.

²⁷ Pagmaliwen kon antakot ed siak iray totoon onsumlang ed sikayo; gewgewen ko ray totoon bakalen yo tan papoliktaren kon amin iray kalaban yo tan ibatikan da kayo.

²⁸ Gawaen kon mangamanga ray kalaban yo; pagiten ko ray Heveo, saray Cananeo, tan saray Heteo legan na pankukurang yo.

²⁹ Ag ko ra pagiten ed loob na sakey taon; no pagiten ko rad loob na sakey taon, say dalin magmaliw a begtebegtew tan saray ayayep ed takel et ondakerakel iran onlaban ed sikayo.

³⁰ Ingen, inot-inoten ko ran pagiten ya anggad magenap lay karakel yon mangayaryan na dalin.

³¹ Ipasabik iray ketegan na dalin yo manlapud Dayat ya Akaba ya anggad Ilog na Eufrates, tan manlapud Dayat na Mediteraneo ya anggad kalawakan. Paoleyan kod sikayo ray amin a totoon manaayam ed dalin na Canaan tan pagiten yo ra legan na pankukurang yo.

³² Ag kayo misisipanan ed sikara odino anggan diad saray diriyos da.

³³ Ag yo aabuloyan a manayam ed bansa yo ira man a totoo; no abuloyan yo ra sagyaten da kayon mankasalanan ed siak. No mangigalang kayod saray diriyos da, andi-duaruwan patit ya ed sikayo.