Esdras 9 - Maung a Balita Biblia

Akabatan nen Esdras so Impanga-asawa na saray Judio ed saray Aliwan Judio

¹ Kayari na impakagawad sarayan amin, linma rad siak iray pigaran pangulo na saray totood Israel. Imbaga rad siak a saray totoo, saray papari, tan saray Levita et ag ira binmiig ed saray Cananeo, Heteo, Perezeo, Jebuseo, Ammonita, Moabita, Egipsio, tan Amorreo. Aaligen da ray makapaingungot a bengatlan gagawaen na sarayan totoo.

² Saray lalakin Judio et angaasawa ra na saray bibiin taga arum a bansa, kanyan alaukan so poli na masanton totoo na Dios. Saray pangulo tan saray opisyal so manonan, mananumlang.

³ Nen nadngel ko ya, pinipilat koy kawes ko diad pangipanengneng koy ermen ko, ginogonut koy buek ko tan say balbas ko, insan ak inmirung a mapalaloy ermen ko.

⁴ Inmirung ak diman a maerermen ya anggad oras na panangisaklang na bagat ed labi. Legan kon akayurong minokut ak na amin da ray totoon ataktakot lapud imbaga na Dios na Israel nipaakar ed saray kasalanan da ray pinmawil ed Jerusalem.

⁵ Nen sinmabiy oras na panangisaklang na bagat ed labi, inmalagey ak ed pasen a paneermenan ko. Akasolung nid siak imay apilat a kawes. Tinmalimukor ak a nampikasi tan inyonat ko ray limak ed Katawan a Dios ko.

⁶ Inkuan ko ambaing ak a mangitangway olok ed arap mo, O Dios. Atagey nen saray olo mi so bontun na saray kasalanan mi; toktokdulen da lay katawenan.

⁷ Nanlapu lad panaon na saray lalaki mi ya anggad natan, ontan la so impankakasalanan da ray totoom. Lapud saray kasalanan mi, sikami, saray arari mi tan saray papari mi et naplag kamid lima da ray ararid arum a bansa, tan pinapatey, tinatakewan, tan inyaakar da kami ed arum a bansa. Asigsigput kamin naplag ed kababaingan a singa kipapasen mi nin anggad natan.

⁸ Katawan a Dios mi, kinasian mo kamin agano tan inyabuloy mon akabatik so pigarad sikami tan manayam ya arawid kaatapan ed sayan masanton pasen. Inyabuloy mon nibatikan miy pangaaripen dad sikami tan initdan mo kamiy balon bilay.

⁹ Naaripen kami, balet ag mo kami pinaolyan ed saman a kipapasen. Lapud ag mangoman a panangarom initdan mo ray impirador ed Persia na puson maabagey ed sikami, kanyan inabuloyan da kami nin mambilay tan mangipaalagey lamet na Timplom ya aderal-deral. Inabuloyan da kami met a mambilay ya arawid kaatapan diad Juda tan diad Jerusalem.

¹⁰ Balet natan, a Dios, antoy nibaga mi kayari na saray agawa? Ag mi tinoluk iray ganggan mo

¹¹ ya inter mo rad sikami diad panamegley na saray aripen mon propita. Imbaga rad sikami a say dalin a panayaman mi et napnoy karotakan, lapud saray totoon nanaayam et pinano ra, manlapud sakey a ketegan ya anggad sakey a ketegan, na saray makapaingongot tan marotak a kagagawa.

¹² Imbaga rad sikami ya ag kamin balut mangasawa o miasawa ed saraman a totoo. Imbaga ra met ya ag mi ran balut tulongan ya onaligwas o ombolaslas, no labay min kayaryanen so kaabigan na dalin tan ando lan andon ipatawir mid saray kabyangay boleg mi.

¹³ Anggan kayari na impakadusa mi lapud saray maoges tan makapoy a ginagawa mi, amta mi, O Dios mi, a daiset nen say kanepegan min dusa so inter mod sikami tan inyabuloy mo ingen a makapambilay kami ni.

¹⁴ Kanyan anto niy makasengeg na isumlang mi lamet ed saray ganggan mo tan mangasawa o miasawa ed sarayan maoges a totoo? No gawaen mi ni ya, ompetapetang lay olom ed sikami tan sigput mo kami lan pateyen tan ag mo la abuloyan a walay natilak ed sikami.

¹⁵ Katawan a Dios na Israel, matonung ka, balet inyabuloy mon mambilay kami ni. Ipatwa mi ray kasalanan mid sika; anggapoy kanepegan min miarapan ed sika.