Esdras 6 - Maung a Balita Biblia

Asokayan so Ganggan nen Impirador Ciro

¹ Kanyan ingganggan nen Impirador Dario a nagaway pansokay ed saray awaran na ari a nisinup ira ed Babilonia.

² Balet diad siudad na Ecbatana diad luyag na Media so akarumogan na sakey a babasaen a nilokut ya akapangisulatan na onggendan:

³ Diad ononan taon na impanoley nen Impirador Ciro, ingganggan ton ipaalagey lamet ed Jerusalem so Timplo a pambagatan tan pangisaklangan na saray bagat a popoolan. Nepeg a talomplon mitro so kaatagey tan talomplon mitro so kaawang na ipaalagey lamet a Timplo.

⁴ Saray padir nepeg a tapewan na tabla diad balang mikatlon dasig na baton nantatapewan. Manlapud kayamanan na palasio so amin a gastosen.

⁵ Amin met iray balituk tan pilak ya ikakana na Timplo ya inaala nen Ari Nabucodonosor tan inyaakar to rad Babilonia so nepeg a nipawil irad pasen dan gendat diad Timplo ed Jerusalem.

Ingganggan nen Impirador Dario ya Ituloy so Kimey

⁶ Insan impawit nen Impirador Dario so onggendan ya ebat to: Diad kindi Tatnai a gobirnador na Sagur na Eufrates, Setar-bozenai, tan saray kapara yon opisyal ed Sagur na Eufrates. Arawian yo so Timplo

⁷ tan ag yo pibabalian so pangipapaalagey. Abuloyan yoy gobirnador na Juda tan saray pangulo da ray Judio ya ipaalagey da lamet so Timplo na Dios ed inalageyan to nen saman.

⁸ Igaganggan kod sikayo a tulongan yo ran mangipaalagey lamet. Nepeg a nabayaran a tampol iray amin a gagastosen da; say kuartad palasio a natitipon manlapud saray buis na Sagur na Eufrates so pangalaan na ibayar, pian ag ontonda so kimey.

⁹ Ag yo sasaewen ya iter ya inagew-agew, ed saray papari ed Jerusalem so antokaman ya ibaga rad sikayon nakaukolan da: saray kalakyan a kilaw a baka, saray karniro, odino saray kordiro ya isaklang iran bagat a popoolan ed Dios na Tawen, odino trigo, asin, alak, o larak na oliba.

¹⁰ Nepeg ya onyay nagawa, pian makapangisaklang ira na saray bagat a makapaliket ed Dios na Tawen. Nipikasi rad satan ya iter na Dios so bindision tod siak tan saray lalakin anak ko.

¹¹ Igaganggan ko met ni a siopaman ya onsumpad sayan ganggan ko ekalen ed abung to so sakey a panuksolan, otukan ed sakey a ngoro, insan idoyuk ed kabalgan to. Insan pagmaliwen a bunton na deralderal so abung to.

¹² Say Dios ya amilid Jerusalem a pasen a panangigalangan ed sikato et taloen to komun so siopaman ya ari o dinanman a bansan ag mangitaltalek ed sayan ganggan tan salien ton deralen so Timplod tan. Siak, si Dario, so mangigaganggan. Nepeg a sigput so pangonur ed ganggan ko.

Nisaklang so Timplo

¹³ Say ganggan na impirador et sigput a sinumpal di Gobirnador Tatnai, Setarbozenai, tan saray kapara ran opisyal.

¹⁴ Saray pangulo da ray Judio et maples so impangipaalagey dad Timplo, ta apabiskeg so linawa ra lapud saray salita di propita Aggeo tan Zacarias. Asumpal dan impaalagey so Timplo onung na impaiganggan ed sikara na Dios na Israel, tan di Ciro, Dario, tan Artajerjes ya impirador irad Persia.

¹⁵ Asumpal dan impaalagey so Timplo nen kumanem a taon na panooley nen Impirador Dario sanen kumatlon agew na bulan ya Adar.

¹⁶ Insan saray Israelita saray papari, saray Levita, tan amin da ray totoon pinmawil a manlapud inkibantaken dan bansamalikeliket dan insaklang ed Dios imay Timplo.

¹⁷ Nen isaklang day Timplo, angibagat ira na sanlasus a bakan kalakyan, duan lasus a karniro, tan apat a lasus a kordiro. Angisaklang met ira na labinduan kanding a bagat para kasalanan; sakey a bagat so para balang sakey a tribu ed Israel.

¹⁸ Nipasen ed saray kanepegan dan kimey ed Timplod Jerusalem iray papari tan saray Levita, onung na saray ibabagay nisulat ed libro nen Moises.

Say Paskua

¹⁹ Diad kumalabinapat ya agew na ononan bulan na ontombuk a taon, saray totoon pinmawil a manlapud inkibantakan dan bansa et sinilibraan day Paskua.

²⁰ Amin da ray papari tan amin a Levita et nilinisan day sikaran dili onung ed ganggan. Pinatey na saray Levita iray ayayep ya ibabagat no Paskua; para amin da ray totoon pinmawil, para saray papari, tan para sikara.

²¹ Saramay bagat et kinan na amin da ray Israelitan pinmawil tan saray amin a totoon tinondaan day paganon kagagawa na saray arum a totoon manaayam ed saman a dalin tan dinmago ran mangigalang ed Katawan a Dios na Israel.

²² Pitoy agew a sigput so liket dan nansilibra ed Pistay Tinapay ya Anggapoy Libadura. Malikeliket ira lapud ginawa na Katawan so Impirador na Asiria a maabig so linawa tod sikara, kanyan initdan to ra na ginastos dad impangipaalagey da lamet ed Timplo na Dios na Israel.