Esdras 4 - Maung a Balita Biblia

Say Insumlang ed Pamapaalagey

¹ Nadngelan na saray kalaban da ray totoo ed Juda tan Benjamin a saray pinmawil ed Jerusalem manlapud inkibantakan dan bansa et ipapaalagey da lamet so Timplo na Katawan a Dios na Israel.

² Kanyan linma rad kinen Zorobabel tan saray pangulo da ray boleg tan kuanda, Ibaan mi kayo a mangipaalagey na Timplo. Igagalang miy Dios ya igagalang yo tan mangibabagat kamid sikato nanlapu lad samay panaon ya imbaki kami nen Impirador Esar-hadon na Asiria, a manayam dia.

³ Inkuan ed sikara di Zorobabel, Josue, tan saray pangulo da ray boleg, Ag mi kaukolay tulong yod pangipaalagey na sakey a timplo para Katawan a Dios mi. Sikamin diliy mangipaalagey onung na ingganggan ed sikami nen Impirador Ciro na Persia.

⁴ Insan saray arum a totoon manaayam lad saman a dalin et pinabetel day linawa na saray Judio tan tinaktakot da ra, pian ag da la ituloy ya ipaalagey so Timplo.

⁵ Pinapasoksokan da ray opisyal ed gobirno, pian sumpaen da ra. Ag da tinondaan a ginagawa ya, legan na impanoley nen Impirador Ciro ya anggad impanoley nen Impirador Dario.

Say Insumlang ed Pamaalagey Lamet na Jerusalem

⁶ Insan diad kagapo na impanoley nen Impirador Asuero, insegep na saray kalaban da ray totoon manaayam ed Juda tan Jerusalem iray nisulat a dalem sumpad sikara.

⁷ Diad legan na panooley nen Impirador Artajerjes ed Persia nansulat ed impirador ira di Bislam, Mitredates, Tabeel, tan saray kakaiba ra. Say salitan Aramaica so inkana ed sayan sulat da, kanyan nepeg ya ipatalus no ibasa.

⁸ Nansulat met ed impirador si Rehum a gobirnador, tan si Simsai a sikritario na luyag. Saya so sulat diad Impirador Artejerjes nipaakar ed Jerusalem:

⁹ Nanlapu yan sulat ed kinen Rehum a gobirnador, tan si Simsai a Sikritario na luyag, saray kakaiba ra, saray huis, saray arum ya opisyal a gendat iran taga Erec, Babilonia, tan Susa, diad dalin na Elam,

¹⁰ tan saray arum a totoon pinaekal nen matalonggaring tan makapanyarin Asnapar ed panaayaman da, insan to ra impanayam ed siudad na Samaria tan arum ni ran pasen diad Luyag na Sagur na Eufrates.

¹¹ Saya so logan na sulat: Diad Impirador Artajerjes: nanlapu yan sulat ed saray aripen ton manaayam ed Sagur na Eufrates.

¹² Labay min ipaamta ed sika, Kagalang min Impirador, a saray Judion linma dia a nanlapud arum a nasasakopan yon dalin et manaayam la rad Jerusalem tan ipapaalagey da lamet so maoges tan mananumlang a siudad. Inggapo da lan ipapaalagey lamet iray padir, et ag mabayag nasumpal da la.

¹³ Kagalang min Impirador, no nipaalagey la lamet yan siudad tan nasumpal la ray padir to, ag la mambayar na buis iray totoo, et diad onya ondaiset so onloob a kuarta ed palasio.

¹⁴ Ag mi labay ya onyay nagawa, lapud walay utang na linawa mid Kagalang ya Impirador. Kanyan kerewen mid sika

¹⁵ a pasokayan mo ray awaran na saray lalakim. No gawaen mo ya, naamtaan mo a sayan siudad et mananumlang tan nanlapu la nen saman naniiter na gunigon ed saray arari tan saray manoley ed saray luyag. Gendat a mairap ya oleyan iray totoo to. Sikato yay makasengeg no akin et aderal iman a siudad.

¹⁶ Ag kami sirin manduaruwa a no nipaalagey lamet yan siudad tan nasumpal iray padir to, ag la naoleyan na Kagalang min Impirador so Luyag na Sagur na Eufrates.

¹⁷ Impawit na impirador yan ebat: Awat yoy pabanok ed sikayo: Rehum a gobirnador, Simsai a sikritario na luyag, tan saray kaiba yo a manaayam ed Samaria, tan saray arum a pasen ed Sagur na Eufrates.

¹⁸ Nipatalus tan nibasad siak imay sulat ya impawit yo.

¹⁹ Ingganggan kon nagawa so sakey a panosisa, et arumog a nanlapu la nen saman linmalaban a tua so Jerusalem ed saray arari, tan amayamay iray manaayam diman a mananumlang tan managgaway gulo.

²⁰ Nanooley diman iray ararin makapanyari tan inooleyan da so intiron luyag na Sagur na Eufrates, tan nanaala rad man na saray buis.

²¹ Kanyan iganggan yo ra man a totoo a tondaan dan ipaalagey lamet so siudad, anggad pangiganggan kon ituloy.

²² Sumpal yon tampol yan bilin ko, pian napatonda so antokaman nin makagunigon ed siak.

²³ Kapangibasad sayan sulat a nanlapud Ari Artajerjes ed arap di Rehum, Simsai, tan saray kakaiba ra, nangganat iran linmad Jerusalem, tan pinasoot dan pinatonda ray Judio ed pamapaalagey da lamet na siudad.

Nitubat so Kimey ed Timplo

²⁴ Apatonday kimey ed Timplo tan nansiansian ag adiwit ya anggad kumadwan taon na panooley nen Impirador Dario na Persia.