Ecclesiastes 2 - Maung a Balita Biblia

¹ Ginetmak a panliketen koy laman kon dili tan suboken ko no anto so kabaliksan na liket. Balet arumogan ko a saya et andi-kakanaan met.

² Asokayan ko a say elek et inkakulang-kulang, tan say liket et anggapoy iiter ton kaabigan.

³ Lapud pilalek kon nagamuray kakabatan, ginetmak a paliketen koy laman kon dili diad paninom koy alak. Ninunot ko, a sikato ya angangkoy sankaabigan a gawaen na saray totoo legan na antikey a pambilay da diad tapew na dalin.

⁴ Nanggawa ak na saray matalonggaring a bengatla. Angipaalagey ak na saray abung ko tan nantanem ak na saray amayamay ya ubas ko.

⁵ Nanggawa ak na saray tanamanan tan saray plasa, tan tinaneman ko na saray nandoroman kiew a mambunga.

⁶ Angotkot ak na saray bobun a panalaay pansalug ed saraya.

⁷ Angaliw ak na amayamay ya aripen, tan wala ray aripen a nianak ed abung ko. Dakerakel ni ray ayayep ko nen say anggan siopan too a nanayam ed Jerusalem.

⁸ Nantipon ak na amayamay a pilak tan balituk a nanlapud saray kayamanan na ari diad saray dalin a nanoleyan ko. Wala ray lalaki tan bibiin nankakanta tan nansasayaw a pamaliket dad siak. Wala siak ya amiy bibiin niamung na too.

⁹ Matalonggaring ak a mapalalo nen say anggan siopan nanayam ed Jerusalem, tan nansiansiad siak so kakabatan ko.

¹⁰ Nalak ya amin iray labalabay ko. Ag kon balut sinibletan so laman ko ed antokaman a liket. Inkinon kon amin iray kinimeyan ko, tan tumang ko ra yan amin.

¹¹ Insan ko dinalepdep ya amin iray ginagawak tan say ontan lan impansasagput ko ed impanggagawak. Abirbir kod satan ya anggapoy kakanaan da. Singa ak labat inmosil ed dagem; anggapoy agunggonak.

¹² Ta say katwaan to, nagawaan labat na ari iray ginagawa la na saray ararin akaona nen say sikato. Kanyan ginapwan kon dinalepdep so kabaliksan na kakabatan, odino kalokowan, tan inkakulang-kulang.

¹³ Et naamtaan ko a maung niy kakabatan nen say inkakulang-kulang, a singa say liwawa maung ni nen say bilonget.

¹⁴ Saray totoon makabat nanenengneng da so lalaen da, balet saray makulang-kulang ag da nanenengneng. Balet naamtaan ko met a saksakey so pansumpalan tayon amin.

¹⁵ Insan ninunot kod siak a dili, No antoy nagagawa ed makulang-kulang, nagawa met ed siak. Anto sirin so nagamuran ko ed mapalalon inkakabat ko? Anggapo, ta andi-kakanaan ya, ebat kod dilin tepet ko.

¹⁶ Anggapoy makakanunot ed saray makabat, anggapo met so makakanunot ed saray makulang-kulang. Diad arapen iran agew, nalingwanan itayon amin. Ompatey ya amin iray katoowan, makabat may makulang-kulang.

¹⁷ Kanyan impasen kon anggapoy kabaliksan so bilay, lapud gunigon labat so inter tod siak. Amin et andi-kakanaan; singa ak inmosil labat ed dagem.

¹⁸ Anggapoy kabaliksan dad siak iray nansagputan tan nalmoan ko, lapud amtak a nepeg ko ran itilak ed onsalat ed siak.

¹⁹ Nayarin makabat odino makulang-kulang so onsalat ed siaksiopay makaamta? Kayaryanen ton amin iray nansagputan ko tan nalmoan kod sayan mundo lapud kakabatan ko. Andi-kakanaan ya amin.

²⁰ Kanyan nagbabawian koy ontan lan impansasagput ko.

²¹ Mansasagput ka ya ipoonan mo so kakabatan, pakatalus tan dunong mo, insan mo itilak ed toon ag balut nansagput. Sakey yan andi-kakanaan, tan sakey a baleg a kaogsan.

²² Mankikimey tan mapagpaga ka legay bilay mo, et antoy nagunggonam?

²³ Amin a gawaen mo, legay pambilay mo, kapagaan tan sakit na olo so iter da. Anggan diad labi ag mandeen so kanunotan mo. Sakey met yan andikakanaan.

²⁴ Say sankaabigan a gawaen na sakey a too et say pangan, iyinom, tan say panliket tod saray nansagputan to. Balet abirbir ko met ya anggan saya et nanlapud Dios.

²⁵ No anggapoy Dios, panoy pakalam na antokaman a kanen mo odino panoy pakapanliket mo?

²⁶ Iiter na Dios so kakabatan, pakatalus, tan liket ed saray mamapaliket ed sikato, balet pankikimeyen, panaanapen, tan pantitiponen to ray makasalanan pian walay niiter ed saray mamapaliket ed sikato. Sakey met yan andi-kakanaan. Singa ka onoosil labat ed dagem.