Ecclesiastes 12 - Maung a Balita Biblia

¹ Kanyan nunot yoy Manamalsa yo legan a wala ki nid kalangweran, kasakbayan ya onsabi ray magunigon ya agew tan taon ya ikuanyo, Ag ak la manliliket ed sayan bilay.

² Saraya so panaon a say liwaway agew, say bulan, tan saray bitewen et ombilonget la rad matam, tan ag la naandi so oran na lorem.

³ Diad satan, onggiwgiw la ray taklay mon angyaagel na bilay mo nen saman, tan onkalug la ray pueg mo. Nangileb-ngileb ka met lad satan kanyan ag mo la nagatgat so kanen mo, tan onkuyep met lay pakanengneng mo.

⁴ Ag mo met lad satan narengel so tanul ed dalan. Singa labat esaes so pakarengel mod ungol na gilingan, odino say togtog na musika, balet nabangon kad oni na manok.

⁵ Ontakot ka ed atagey iran pasen, tan ag mo la nayarian so manakar a mambukbukor. Ompoti so buek na olom, tan kerengkereng ka met lan manakar. Naandi lad sikay amin a pilalek. Onla itayo ed andi-anggaan a panayaman tayo tan diad saray dalan narengel iray kanta na kaermenan.

⁶ Napoltut so pilak a golunggolung, tan napelag tan nabetag so balituk a lamparaan; napoltut so lobir na bobun tan namekmek so boyug.

⁷ Ompawil ed dabuk na dalin so laman to tan say ispiritu to ompawil ed Dios ya angiter ed sikato.

⁸ Andi-kakanaan, andi-kakanaan, kuay Managpulong. Amin et andi-kakanaan.

Say Segek na Amin da ra yan Nisulat

⁹ Lapud makabat imay Managpulong, ag to tinondaan so nambangat ed saray totoo. Inaaral to ray probirbio, tan inapiapiger ton sinusubok so katwaan da.

¹⁰ Sinali nen Managpulong ya inanap iray makaligliwan salita, balet katwaan iray insulat to.

¹¹ Saray balikas da ray makabat a totoo et singa ra maotuk a baston da ray pumapastol ya ikakana rad panangiwanwan ed saray karniro. Saray atipon a probirbio et mansiansia ran singa saray malmalet a nipanek a pasak. Say Dios a Pumapastol ed sikatayon amin so angiter na sarayan probirbio.

¹² Anak ko, wala niy sakey a panalwaran. Anggapoy samput na pansulat na libro, tan pakesawen ka na mapalalon panagaral.

¹³ Kayari na sarayan amin, wala niy sakey a nibaga: Pagalangan moy Dios tan onur mo ray ganggan to, ta sikato yay makasengeg na impamalsaan na Dios ed too.

¹⁴ Sintinsiaan na Dios ya amin iray gagawaen tayo, maung may makapoy, anggan saray ginagawa ed maamut.