Daniel 8 - Maung a Balita Biblia

Say Karniron Kalakyan tan say Kanding a Nipasingayew ed kinen Daniel

¹ Diad kumatlon taon na panaari nen Belsasar, pinmatnag ed siak so kumadwan pasingayew.

² Diad sayan pasingayew biglan niwala ak ed dalem na aliber na padir a siudad na Susa diad luyag na Elam. Manalalagey ak ed gilig na Ilog na Ulai,

³ tan diman ed pandel na ilog anengneng koy sakey a karniron kalakyan a duaray andorokey a saklur to, a say sakey et andokdokey tan balo ni nen samay sakey.

⁴ Binantayan ko may karniro a bobonoen toy bandad sagur, baybay, tan diad abalaten. Anggapoy ayep a makapatondad sikato odino makapaliis ed pakayari to. Ginawa toy labay ton dili tan pinmalaloy inkalastug to.

⁵ Legan kon momotekteken so kabaliksan to ya, sinmabin nanlapud sagur so sakey a kanding. Mapmaples a sinmabi; diad gaway peles to ag dinmiwit ed dalin iray sali to. Walay maparparontal a saklur tod nanleetan na saray mata to.

⁶ Amaarap ed samay karniron anengneng kon manalalagey ed gilig na ilog, tan inoput toy biskeg to ed indumbo tod samay karniro.

⁷ Binantayan kon dinmogpa ed samay karniro. Diad ontan lan pasnuk ton dinmumbo ed samay karniro, apoter to may duaran saklur. Makulang so biskeg to may karniro ya onlaban ed samay kanding. Nipasobsob ed dalin tan agatin-gatinan, et anggapoy makapangilaban ed sikato ed pakayari na samay kanding.

⁸ Pinmalalo lan pinmalalo so inkalastug to may kanding, balet nen kabisbiskegan to la apoter imay balbaleg a saklur to. Balet sinmalat ed samay saklur so apatiran maparontal a saklur, tan akatoro ed sananey a dapag so balang sakey.

⁹ Diad sakey ed sarayan apatiran saklur, tinmubo so sakey a melag a saklur, a say pakayari to et linmaknab ed abalaten tan diad bokig tan anggad Nisipan a Dalin.

¹⁰ Pinmalaloy imbiskeg to ya anggad nilalabanan to ray sondalo ed tawen, saray dilin bitewen, insan to imbantak ed dalin iray pigarad sikara tan ginagatinan to ra.

¹¹ Nilabanan to so anggan say Prinsipi da ray mangatatawen a sondalo, pinatonda toy inagew-agew a panagbagat ed sikato, tan dinederal toy Timplo.

¹² Nankasalanan iray totoo, anta mangisaklang ira komun na manepeg ya inagew-agew a bagat, tan nibantak ed dalin so katwaan. Maaligwas imay saklur ed amin a ginagawa to.

¹³ Insan ko nadngel so sakey ya anghil ya anepet ed kapara ton anghil, Kapigay pangangga na saraman a bengatlan anengneng ed pasingayew? Kapigay pangangga sakey a makapasinagem a kasalanan a sinmalat ed inagew-agew iran bagat? Kapigay pangangga na pakagatingatin ed saray sondalo ed tawen tan say Timplo?

¹⁴ Nadngel kon inmebat imay sananey ya anghil, Mansiansian sanlibo, sanlasus tan limamplon agew, tan legan to yan panaon labi tan kabwasan ya anggapoy nisaklang a bagat. Insan nipawil so gendat a kipapasen na Timplo.

Impaliwawa nen Anghil Gabriel imay Pasingayew

¹⁵ Siak, si Daniel, tatalusan koy kabaliksan to may pasingayew, insan biglan walay singa sakey a toon manalalagey ed arap ko.

¹⁶ Nadngel koy sakey a bosis na too a nanlapud pandel na Ilog na Ulai a kuanto, Gabriel, ipaliwawam ed sikatoy kabaliksan na anengneng to.

¹⁷ Dinmagoy Gabriel tan nanalagey ed abay ko, tan lapud mapalaloy inkataktakot ko niparugso ak ed dalin. Inkuantod siak, Sika a toon ompatey, talusan moy kabaliksan na pasingayew a nipaakar ed anggaay mundo.

¹⁸ Legan ton mansasalita, niparugso ak tan ag ko amtay tapew na dalin. Balet binembenan to ak, tan impaalagey to ak,

¹⁹ tan kuanto, Ipapanengneng kod sikay pansumpalan na pasnuk na Dios. Samay pasingayew et nipaakar ed niganan panaon na anggaan.

²⁰ Samay anengneng mon karniron kalakyan a duaray saklur to et say nanarian na Media tan Persia.

²¹ Samay kanding et say nanarian na Grecia, tan samay maparparontal a saklur ed nanleetay mata to et say ononan ari.

²² Saramay apatiran saklur a tinmubo nen apoter imay ononan saklur et saray apatiran nanarian a pakaapagan na samay bansa tan aliwan singa biskeg na samay inmonan nanarian so biskeg da.

²³ No magano lay pangangga na saraman a nanarian tan nagmaliw la ran maoges, kanyan kanepegan da lay dusalen, walay onletaw ya arin anawet so olo tan maoges, tan managpalikdo.

²⁴ Ompalaloy biskeg tobalet aliwan lapud dalin pakayari to. Makapataktakot so panderal to tan onaligwas ed amin a gawaen to. Deralen to ray makapanyarin lalaki tan saray dilin totoo na Dios.

²⁵ Lapud masilib, mampalabo ed pampalikdo to. Ikinon toy laman ton dili tan pateyen ton anggapoy pasakbay iray dakel a totoo. Onsumlang ed anggan say sankatalonggaringan ya Ari, balet naderal ya anggapoy ikanan pakayari na too.

²⁶ Ontuay pasingayew a nipaakar ed saray labi tan kabwasan a bagat a nipaliwawad sika. Balet iyamut mo ni natan lapud mabaybayag niy pakasumpal to.

²⁷ Siak, si Daniel, kinmapoy ak tan nansakit ak a pigaran agew. Insan ak binmangon tan pinmawil ed kimey ya impalima na ari ed siak, balet nikelawan ak ed pasingayew tan ag ko natalusan so kabaliksan to.