Daniel 2 - Maung a Balita Biblia

Say Kogip nen Nabucodonosor

¹ Nankogip si Ari Nabucodonosor nen kumadwan taon na panooley to. Mapalaloy inkagunigon to lapud saya, kanyan ag makaogip.

² Impaawit to sirin iray managpalar, saray salamangkiro, saray managparles, tan saray managanito, ta ipaliwawa rad sikato imay kogip to. Kasabi ra nanalagey irad arap na ari,

³ insan inkuantod sikara, Nagugunigon ak lapud samay kinogip ko. Labay kon naamtaan no antoy kabaliksan to.

⁴ Inmebat irad ari diad salitan Aramaica, Mansiansia komun a mambilay so Kagalang ya Ari! Ibagam ed sikami so kogip mo, et ipaliwawa mid sika.

⁵ Inkuan na ari ed sikara, Tinibokel ko lad kanunotan ko a nepeg ya ibaga yod siak so kogip, insan yo ibagay kabaliksan to. No ag yo nibaga, tartaren ta kayo tan deral-deralen koy kaabungan yo.

⁶ Balet no nibaga yod siak so kogip tan say kabaliksan to, tumangan ta kayo na saray rigalo tan baleg a kagalangan. Natan sirin, ibaga yo lad siak so kogip tan say kabaliksan to.

⁷ Inmebat ira lamet ed ari, No ibaga labat komun na Kagalang ya Ari so akogip to, ipatalus miy kabaliksan to.

⁸ Diad saya inmeyag so ari, Duga la may walad kanunotan ko! Paparokeyen yoy panaon, lapud tinibokel ko lad inkasiak

⁹ a nampaparay iter kod sikayon dusa no ag yo nibagad siak so kogip ko. Nampapakna kayo ya ituloy yoy pantitila yod siak, lapud iilaloan yo a diad panakar na panaon naoman iray bengatlan nagawa. Ibaga yod siak so kogip ko, et naamtaan kod satan a nayarian yo met ya ibagad siak so kabaliksan to.

¹⁰ Inmebat ira may sumisimbawa, Anggapod tapew na dalin, Kagalang ya Ari, so siopaman a makapangibagad sika na labay mon amtaen. Anggapoy ari, ya anggan say sankatalonggaringan tan sankamakapanyarian ed sikara, a mangiganggan na singa igaganggan mod saray managpalar, saray salamangkiro, tan saray managanitom.

¹¹ Satay kekerewen mo, Kagalang ya Ari, et petepeteg a mairap tan anggapoy makagawa likud labat ed saray diriyos, balet ag ira mililimug ed saray katoowan.

¹² Lapud sayan imbaga ra, mapalaloy impakapasnuk na ari tan ingganggan ton pateyen ya amin iray sumisimbaway ari a walad Babilonia.

¹³ Kanyan nipaakseb so ganggan a pateyen ya amin iray sumisimbaway ari; inanap da met a pateyen sirin si Daniel tan saramay kakaaro to.

Impaamta na Dios ed kinen Daniel so Kabaliksan na Kogip

¹⁴ Insan linmay Daniel ed kinen Arioc, say pangulo da ray dilin umaantabay na ari, tan sikatoy niganggan a mamatey ed saray sumisimbawa na ari. Inapi-apiger toy impitongtong to,

¹⁵ tan tinepet tod kinen Arioc no akin et impaakseb na ari imay maruksan ganggan. Kanyan imbaga nen Arioc ed kinen Daniel so agawa.

¹⁶ Linman tampol ed ari si Daniel tan akerew ton naitdan na andokdokey a panaon, pian nayarian ton ibagad ari so kabaliksan na kogip to.

¹⁷ Sinmempet sirin si Daniel tan imbaga tod saramay kakaaro to a di Ananias, Misael, tan Azarias so agawa.

¹⁸ Imbaga tod sikaran onkerew ira na panangasi na Dios na tawen tan ipikasi rad sikato ya ipaliwawa tod sikara so mistirio, pian ag ira napipatey ed saray arum a sumisimbawa a walad Babilonia.

¹⁹ Diad saman lamlamang a labi nipaamtad kinen Daniel so mistirio diad panamegley na pasingayew. Lapud saman indayew to so Dios na tawen:

²⁰ Say Dios makabat tan makapanyari! Sikatoy indayew yo ed ando lan ando.

²¹ Walad lima to so oras tan say panaon; sikatoy mangipapayorung tan mangeekal ed saray arari; sikatoy mangiiter na kakabatan ed saray makabat tan say pakatalus ed saray makatalus.

²² Ipapaamta to ray bengatlan aralem tan maamut; amta toy antokaman a niamut ed kabilongetan, ta manaayam ed sikaton dili so liwawa.

²³ Pisasalamatan tan idadayew ta ka, Dios da ray lalakik. Initdan mo ak na kakabatan tan biskeg; inebatan mo so pikakasik tan impaamtam ed sikami no antoy ibaga mid ari.

Imbaga nen Daniel ed Ari so Kogip tan Impaliwawa to

²⁴ Kanyan linmay Daniel ed kinen Arioc, say ingganggan na ari a mamatey ed saray sumisimbawa na ari. Inkuantod sikato, Ag mo ra papateyen. Iyakar mo ak ed ari, ta ibagak ed sikato so kabaliksan na kogip to.

²⁵ Inyakar nen Arioc a tampol si Daniel ed Ari Nabuconodosor tan inkuantod sikato, Walay arumog kon sakey a Judion adakep dia a nayarian ton ibagad sika, Kagalang ya ari, so kabaliksan na kogip mo.

²⁶ Inkuan na ari ed kinen Daniel (ya atawag met na Beltsasar), Nibagam ed siak so akogip ko tan no antoy kabaliksan to?

²⁷ Inmebat si Daniel, Kagalang ya Arim anggapoy siopaman a makabat, managparles, salamangkiro, odino astrologo a makapangibaga na kogip mo tan say kabaliksan to.

²⁸ Balet walay Dios ed tawen a sikatoy mangipapaamtad saray mistirio. Impaamta tod sika, Kagalang ya Ari, no antoy nagawa ed arapen. Natan ibagak ed sika so kogip mo, say nipasingayew ed sika nen naogip ka.

²⁹ Legan mon nanaogip, Kagalang ya Ari, akogip mo so nipaakar ed arapen; et say Dios, a mangipapaamtad saray mistirio, impanengneng tod sikano antoy nagawa ed arapen.

³⁰ Natan, nipaamtad siak yan mistirio, aliwan lapud makabat ak nen saray arum, no ag ingen pian nakabatan mo, Kagalang ya Ari, so kabaliksan na kogip mo tan natalusan mo ray kanunotan a sinmabid sika.

³¹ Kagalang ya Arim, diad samay nipasingayew ed sika, anengneng mon manalalagey ed arap mo so sakey a balbaleg a talintao, masilesileng tan mansiayap, tan makapataktakot a nengnengen.

³² Sankapuroan a balituk sa olo to; pilak so pagew tan saray taklay to; gansa so balangbang to tan saray tapi to,

³³ balatyang iray ulpo tan bikking to, tan balatyang tan dalin iray sali to.

³⁴ Legan mon nenengnengen, walay sakey a baleg a baton ginmeray a nanlapud palandey anggaman ya anggapoy aniwit, atolinan to ra may balatyang tan dalin a sali na samay talintao, tan tinemek to ra.

³⁵ Insan biglan akusbo ira may balatyang, dalin, gansa, pilak, tan balituk, tan nagmaliw iran singa dabuk ed panagilikan no tiagew. Intikyab iran amin na dagem, et anggapoy nakdaan a pakatontonan ed kawalaan da. Balet binmaleg imay bato tan nagmaliw a palandey a sinakuban toy intiron mundo.

³⁶ Saya so kinogip mo. Natan ibagak ed sika, Kagalang ya Ari, so kabaliksan to.

³⁷ Kagalang ya Ari, sika so sankatalonggaringan ed amin da ray arari. Say Dios na tawen impagmaliw to kan ari tan initdan to ka na pakayari, biskeg, tan kagalangan.

³⁸ Impagmaliw to kan manoley ed amin a pasen a kawalaan na totoo tan manoley ed amin da ray ayayep tan amin da ray manok. Sika may olon balituk.

³⁹ No anggapo ka la onsalat so sananey ya impirio, balet aliwan singa kabaleg tan katalonggaring na impiriom. Kayari to ya, onsalat so kumatlon impirio na gansa a sikatoy manoley ed intiron mundo.

⁴⁰ Insan walay kumapat ya impirio a mabiskeg a singa balatyang; temeken tan misimisien toy amin a bengatla. No panoy panemek na balatyang ed amin a bengatla, ontan met so panemek tan pamagbag na sayan impirio ed amin ya akaonan impirio.

⁴¹ Anengneng mo met a walay balatyang tan dalin iray sali tan saray gamet na samay talintao. Apaldua ya impirio so kabaliksan to man. Nawalaan so impirio na biskeg a singa balatyang lapud wala man a balatyang ya alaukan na dalin.

⁴² Saramay gamet na saliwalay balatyang tan dalinkabaliksan day mabiskeg so arum a parti na impirio, balet makapoy so arum a parti.

⁴³ Anengneng mo met a nanlauk so balatyang tan say dalin. Kabaliksan to ya a saray manoley ed saman ya impirio et salien dan pankakasakeyen iray pamilya ra diad panaasawaan na saray totoo ra, balet ag da nayarian, a singa say balatyang et ag nayarin onlauk ed dalin.

⁴⁴ Diad panaon da raman a manoley say Dios na tawen mangiletneg na panarian ya ag balut mangangga. Ag balut nadakep yan panarian, no ag ingen sigput ton deralen ya amin ira man ya impirio, insan mansiansia ya anggad angga.

⁴⁵ Anengneng mo no panon a ginmoray imay baton baleg a nanlapud palandey tan tinmolin ed samay talintaon balatyang, gansa, dalin, pilak, tan balituk. Say matalonggaring a Dios impaamta to, Kagalang ya Ari, so nagawa ed arapen a panaon. Sikato ya so tuan kinogip mo tan say petepeteg a kabaliksan to.

Tinumangan na Ari si Daniel

⁴⁶ Insan dinmakmomo ya anggad dalin si Ari Nabucodonosor tan ingganggan ton nisaklang ed kinen Daniel iray bagat tan insinso.

⁴⁷ Inkuan na ari, Say Dios mo so sankatalonggaringan ed amin da ray diriyos, say Katawan da ray arari, tan sikato so mangipapaamta ed kabaliksan na saray mistirio. Amtak ya, lapud ayarian mon impaliwawa so kabaliksan na sayan mistirio.

⁴⁸ Insan initdan na ari si Daniel na atagey a kipapasen, initdan to na amayamay a mabmabli ran rigalo, impasen ton makaoley ed luyag na Babilonia, tan impagmaliw ton pangulo da ray amin a sumisimbawa na ari.

⁴⁹ Lapud kinerew nen Daniel, say ari impasen ton makaoley ed kimey diad luyag na Babilonia ira di Sadrac, Mesac, tan Abednego; si Daniel balet nansiansia ed korti na ari.