Daniel 11 - Maung a Balita Biblia

¹ Sikatoy makaoley ya ontulong tan mangyagel ed siak.

² Katwaan ira yay salitaen kod sika natan. Samay anghil inkuanto, Talora nin ari so manaoley ed Persia, insan onsalat so kumapat a mayaman ni nen saramay talora. Diad kabisbiskegan to lapud kayamanan to, sagyaten ton mibakal so nanarian na Grecia.

Saray Nanarian na Egipto tan Siria

³ Insan onletaw so makapanyarin ari. Manoley ed balbaleg ya impirio tan gawaen to so antokaman a labay to.

⁴ Balet diad kabisbiskegay pakayari to nabuyak so impirio to tan napangkapat. Onsalat ed sikatoy ararin aliwan sikatoy sengeg da, balet ag da naparaay pakayari to.

⁵ Magmaliw a mabiskeg so ari na Egipto. Balet magmaliw a mabiskeg ni nen say sikato so sakey ed saray pangulo da ray sondalo to tan manoley ed lalon makapanyarin nanarian.

⁶ Kayari na pigaran taon say ari na Egipto migampid ari na Siria tan ipaasawa tod sikato so marikit to. Balet ag mambayag so panggampi ra, et napatey imay bii, say asawa to, say anak ton melag, tan saray aripen ton akilad sikato.

⁷ Ag mabayag magmaliw ya ari so sakey ed saray kakanayon to may bii. Dogpaan na sayan ari iray sondalo na ari na Siria, looban to ray tirinsira ra, tan taloen to ra.

⁸ Awiten tod Egipto iray talintaoy diriyos da tan saray kagawaan a balituk tan pilak a nisaklang ed saraman a diriyos. Kalabas na pigaran taon a walay kareenan ed kaliber-liber

⁹ dogpaan na ari na Siria so Egipto, balet napasoot ya ompawil ed dalin to.

¹⁰ Mamparaan a mibakal iray lalakin anak na ari na Siria tan mantipon ira na dakerakel a sondalo. Onlan singa delap so sakey ed sikara tan dogpaan toy tirinsira na kalaban.

¹¹ Diad petang na oloy ari na Egipto bakalen toy ari na Siria tan nadakep toy amayamay a sondalo to.

¹² Mampaatagey lapud impanalo to tan impamatey tod amayamay a sondalo, balet ag mansiansiay panalo to.

¹³ Ompawil so ari na Siria ed bansa to tan mantipon na lalon dakerakel a sondalo nen samay inmona. No onsabiy manepeg a panaon, onla lamet ed Egipto a kaiba to ray sondalon amayamay tan dugay aramas da tan malaem so abasto ra.

¹⁴ Insan amayamay a totoo so onlaban ed ari na Egipto. Wala met iray pigaran masebeg a lalakin kabandaan mo, Daniel, ya onsumpa lapud sakey a pasingayew ya anengneng da, balet natalo ra.

¹⁵ Kanyan say ari na Siria lakoben toy sakey a siudad ya aliber na padir tan dakepen to. Saray sondalo na Egipto et ag da ituloy so mibakal; anggan saray sankasebegan ed sikara et kulang so biskeg dan milaban.

¹⁶ Say taga Sirian makadakep et gawaen tod sikara so labalabay to, tan anggapoy onsumlang ed sikato. Onalagey ed Nisipan a Dalin tan sigput ton naoleyan yan dalin.

¹⁷ Iplano na ari na Siria a palaknaben so nanarian to, tan ikana toy amin a sondalo to. Insan konwarin migampid ari na kalaban ton nanarian, ipaasawa tod sikato so marikit ya anak to, pian naderal to; balet ag mampalabo ed plano to.

¹⁸ Kayari tod say, dogpaan to ray bansan walad gilig na dayat tan nadakep toy amayamay ed saraya. Balet sakey a pangulo na arum a bansa so manalod sikato tan patondaen toy panagpaatagey to; ipawil ton tua ed sikato so panagpaatagey na ari na Siria.

¹⁹ Ompawil so ari ed saray tirinsira to ed dilin dalin to, balet natalo, tan saya la so anggaan to.

²⁰ Insan onsalat ed sikato so sakey ya ari a mangibaki na sakey ya opisyal a mamairap ed saray totoo diad pansingil toy atatagey a buis, pian ondakel so kayamanan na nanarian. Ag mabayag napatey iman ya ari balet aliwan diad arap na karaklan odino diad bakal.

Say Maoges ya Ari na Siria

²¹ Samay anghil intuloy ton impaliwawa: Say onsalat ya ari na Siria et sakey a maoges a too ya anggapoy kanepegan ton manari, balet ag ilaloan so isabi to tan samsamen toy pakaoley diad panamegley na panamalikdo.

²² Siopamay toon onsumlang ed sikato, anggan say Pangulon Pari, et napatey tan naandipat.

²³ Diad pipaknaan tod saray arum a bansa, palikdoen to ra, tan ombiskeg lan ombiskeg anggaman a melag a bansa so ooleyan to.

²⁴ Looban ton anggapoy pasakbay so sakey a mayaman a luyag tan gawaen to ray bengatlan ag balut ginawa na saray lalaki to. Insan to apagen ed saray totoo to iray antokaman a kagawaan tan kayaryan ya asamsam tod bakal. Mamplano na idogpa tod saray tirinsira, balet onkulang so panaon to.

²⁵ Masebeg yan ari tan mabiskeg so linawa ton mantipon na dakerakel a sondalo, pian nadogpaan toy ari na Egipto a mamparaan met ya onlaban a kaiba to ray dakerakel tan makapanyarin sondalo to. Balet napalikdo so ari na Egipto, kanyan ag manalo.

²⁶ Saray sankaasinggeran ed sikaton sumisimbawa to so maneral ed sikato. Amayamay iray sondalo ton napatey, tan naoput ira.

²⁷ Insan saramay duaran ari ondongo ran mangan ed saksakey a lamisaan, balet maoges so getma ran dua, tan mantilaan ira. Ag da nagamuran so labay da, lapud ag ni sinmabi so panaon a pakala ra.

²⁸ Onsempet so ari na Siria a sankaawit to ray asamsam to, tan malet so getma ton maneral ed rilihion da ray totoo na Dios. Gawaen to so labalabay to, insan la ompawil ed dilin dalin to.

²⁹ Onsabiy panaon a dogpaan to lamet so Egipto, balet doma lad satan so nagawa.

³⁰ Onsabin akalogan ed bapor iray taga Roma tan labanan da, et nataktakot. Insan ompawil a mapalaloy petang na olo to tan deralen to so rilihion da ray totoo na Dios. Onuren to so simbawa da ray angikaindan ed saman a rilihion.

³¹ Pagmaliwen na arum a sondalo to a marotak, onung ed ganggan, so Timplo. Patondaen day inagew-agew a bagat tan ilira da so Makapataktakot a Managderal.

³² Diad panamegley na panamalikdo natanggoyur na ari a tulongan na saray angikaindan la ed rilihion da, balet onlaban ed sikato iray ontotoluk ed Dios.

³³ Saray makabat a pangulo na saray totoo et inagnag dad arum a totoo so kakabatan da. Balet ag mabayag napatey ed bakal iray arum ed sikara odino poolan da ran mabilay, tan saray arum et nasamsam iray kayaryan da tan nadakep ira.

³⁴ Legan a nitutuloy so panagpatey, dagdaiset so tulong a naawat na saray totooy Dios. Anggaman ya amayamay so migampid sikara, maoges balet so getma ra.

³⁵ Napatey ira may arum a pangulon makabat, balet lapud sayan nagawa nalinisan iray totoo. Ontuloy yan nagawa ya anggad onsabi so anggaan, say panaon ya inggetar na Dios.

³⁶ Gawaen na ari na Siria so labay to. Ipaatagey toy sikaton dili tan ibaga ton sikatoy matalonggaring nen say dinanman a dios, anggan say Sankatageyan a Dios. Nagawaan to ya, anggad panaon a panusay Dios ed sikato. Gawaen na Dios so onung na implano ton gawaen.

³⁷ Ag ikabkabilangan na ari so dios a nanlilingkuran na saray lalaki to, tan say dios ya inararo na saray bibii. Diad tuay tua, ag to ikabilangan ya amin iray diriyos, ta ipasen toy sikaton dili a matalonggaring nen say siopaman ed sikaran amin.

³⁸ Ingen pagalangan to so dios a mangyaagel na saray tirinsira. Mangibagat na balituk, pilak, alahas, tan arum ni ran mabmablin rigalo ed sakey a dios ya ag balut inggalang na saray lalaki to.

³⁹ Diad pangyagel tod saray tirinsira to, ikana to ray totoon mangigagalang ed dios na arum a bansa. Pagalangan to na baleg iray amin a paoleyan ed sikato, ipasen to rad atagey a kipapasen, tan tumangan to ra na dalin.

⁴⁰ No ngalngali la mansamput so panoley na ari na Siria, ondogpad sikato so ari na Egipto, et say ari na Siria iyoput toy pakayari ton onlaban ya ipakana to ray karwahi, saray kabayo, tan amayamay a bapor. Singa danum a delap ya onagos so iloob tod saray amayamay a bansa.

⁴¹ Looban toy anggan say Nisipan a Dalin tan pateyen toy nilibon totoo, balet makabatik iray totood bansa na Edom, Moab, tan saray nakdaan ed Ammon.

⁴² No looban to ra yan bansa, looban to met so Egipto.

⁴³ Alaen ton amin iray akaamut a balituk tan pilak na Egipto tan saray arum a mabmablin kayaryan to. Dakepen toy Libia tan Sudan.

⁴⁴ Insan nataktakot lapud balitan manlapud bokig tan baybay, kanyan mibakal na pinasya tan amayamay a totoo so napatey to.

⁴⁵ Ilira to ni ingen iray ankakabaleg a tulda ton ayamay ari diad nanleetan na dayat tan palandey a panalalageyan na Timplo. Balet ompatey so ari na Siria, ya anggapod man so siopaman ya ontulong ed sikato.